Genesis 2

Chinese TTVR (現代台語譯本羅馬字版)

← Chapter 1 Jump to: Chapter 3 →

1Thiⁿ tōe kap bān-siōng í-keng chhòng-chō oân-sêng.

2Tī tē-chhit ji̍t, Siōng-tè oân-sêng I ê kang-chok, chiū tī hit-ji̍t hioh-khùn.

3Siōng-tè sù-hok tē-chhit ji̍t, tēng chit-ji̍t chòe sèng-ji̍t; in-ūi tī chit-ji̍t, Siōng-tè thêng I it-chhè chhòng-chō ê kang, chiū an-hioh.

4Che chiū-sī thiⁿ kap tōe chhòng-chō ê kè-thêng. Chú Siōng-tè chō thiⁿ kap tōe ê sî,

5tāi-tōe iáu-bē ū chháu-ba̍k, chhân-iá iáu-bē siⁿ chhài-soe; in-ūi Chú Siōng-tè bô lo̍h-hō͘, mā iáu-bē ū lâng thang chèng-choh.

6Chóng-sī ū chúi tùi tōe chhèng--chhut-lâi, lūn-te̍k tōe-bīn.

7Chú Siōng-tè ēng tōe-chiūⁿ ê thô͘-hún lia̍p-chō lâng, tùi i ê phīⁿ-khang pûn sìⁿ-miā ê khùi; lâng chiū chiâⁿ-chòe ū sìⁿ-miā ê lâng.

8Chú Siōng-tè tī tang-hng ê I-tiân khai-khún chi̍t ê hn̂g, chiong só͘ chō ê lâng hē tī hit lāi-bīn.

9Chú Siōng-tè hō͘ tōe hoat ta̍k-chióng hó-khòaⁿ ê chhiū-á, kap hó-chia̍h ê ké-chí; tī hn̂g ê tiong-kan mā ū oa̍h-miā-chhiū, kap ōe hō͘ lâng hun-pia̍t siān-ok ê chhiū.

10Ū chi̍t tiâu hô tùi I-tiân lâu--chhut-lâi, koàn-ak hit-ê hn̂g; tùi hia hun-chòe sì tiâu.

11Thâu chi̍t tiâu kiò-chòe Pí-sùn-hô, se̍h Hap-hui-la choân-tōe; hia chhut-sán kim,

12sī siōng-hó ê kim; koh chhut-sán tin-kùi ê phang-liāu kap âng-bé-ló.

13Tē-jī tiâu kiò-chòe Ki-hùn-hô, se̍h Kó͘-si̍t choân-tōe.

14Tē-saⁿ tiâu kiò-chòe Tí-kek-lí-su-hô, lâu tùi A-su̍t ê tang-pêng. Tē-sì tiâu chiū-sī Iù-hoat-la-tí-hô.

15Chú Siōng-tè chiong hit-ê lâng an-tùn tī I-tiân-hn̂g, hō͘ i chèng-choh, kò͘-siú hit-ê hn̂g.

16Chú Siōng-tè hoan-hù hit-ê lâng kóng, “Hn̂g-lāi ta̍k-chióng chhiū ê ké-chí, lí lóng thang chia̍h.

17M̄-kú hit-châng ōe hō͘ lâng hun-pia̍t siān-ok ê chhiū, i ê ké-chí lí bōe-ēng-tit chia̍h; lí nā chia̍h, hit-ji̍t lí it-tēng ōe sí.”

18Chú Siōng-tè kóng, “Hit-ê lâng ka-kī chi̍t ê tòa m̄ hó; góa beh kā i chō chi̍t ê pang-chān-chiá lâi phit-phòe i.”

19Chú Siōng-tè ēng thô͘ chòe iá-tōe ta̍k-khoán ê cháu-siù, í-ki̍p khong-tiong ta̍k-khoán ê pe-chiáu. Chú Siōng-tè kā hiah-ê tōng-bu̍t chhōa-lâi hit-ê lâng ê bīn-chêng, hō͘ i kā in hō-miâ; hit-ê lâng kā ta̍k-khoán tōng-bu̍t hō ê miâ, chiū chiâⁿ-chòe hit-ê tōng-bu̍t ê miâ.

20Hit-ê lâng chiū kā só͘-ū ê cheng-siⁿ, khong-tiong ê pe-chiáu, kap iá-tōe it-chhè ê cháu-siù hō-miâ, m̄-kú chhē bô chi̍t ê thang chòe i ê pang-chān-chiá lâi phit-phòe i.

21Chú Siōng-tè hō͘ hit-ê lâng khùn tāng-bîn, i chiū khùn. Chú Siōng-tè tùi hit-ê lâng the̍h chi̍t ki hia̍p-kut, koh hō͘ hit-ūi ê bah ha̍p--khí-lâi.

22Chú Siōng-tè chiū ēng hit-ki hia̍p-kut chō chi̍t ê cha-bó͘-lâng, chhōa i lâi kàu hit-ê lâng hia.

23Hit-ê lâng kóng, “Chit-ê chiah sī góa kut-lāi ê kut, bah-lāi ê bah; thang chheng i chòe cha-bó͘-lâng, in-ūi i sī tùi ta-po͘-lâng the̍h-chhut--ê.”

24Án-ni, lâng beh lī-khui i ê pē-bú, kap i ê bó͘ kiat-liân, nn̄g lâng chiâⁿ-chòe chi̍t-thé.

25Ang-bó͘ nn̄g lâng chhiah-sin-lō͘-thé, bô kám-kak kiàn-siàu.

← Chapter 1 Jump to: Chapter 3 →

推荐阅读

注释 Genesis 注释书 → 灵修 Genesis 灵修指南 → 购买此圣经 TTVR (現代台語譯本羅馬字版) 研读本圣经 →