Genesis 20

Chinese TTVR (現代台語譯本羅馬字版)

← Chapter 19 Jump to: Chapter 21 →

1A-pek-la-hán tùi hia chiām-chiām sóa-khì Nî-kek-hu, kià-ku tī Ka-te-su kap Su-ní tiong-kan ê Ki-la-ní.

2A-pek-la-hán kóng-kàu i ê bó͘ Sa-la ê sî, lóng kóng “I sī góa ê sió-bē”. Ki-la-ní -ông A-pí-bí-le̍k phài lâng chiong Sa-la chhōa--khì.

3Mî--sî, tī bîn-bāng tiong, Siōng-tè lâi kā A-pí-bí-le̍k kóng, “Lí kai-sí! Lí chhōa--lâi hit-ê hū-jîn-lâng sī pa̍t-lâng ê bó͘.”

4A-pí-bí-le̍k iáu-bē chhin-kūn Sa-la, chiū kóng, “Chú ah, bû-ko͘ ê jîn-bîn lí mā beh siau-bia̍t o͘h?

5Hit-ê lâng kiám m̄-sī ka-kī kóng ‘I sī góa ê sió-bē’? Hit-ê hū-jîn-lâng mā kóng ‘I sī góa ê hiaⁿ-ko’. Góa chòe chit-ê tāi-chì, sī sim toan-chèng, chhiú chheng-khì.”

6Siōng-tè tī A-pí-bí-le̍k ê bîn-bāng tiong tùi i kóng, “Góa chai-iáⁿ lí chòe chit-ê sū sim toan-chèng, só͘-í góa chó͘-tòng lí, chiah bián lí tek-chōe góa; góa put-chún lí bong-tio̍h i.

7Taⁿ, lí tio̍h chiong chit-ê lâng ê bó͘ hêng i. I sī sian-ti, ōe thòe lí kî-tó, hō͘ lí oa̍h--teh. Lí nā m̄ hêng i, lí tio̍h chai, lí kap lí só͘-ū ê lâng it-tēng ōe sí.”

8A-pí-bí-le̍k thàu-chá khí--lâi, tiàu-chi̍p só͘-ū ê jîn-sîn, chiong chiah-ê tāi-chì kóng hō͘ in thiaⁿ; hiah-ê jîn-sîn lóng chin kiaⁿ-hiâⁿ.

9A-pí-bí-le̍k kiò A-pek-la-hán lâi, tùi i kóng, “Lí ná tùi goán chòe chit-khoán tāi-chì? Góa tó-ūi tek-chōe lí? Lí kèng-jiân hō͘ góa kap góa ê jîn-bîn hām-lo̍h tāng-chōe. Lí bô eng-kai tùi góa chòe chit-khoán tāi-chì.”

10A-pí-bí-le̍k koh tùi A-pek-la-hán kóng, “Lí sī-án-chóaⁿ beh chòe chit-ê tāi-chì?”

11A-pek-la-hán ìn kóng, “Góa siūⁿ-kóng chit só͘-chāi ê lâng lóng bô teh kiaⁿ Siōng-tè, ōe in-ūi góa ê bó͘ ê iân-kò͘ kā góa thâi-sí;

12koh i si̍t-chāi sī góa ê sió-bē, kâng-pē bô kâng-bú, āu-lâi chòe góa ê bó͘.

13Tng Siōng-tè kiò góa lī-khui lāu-pē ê ke, sì-kòe phiau-liû ê sî, góa kā góa ê bó͘ kóng, ‘Í-āu lán bô-lūn khì tó-ūi, lí tio̍h kā lâng kóng, góa sī lí ê hiaⁿ-ko. Che sī lí hō͘ góa ê un-chêng.’”

14A-pí-bí-le̍k chiong gû, iûⁿ, po̍k-jîn, lú-pī sàng hō͘ A-pek-la-hán, koh chiong i ê bó͘ Sa-la hêng i.

15A-pí-bí-le̍k koh kóng, “Góa ê tōe lóng tī lí ê bīn-chêng, lí ài tòa tó-ūi chiū thang tòa tī hia.”

16I koh kā Sa-la kóng, “Góa ū hō͘ lí ê hiaⁿ-ko chi̍t-chheng tè gûn, chòe góa tùi lín choân-ke ê pó͘-sióng, chèng-si̍t lí sī chheng-pe̍k.”

17A-pek-la-hán ǹg Siōng-tè kî-tó, Siōng-tè chiū i-hó A-pí-bí-le̍k, i ê bó͘ kap lú-pī, in chiū ōe siⁿ-kiáⁿ.

18In-ūi Siōng Chú ūi-tio̍h A-pek-la-hán ê bó͘ Sa-la ê iân-kò͘, í-keng hō͘ A-pí-bí-le̍k ke-lāi ê hū-jîn-lâng bōe seng-io̍k.

← Chapter 19 Jump to: Chapter 21 →