Genesis 27

Chinese TTVR (現代台語譯本羅馬字版)

← Chapter 26 Jump to: Chapter 28 →

1Í-sat nî-lāu, ba̍k-chiu hoe, bōe khòaⁿ--kìⁿ, chiū kiò i ê tōa-kiáⁿ Í-sò lâi, kā i kóng, “Góa ê kiáⁿ ah.” I ìn kóng, “Góa tī chia.”

2Í-sat kóng, “Góa chin lāu lah, m̄ chai tó chi̍t ji̍t beh sí.

3Taⁿ gia̍h lí phah-la̍h ê ke-si, chiū-sī chìⁿ-tē kap keng, khì iá-tōe kā góa phah-la̍h,

4chiàu góa ài ê kháu-bī chú lâi hō͘ góa chia̍h, hō͘ góa tī iáu-bē sí í-chêng kā lí chiok-hok.”

5Lē-pek-ka ū thiaⁿ-tio̍h Í-sat tùi i ê kiáⁿ Í-sò kóng ê ōe. Í-sò chhut-khì iá-tōe phah-la̍h, beh tòa la̍h-bu̍t tò--lâi;

6Lē-pek-ka tùi i ê kiáⁿ Ngá-kok kóng, “Góa ū thiaⁿ-tio̍h lín lāu-pē kā lí ê hiaⁿ-ko Í-sò kóng,

7‘Lí khì lia̍h la̍h-bu̍t tò--lâi, chú hō͘ hó-chia̍h, phâng-lâi hō͘ góa; góa beh tī iáu-bē sí í-chêng, tī Siōng Chú ê bīn-chêng kā lí chiok-hok.’

8Taⁿ, góa ê kiáⁿ, lí tio̍h thiaⁿ góa ê ōe, chiàu góa kā lí kóng--ê khì chòe.

9Lí khì iûⁿ-kûn hia, lia̍h nn̄g chiah pûi ê soaⁿ-iûⁿ-á-kiáⁿ lâi; góa beh chiàu lín lāu-pē kah-ì ê kháu-bī chú hō͘ i chia̍h.

10Lí phâng-khì hō͘ lín lāu-pē chia̍h, thang hō͘ i tī iáu-bē sí í-chêng kā lí chiok-hok.”

11Ngá-kok tùi i ê lāu-bú Lē-pek-ka kóng, “M̄-kú góa ê hiaⁿ-ko Í-sò seng-khu ū mn̂g, góa ê phê-hu kng-ku̍t.

12Góa ê lāu-pē nā bong-tio̍h góa, ōe chai góa teh kā i phiàn; góa m̄-nā bōe-tàng tit-tio̍h i ê chiok-hok, tian-tò siū i chiù-chó͘.”

13I ê lāu-bú kóng, “Góa ê kiáⁿ ah, lí nā siū chiù-chó͘, góa lâi sêng-tam. Chòe lí thiaⁿ góa ê ōe, khì lia̍h iûⁿ-á lâi hō͘ góa.”

14Ngá-kok chiū khì lia̍h iûⁿ-á lâi hō͘ i ê lāu-bú; i ê lāu-bú chiū chiàu i ê lāu-pē kah-ì ê kháu-bī liāu-lí.

15Lē-pek-ka koh hiahⁿ tōa-kiáⁿ Í-sò siu tī chhù-lāi siōng-hó ê saⁿ, hō͘ i ê sòe-hàn-kiáⁿ Ngá-kok chhēng.

16I koh ēng soaⁿ-iûⁿ-á ê phê, pau Ngá-kok ê chhiú kap ām-kún kng-ku̍t ê só͘-chāi.

17Jiân-āu, chiong i chú ê liāu-lí kap piáⁿ, kau hō͘ i ê kiáⁿ Ngá-kok.

18Ngá-kok khì in lāu-pē hia, kóng, “A-pa.” Í-sat kóng, “Góa tī chia. Góa ê kiáⁿ, lí sī tó chi̍t ê?”

