Genesis 39

Chinese TTVR (現代台語譯本羅馬字版)

← Chapter 38 Jump to: Chapter 40 →

1Iok-sek hō͘ lâng tòa lo̍h-khì Ai-ki̍p; ū chi̍t ê Ai-ki̍p -lâng, chiū-sī Hoat-ló ê jîn-sîn sī-ōe-tiúⁿ Pho-thê-hoa̍t, tùi hiah-ê Í-si̍t-má-lī -lâng chiong Iok-sek bóe--khì.

2Siōng Chú kap Iok-sek tông-chāi, hō͘ i sū-sū sūn-lī; i tòa tī chú-lâng Ai-ki̍p -lâng Pho-thê-hoa̍t in tau.

3I ê chú-lâng khòaⁿ-kìⁿ Siōng Chú kap Iok-sek tông-chāi, koh Siōng Chú hō͘ Iok-sek só͘ chòe ê sū lóng sūn-lī,

4chiū kah-ì Iok-sek, hō͘ Iok-sek tī seng-khu piⁿ ho̍k-sāi. Chú-lâng phài Iok-sek koán-lí i ê ke, chiong só͘-ū--ê lóng siū-koân hō͘ i.

5Tùi hit-sî khai-sí, Siōng Chú in-ūi Iok-sek ê iân-kò͘, sù-hok hō͘ hit-ê Ai-ki̍p -lâng ê ke; Siōng Chú chiok-hok hit-ê Ai-ki̍p -lâng ê ka-têng kap chhân-hn̂g só͘-ū--ê.

6Hit-ê Ai-ki̍p -lâng chiong i it-chhè só͘ ū--ê lóng siū-koân hō͘ Iok-sek; i só͘ chia̍h ê mi̍h í-gōa, i lóng bô teh koán. Iok-sek siⁿ-chòe iân-tâu thé-keh hó.

7Chiah-ê tāi-chì í-āu, Iok-sek ê lú-chú-lâng kā i sái-ba̍k-bé, tùi i kóng, “Lâi kap góa khùn.”

8Iok-sek m̄-khéng, tùi i ê lú-chú-lâng kóng, “Lí chai, chú-lâng í-keng chiong i só͘-ū--ê kau-tài góa; ū góa tī chia, chú-lâng chiū lóng m̄-bián chhau-hoân.

9Tī chit-ê ke, bô lâng pí góa khah tōa; lí í-gōa, i bô chi̍t hāng bô kau hō͘ góa, in-ūi lí sī i ê bó͘. Án-ni, góa ná thang chòe chit-khoán ke̍k-pháiⁿ ê sū tek-chōe Siōng-tè?”

10Lú-chú-lâng sui-jiân ta̍k-ji̍t án-ni kā Iok-sek ín-iú, m̄-kú Iok-sek m̄-khéng thiaⁿ i ê ōe, lóng bô kap i chòe-hé khùn, mā bô beh kap i chòe-hé.

11Ū chi̍t ji̍t, Iok-sek ji̍p-khì chhù-lāi pān tāi-chì; chhù-lāi lóng bô lâng.

12Lú-chú-lâng khiú i ê saⁿ, kóng, “Lí lâi kap góa khùn.” Iok-sek chiong saⁿ pàng tī i ê chhiú, cháu chhut-khì gōa-bīn.

13Lú-chú-lâng khòaⁿ-tio̍h Iok-sek chiong saⁿ pàng hō͘ i, koh cháu chhut-khì gōa-bīn,

14chiū kiò ke-lāi ê lâng lâi, kā in kóng, “Lín khòaⁿ leh, chú-lâng kā chi̍t ê Hi-pek-lâi -lâng chhōa ji̍p-lâi lán chhù-lāi hì-lāng lán; i lâi góa chia, beh kap góa khùn, góa chiū tōa-siaⁿ hoah.

15I thiaⁿ-tio̍h góa chhut-siaⁿ hoah, chiū chiong i ê saⁿ pàng tī góa chia, cháu chhut-khì gōa-bīn.”

16Hū-jîn-lâng chiong Iok-sek ê saⁿ siu tī i hia, thèng-hāu Iok-sek ê chú-lâng tò--lâi.

17I tùi i ê tiōng-hu kóng chiah-ê tāi-chì, kóng, “Lí tòa-lâi lán chia hit-ê Hi-pek-lâi lô͘-lē ji̍p-lâi góa chia, beh hì-lāng góa;

18góa chi̍t-ē tōa-siaⁿ hoah, i chiū chiong i ê saⁿ pàng tī góa chia, cháu chhut-khì gōa-bīn.”

19Iok-sek ê chú-lâng thiaⁿ-tio̍h i ê bó͘ tùi i kóng “Lí ê lô͘-lē án-ni án-ni tùi-thāi góa”, chiū hui-siông siū-khì.

20Iok-sek ê chú-lâng chiong i koaiⁿ tī teh koaiⁿ ông ê hoān-lâng ê kaⁿ-ga̍k. Tùi án-ni, Iok-sek chiū tī hia chē-kaⁿ.

21M̄-kú Siōng Chú kap Iok-sek tông-chāi, si-un hō͘ i, hō͘ kaⁿ-ga̍k-tiúⁿ kah-ì i.

22Kaⁿ-ga̍k-tiúⁿ chiū chiong kaⁿ-ga̍k lāi-bīn ê hoān-lâng lóng kau hō͘ Iok-sek koán-lí; kaⁿ-ga̍k lāi-bīn só͘-ū ê tāi-chì, lóng sī i teh chhú-lí.

23Só͘-ū kau hō͘ Iok-sek pān-lí ê tāi-chì, kaⁿ-ga̍k-tiúⁿ oân-choân sìn-jīm, in-ūi Siōng Chú kap Iok-sek tông-chāi, hō͘ i sū-sū sūn-lī.

← Chapter 38 Jump to: Chapter 40 →

推荐阅读

注释 Genesis 注释书 → 灵修 Genesis 灵修指南 → 购买此圣经 TTVR (現代台語譯本羅馬字版) 研读本圣经 →