Genesis 34

Chinese TTVR (現代台語譯本羅馬字版)

← Chapter 33 Jump to: Chapter 35 →

1Lē-a kā Ngá-kok siⁿ ê cha-bó͘-kiáⁿ Tí-ná chhut-khì beh kap hit só͘-chāi ê cha-bó͘ gín-á sio-chhē.

2Hit só͘-chāi ê cho̍k-tiúⁿ Hi-bī -lâng Hap-boat ê kiáⁿ Sī-kiàm khòaⁿ-tio̍h i, chiū kā i khiú--teh, kap i khùn, kā i bú-jio̍k.

3Sī-kiàm loân-bō͘ Ngá-kok ê cha-bó͘-kiáⁿ Tí-ná; i ài chit-ê cha-bó͘ gín-á, tùi i thò͘-lō͘ chin-chêng.

4Sī-kiàm kā i ê lāu-pē Hap-boat kóng, “Kā góa chhōa chit-ê cha-bó͘ gín-á hō͘ góa chòe bó͘.”

5Ngá-kok thiaⁿ-tio̍h i ê cha-bó͘-kiáⁿ Tí-ná siū Sī-kiàm bú-jio̍k, chēng-chēng bô chhut-siaⁿ, in-ūi hit-sî i hiah-ê kiáⁿ kap cheng-siⁿ lóng iáu tī iá-tōe; i beh thèng-hāu in tò--lâi.

6Sī-kiàm ê lāu-pē Hap-boat lâi kìⁿ Ngá-kok, beh kap i kóng koan-hē Tí-ná ê tāi-chì.

7Ngá-kok hiah-ê kiáⁿ tùi iá-tōe tò--lâi, chi̍t-ē thiaⁿ-tio̍h chit-ê tāi-chì, ta̍k-ê hui-siông thòng-sim siū-khì, in-ūi Sī-kiàm tùi Í-sek-lia̍t -ke chòe m̄ eng-kai chòe ê kiàn-siàu-tāi, kā Ngá-kok ê cha-bó͘-kiáⁿ bú-jio̍k.

8Hap-boat kap in chham-siông kóng, “Góa ê kiáⁿ Sī-kiàm loân-bō͘ lín cha-bó͘-kiáⁿ, chhiáⁿ chiong i hō͘ góa ê kiáⁿ choh-bó͘.

9Lín kap goán kiat-chhin; lín thang chiong lín ê cha-bó͘-kiáⁿ kè goán, lín mā thang chhōa goán ê cha-bó͘-kiáⁿ.

10Lín kap goán chòe-hé tòa tiàm chia; thó͘-tōe chiah khoah, lín thang tòa tī chia, chòe seng-lí, kiàn-tì sán-gia̍p.”

11Sī-kiàm tùi cha-bó͘ gín-á ê lāu-pē kap i ê hiaⁿ-ko kóng, “Lín nā bô khì-hiâm, lín iau-kiû sím-mi̍h, goán lóng beh hō͘ lín.

12Bô-lūn jōa-chōe phèng-kim kap lé-mi̍h, goán it-tēng chiàu lín ê iau-kiû hō͘ lín; chí-ū chhiáⁿ lín chiong cha-bó͘-kiáⁿ kè hō͘ góa.”

13Ngá-kok hiah-ê kiáⁿ in-ūi Sī-kiàm bú-jio̍k in ê sió-bē Tí-ná, chiū khi-phiàn Sī-kiàm kap i ê lāu-pē Hap-boat,

14kóng, “Chiong goán sió-bē kè hō͘ bô siū kat-lé ê lâng, chit-khoán tāi-chì goán chòe bōe kàu; in-ūi che tùi goán lâi kóng sī kiàn-siàu-sū.

15Chí-ū chi̍t ê tiâu-kiāⁿ, lín só͘-ū ê ta-po͘-lâng nā lóng kap goán siâng-khoán siū kat-lé, goán chiū tah-èng lín;

16goán chiong goán ê cha-bó͘-kiáⁿ kè hō͘ lín, goán mā chhōa lín ê cha-bó͘-kiáⁿ choh-bó͘; goán tòa tiàm lín chia, chiâⁿ-chòe kâng chi̍t cho̍k.