19Ngá-kok tùi i ê lāu-pē kóng, “Góa sī lí ê tōa-kiáⁿ Í-sò. Góa í-keng chiàu lí hoan-hù--ê khì chòe. Chhiáⁿ khí-lâi chē, chia̍h góa phah--tio̍h ê la̍h-bu̍t; chia̍h-pá thang kā góa chiok-hok.”

20Í-sat tùi i ê kiáⁿ kóng, “Góa ê kiáⁿ, lí ná ōe chiah kín chiū phah--tio̍h?” Ngá-kok ìn kóng, “In-ūi Siōng Chú — lí ê Siōng-tè hō͘ góa chin hó-ūn.”

21Í-sat kā Ngá-kok kóng, “Góa ê kiáⁿ, kiâⁿ khah óa--lâi; góa beh bong lí, khòaⁿ lí kiám chin-chiàⁿ sī góa ê kiáⁿ Í-sò?”

22Ngá-kok chiū óa-kūn i ê lāu-pē Í-sat. Í-sat chiū bong i, kóng, “Siaⁿ, sī Ngá-kok ê siaⁿ; chhiú, sī Í-sò ê chhiú.”

23Í-sat hun bōe chheng-chhó, in-ūi Ngá-kok ê chhiú ū mn̂g, chhin-chhiūⁿ i ê hiaⁿ-ko Í-sò, chiū kā i chiok-hok.

24Koh kóng, “Lí kiám chin-chiàⁿ sī góa ê kiáⁿ Í-sò?” Ngá-kok kóng, “Góa sī.”

25Í-sat kóng, “Lí phah--tio̍h ê la̍h-bu̍t phâng-lâi hō͘ góa chia̍h, góa thang kā lí chiok-hok.” Ngá-kok chiū phâng hō͘ i chia̍h, koh the̍h chiú hō͘ i lim.

26I ê lāu-pē Í-sat tùi i kóng, “Góa ê kiáⁿ, óa-lâi kā góa chim.”

27Ngá-kok chiū chìn-chêng chim i ê lāu-pē; i ê lāu-pē phīⁿ-tio̍h i ê saⁿ ê bī, chiū kā i chiok-hok kóng: Góa ê kiáⁿ ê bī, chhin-chhiūⁿ Siōng Chú sù-hok ê chhân-hn̂g ê bī.

28Goān Siōng-tè siúⁿ-sù lí thiⁿ-téng ê kam-lō͘, hō͘ lí ê thó͘-tōe pûi-súi, ngó͘-kok kap sin-chiú chin chōe.

29Goān bān-bîn ho̍k-sāi lí, lia̍t-kok kūi-pài lí; goān lí thóng-tī lí ê hiaⁿ-tī, lí ê lāu-bú ê kiáⁿ kūi-pài lí; chiù-chó͘ lí--ê siū chiù-chó͘, chiok-hok lí--ê siū chiok-hok.

30Í-sat kā Ngá-kok chiok-hok liáu, Ngá-kok tùi i ê lāu-pē Í-sat hia chhut--lâi ê sî, i ê hiaⁿ-ko Í-sò tú-tú phah-la̍h tò--lâi.

31I mā chú hó-chia̍h ê liāu-lí, phâng-lâi hō͘ i ê lāu-pē, kóng, “A-pa, chhiáⁿ khí-lâi chia̍h kiáⁿ phah--tio̍h ê la̍h-bu̍t, chia̍h-pá thang kā góa chiok-hok.”

32I ê lāu-pē Í-sat kā i kóng, “Lí sī sím-mi̍h-lâng?” I kóng, “Góa sī lí ê tōa-kiáⁿ Í-sò.”

33Í-sat tōa kiaⁿ, phi̍h-phi̍h-chhoah, kóng, “Tú-chiah hit-ê sī siáⁿ-lâng? Hit-ê lâng tī lí iáu-bē lâi í-chêng, phâng la̍h-bu̍t hō͘ góa chia̍h, góa chia̍h-liáu chiū kā i chiok-hok; i it-tēng ōe tit-tio̍h hok-khì.”

