Genesis 35

Chinese TTVR (現代台語譯本羅馬字版)

← Chapter 34 Jump to: Chapter 36 →

1Siōng-tè kā Ngá-kok kóng, “Lí tio̍h chhut-hoat khì Pek-te̍k-lī, tòa tī hia, koh tī hia ūi Siōng-tè khí chi̍t chō chè-tôaⁿ, chiū-sī lí tô-pī lí ê hiaⁿ-ko Í-sò ê sî, tùi lí hián-hiān hit-ūi Siōng-tè.”

2Ngá-kok chiū kā ke-lāi ê lâng í-ki̍p só͘-ū kun-tè i ê lâng kóng, “Lín tio̍h chiong lín tiong-kan gōa-pang ê sîn-bêng tû-tiāu, mā tio̍h kiat-chēng ka-kī, ōaⁿ-saⁿ.

3Lán tio̍h chhut-hoat lâi-khì Pek-te̍k-lī; góa beh tī hia khí chi̍t chō chè-tôaⁿ hiàn hō͘ Siōng-tè, chiū-sī góa tī hoān-lān ê sî, èng-ún beh chi̍t-lō͘ kap góa tông-chāi Hit-ūi.”

4Tāi-ke chiū chiong in ê hī-kau kap gōa-pang ê sîn-bêng lóng kau hō͘ Ngá-kok; Ngá-kok chiong hiah-ê tâi tī Sī-kiàm ê siōng-chhiū kha.

5In chiū chhut-hoat. Siōng-tè hō͘ chiu-ûi hiah-ê siâⁿ ê lâng tio̍h-kiaⁿ khióng-hông; hiah-ê siâⁿ ê lâng chiū bô tui-jip Ngá-kok ê chèng-kiáⁿ.

6Ngá-kok í-ki̍p só͘-ū kap i chòe-tīn ê lâng lâi kàu Ka-lâm -tōe ê Lō͘-su, chiū-sī Pek-te̍k-lī.

7I tī hia khí chi̍t chō chè-tôaⁿ, chiū kā hit-ê só͘-chāi hō-miâ kiò-chòe I-le̍k Pek-te̍k-lī; in-ūi i tô-pī i ê hiaⁿ-ko ê sî, Siōng-tè tī hia tùi i hián-hiān.

8Lē-pek-ka ê lin-bú Tí-pho-la sí, bâi-chòng tī Pek-te̍k-lī lâm-pêng ê siōng-chhiū kha; só͘-í hit-ê só͘-chāi kiò-chòe A-lûn Pa-kó͘.

9Ngá-kok tùi Bí-soh-put-ta̍t-bí-a tò--lâi í-āu, Siōng-tè koh tùi i hián-hiān, sù-hok hō͘ i.

10Siōng-tè kā i kóng, “Lí ê miâ sī Ngá-kok, taⁿ bô koh án-ni kiò lí; lí beh kiò-chòe Í-sek-lia̍t.” Siōng-tè chiū kā i kái-miâ chòe Í-sek-lia̍t.

11Siōng-tè koh kā i kóng, “Góa sī Choân-lêng ê Siōng-tè; lí tio̍h siⁿ-thòaⁿ, tio̍h ke-thiⁿ; chiong-lâi ū chi̍t kok, m̄-nā ū chi̍t kok, sī chin chōe kok ōe tùi lí chhut, mā ū chōe-chōe kun-ông tùi lí chhut.

12Góa sù hō͘ A-pek-la-hán kap Í-sat ê tōe, mā beh sù hō͘ lí kap lí ê hō͘-tāi.”

13Siōng-tè chiū tùi kap Ngá-kok kóng-ōe ê só͘-chāi chiūⁿ--khì.

14Ngá-kok tī hia chhāi chi̍t ki chio̍h-thiāu, tī hit téng-bīn tò chiú kap kaⁿ-ná-iû hiàn hō͘ Siōng-tè.

15Ngá-kok chiū chiong Siōng-tè kap i kóng-ōe ê só͘-chāi kiò-chòe Pek-te̍k-lī.

16In tùi Pek-te̍k-lī chhut-hoat, lī-khui Í-hoat-tha iáu ū chi̍t chām lō͘ ê sî, Lúi-kiat chhui-chūn, m̄-kú lân-sán.

17Tī i siⁿ kah chin kan-khó͘ ê sî, sán-pô tùi i kóng, “M̄-bián kiaⁿ, lí koh siⁿ hāu-siⁿ lah.”

18I lîm-chiong khùi beh tn̄g ê sî, kā chit-ê gín-á hō-miâ kiò-chòe Piān Gô-nî; m̄-kú gín-á ê lāu-pē kā i hō-miâ kiò-chòe Piān-ngá-bín.

19Lúi-kiat sí, bâi-chòng tī khì Í-hoat-tha ê lō͘-piⁿ; Í-hoat-tha chiū-sī Pek-lī-hêng.

20Ngá-kok tī Lúi-kiat ê bōng-téng khiā bōng-pâi, kàu kin-á-ji̍t iáu tī hia.

21Ngá-kok koh chhut-hoat, khì tòa tī Í-tek-thah.

22Ngá-kok tòa tī Í-tek-thah ê sî, Lū-piān khì kap i lāu-pē ê sòe-î Phek-la chòe-hé khùn; Ngá-kok mā thiaⁿ-tio̍h chit-ê tāi-chì.

23Ngá-kok lóng-chóng ū cha̍p-jī ê kiáⁿ. Lē-a ê kiáⁿ ū Ngá-kok ê tōa-kiáⁿ Lū-piān, í-ki̍p Se-biān, Lī-bī, Iû-tāi, Í-sat-ka, Se-pò͘-lûn;

24Lúi-kiat ê kiáⁿ ū Iok-sek kap Piān-ngá-bín;

25Lúi-kiat ê lú-pī Phek-la ê kiáⁿ ū Tān kap Ná-hut-tha-lī;

26Lē-a ê lú-pī Sek-phà ê kiáⁿ ū Ka-tek kap A-siat. Chiah-ê sī Ngá-kok tī Bí-soh-put-ta̍t-bí-a siⁿ ê kiáⁿ.

27Ngá-kok lâi Ki-lia̍t A-pa ê Bān-lī, i ê lāu-pē Í-sat hia; Ki-lia̍t A-pa chiū-sī Hi-pek-lûn, A-pek-la-hán kap Í-sat bat tī hia kià-ku.

28Í-sat it-seng oa̍h chi̍t-pah poeh-cha̍p hè.

29Í-sat nî-hè lāu, chia̍h tn̂g-hè-siū, pêng-pêng-an-an tńg-khì i ê chó͘-sian hia; i nn̄g ê kiáⁿ Í-sò kap Ngá-kok kā i bâi-chòng.

← Chapter 34 Jump to: Chapter 36 →