17Lín nā m̄ thiaⁿ goán ê ōe siū kat-lé, goán chiū chhōa goán sió-bē lī-khui chia.”

18Hap-boat kap i ê kiáⁿ Sī-kiàm hoaⁿ-hí chiap-siū chit-ê tiâu-kiāⁿ.

19Hit-ê siàu-liân-lâng sûi-sî chiàu in ê ōe khì chòe, in-ūi i loân-bō͘ Ngá-kok ê cha-bó͘-kiáⁿ. I sī in lāu-pē ê ke siōng siū chun-tiōng--ê.

20Hap-boat kap i ê kiáⁿ Sī-kiàm lâi kàu siâⁿ-mn̂g-kháu, kā siâⁿ-lāi ê lâng kóng,

21“Chiah-ê lâng sī lán ê pêng-iú; lán ê thó͘-tōe chin khoah, ū-kàu thang hō͘ in khiā-khí, chòe seng-lí; lán thang chhōa in ê cha-bó͘-kiáⁿ choh-bó͘, mā thang chiong lán ê cha-bó͘-kiáⁿ kè hō͘ in.

22M̄-kú in ū chi̍t ê tiâu-kiāⁿ, chiū-sī lán só͘-ū ê ta-po͘-lâng lóng tio̍h kap in siâng-khoán siū kat-lé, in chiah beh kap lán chòe-hé tòa, chiâⁿ-chòe kâng chi̍t cho̍k.

23Lán nā chiap-siū in ê tiâu-kiāⁿ, in chiū ōe kap lán chòe-hé tòa, án-ni, in ê cheng-siⁿ, châi-sán, kap in só͘-ū--ê, kiám m̄-sī lóng ōe pìⁿ-chòe lán ê?”

24Chit-ê siâⁿ ê chū-bîn lóng chiap-siū Hap-boat kap i ê kiáⁿ Sī-kiàm ê ōe; án-ni, choân-siâⁿ ê ta-po͘-lâng lóng siū kat-lé.

25Kàu tē-saⁿ ji̍t, só͘-ū ê lâng tú thiàⁿ kah chin kan-khó͘ ê sî, Ngá-kok nn̄g ê kiáⁿ, Tí-ná ê hiaⁿ-ko Se-biān kap Lī-bī, lóng gia̍h to, thàn in bô hông-pī, ji̍p-siâⁿ thâi-sí lóng-chóng ê ta-po͘-lâng.

26In thâi-sí Hap-boat kap i ê kiáⁿ Sī-kiàm, kā Tí-ná tùi Sī-kiàm ê chhù chhōa--chhut-lâi, chiū lī-khui.

27Ngá-kok kî-tha ê kiáⁿ ūi-tio̍h in sió-bē siū bú-jio̍k, chiū lâi kàu siū thâi ê lâng hia, chhiúⁿ siâⁿ-lāi ê mi̍h-kiāⁿ,

28chiū-sī gû-kûn, iûⁿ-kûn, lû, í-ki̍p siâⁿ-lāi kap chhân-iá só͘-ū--ê.

29In koh chiong só͘-ū ê châi-hù, gín-á kap hū-jîn-lâng, í-ki̍p chhù-lāi só͘-ū ê mi̍h-kiāⁿ lóng chhiúⁿ--khì.

30Ngá-kok kā Se-biān kap Lī-bī kóng, “Lín liân-lūi góa, ōe hāi góa hō͘ chit só͘-chāi ê Ka-lâm -lâng kap Pí-lī-sé -lâng oàn-chhoeh. Koh lán ê lâng chió, in nā liân-ha̍p lâi kong-kek lán, góa kap lán choân-ke lóng ōe bia̍t-bông.”

31In ìn kóng, “In ná thang khoán-thāi goán sió-bē chhin-chhiūⁿ chhiong-ki?”

← Chapter 33 Jump to: Chapter 35 →