34Í-sò chi̍t-ē thiaⁿ-tio̍h lāu-pē ê ōe, khui-siaⁿ kiò-khó͘ tōa khàu, tùi i ê lāu-pē kóng, “A-pa, lí mā tio̍h kā góa chiok-hok.”

35Í-sat kóng, “Lí ê sió-tī í-keng ēng khúi-kè chhiúⁿ lí ê hok-hūn.”

36Í-sò kóng, “I kiò-chòe Ngá-kok, kiám m̄-sī chin ha̍h? I phiàn góa nn̄g piàn: Chhiúⁿ góa tōa-kiáⁿ ê bêng-hūn, chit-piàn koh chhiúⁿ góa ê hok-hūn.” Í-sò koh kóng, “Lí kiám bô koh ū sím-mi̍h thang kā góa chiok-hok?”

37Í-sat ìn Í-sò kóng, “Góa í-keng siat-li̍p i chòe lí ê chú, hō͘ i ê chhin-cho̍k ho̍k-sāi i; koh ēng ngó͘-kok sin-chiú iúⁿ-chhī i. Góa ê kiáⁿ, góa iáu ōe-tàng kā lí chòe sím-mi̍h?”

38Í-sò kā i ê lāu-pē kóng, “A-pa, lí ê chiok-hok kiám kan-ta chi̍t chióng? A-pa, góa, lí mā tio̍h kā góa chiok-hok.” Í-sò khui-siaⁿ tōa khàu.

39I ê lāu-pē Í-sat ìn i, kóng: Lí bô pûi-súi ê thó͘-tōe thang khiā-khí, mā bô thiⁿ-téng ê kam-lō͘ thang lūn-te̍k.

40Lí beh óa-khò to-kiàm tō͘-oa̍h, koh beh ho̍k-sāi lí ê sió-tī; kàu lí kiông-sēng ê ji̍t, beh tùi lí ê ām-kún hàiⁿ-tiāu i ê taⁿ.

41Í-sò in-ūi Ngá-kok tit-tio̍h lāu-pē ê chiok-hok, chiū oàn-hūn Ngá-kok; sim-lāi kóng, “Goán lāu-pē teh-beh kè-sin, tán song-sū pān-liáu, góa beh thâi-sí góa ê sió-tī Ngá-kok.”

42Ū lâng chiong tōa-kiáⁿ Í-sò ê kè-ōe kā Lē-pek-ka kóng, Lē-pek-ka chiū chhe lâng khì kiò i ê sòe-hàn-kiáⁿ Ngá-kok lâi, kā i kóng, “Lín hiaⁿ-ko Í-sò beh thâi lí, siau i ê oàn-hūn.

43Taⁿ, góa ê kiáⁿ, tio̍h thiaⁿ góa ê ōe; kóaⁿ-kín cháu-khì Hap-lân lín a-kū La-pan hia;

44kap i tòa chi̍t tōaⁿ sî-kan, thèng-hāu lín hiaⁿ-ko ê siū-khì siau.

45Kàu lín hiaⁿ-ko siū-khì soah, bōe-kì-tit lí tùi i só͘ chòe ê tāi-chì, hit-sî góa chiah chhe lâng khì chhōa lí tò--lâi. Góa ná tio̍h chi̍t ji̍t lāi sit-khì nn̄g ê kiáⁿ?”

46Lē-pek-ka tùi Í-sat kóng, “Góa in-ūi Í-sò chhōa chit nn̄g ê Hek -lâng ê cha-bó͘-kiáⁿ, oa̍h kah chin kan-khó͘. Ngá-kok nā koh chhōa chit só͘-chāi Hek -lâng ê cha-bó͘ gín-á, góa oa̍h--teh ū siáⁿ ì-sù?”

← Chapter 26 Jump to: Chapter 28 →