Genesis 16

Chinese TTVR (現代台語譯本羅馬字版)

← Chapter 15 Jump to: Chapter 17 →

1A-pek-lân ê bó͘ Sa-lâi bô siⁿ-kiáⁿ; i ū chi̍t ê lú-pī Hā-kah sī Ai-ki̍p -lâng.

2Sa-lâi kā A-pek-lân kóng, “Siōng Chú hō͘ góa bōe siⁿ. Chhiáⁿ lí kap góa ê lú-pī tâng-pâng, kiám-chhái góa ōe-tàng tùi i tit-tio̍h chi̍t ê hāu-siⁿ.” A-pek-lân thiaⁿ-thàn Sa-lâi ê ōe.

3A-pek-lân ê bó͘ Sa-lâi chiū chiong i ê lú-pī Ai-ki̍p -lâng Hā-kah hō͘ i ê tiōng-hu A-pek-lân chòe bó͘; hit-sî A-pek-lân í-keng tòa tī Ka-lâm -tōe cha̍p nî.

4I kap Hā-kah tâng-pâng, Hā-kah chiū hoâi-īn. Hā-kah chai ka-kī ū-sin, chiū khòaⁿ-khin lú-chú-lâng.

5Sa-lâi kā A-pek-lân kóng, “Góa siū úi-khut lóng sī lí hāi--ê. Góa chiong góa ê lú-pī sàng hō͘ lí chòe bó͘; i chi̍t-ē chai ka-kī ū-sin, chiū khòaⁿ-khin góa. Goān Siōng Chú tī lí góa ê tiong-kan chú-chhî kong-tō.”

6A-pek-lân tùi Sa-lâi kóng, “I sī lí ê lú-pī, lí ōe-tàng chiàu lí ê ì-sù tùi-thāi i.” Sa-lâi kā i khó͘-to̍k, i chiū tô-cháu lī-khui Sa-lâi.

7Siōng Chú ê sù-chiá tī khòng-iá ê chúi-chôaⁿ piⁿ tú-tio̍h Hā-kah; hit-ê chúi-chôaⁿ sī tī beh khì Su-ní ê lō͘-tiong.

8Siōng Chú ê sù-chiá tùi i kóng, “ Sa-lâi ê lú-pī Hā-kah, lí tùi tó-ūi lâi, beh khì tó-ūi?” I kóng, “Góa tùi góa ê lú-chú-lâng Sa-lâi hia tô-cháu--chhut-lâi.”

9Siōng Chú ê sù-chiá tùi i kóng, “Lí tio̍h tńg-khì lí ê lú-chú-lâng hia, sūn-ho̍k i.”

10Siōng Chú ê sù-chiá koh tùi i kóng, “Góa beh hō͘ lí ê hō͘-tāi chōe kah bōe-sǹg--tit.”

11Siōng Chú ê sù-chiá koh tùi i kóng: Taⁿ lí hoâi-īn, beh siⁿ chi̍t ê kiáⁿ; tio̍h kā i hō-miâ kiò-chòe Í-si̍t-má-lī, in-ūi Siōng Chú thiaⁿ-tio̍h lí ê khó͘-chêng.

12I ōe chhin-chhiūⁿ iá-lû; i beh kong-kek lâng, lâng mā beh kong-kek i; i beh kap i ê hiaⁿ-tī chòe tùi-thâu.

13Hā-kah chiū chheng-ho͘ hit-ūi tùi i kóng-ōe ê Siōng Chú chòe “Khòaⁿ-kò͘ ê Siōng-tè”; i kóng, “Góa khòaⁿ-kìⁿ Siōng-tè, góa kèng-jiân iáu oa̍h--teh!”

14Só͘-í chit-ê chíⁿ chiū kiò-chòe Pí-ní La-hái Lâi; chit-ê chíⁿ tī Ka-te-su kap Pa-lia̍t ê tiong-kan.

15Āu-lâi, Hā-kah kā A-pek-lân siⁿ chi̍t ê hāu-siⁿ, A-pek-lân kā i hō-miâ kiò-chòe Í-si̍t-má-lī.

16Hā-kah kā A-pek-lân siⁿ Í-si̍t-má-lī ê sî, A-pek-lân poeh-cha̍p-la̍k hè.

← Chapter 15 Jump to: Chapter 17 →