Genesis 24 — Chinese TTVR (現代台語譯本羅馬字版)

5Hit-ê koán-ke ìn kóng, “Hit-ê cha-bó͘ gín-á nā m̄-khéng tè góa lâi lán chia, góa kiám thang chiong lí ê kiáⁿ chhōa tńg-khì lí ê kò͘-hiong?”

6A-pek-la-hán kā i kóng, “Lí choa̍t-tùi m̄-thang kā góa ê kiáⁿ chhōa tò-khì hia;

7Siōng Chú — thiⁿ-téng ê Siōng-tè bat chhōa góa lī-khui goán lāu-pē ê ke kap pún-cho̍k ê tōe, koh tùi góa li̍p-sè èng-ún, kóng, ‘Góa beh chiong chit-ê tōe siúⁿ-sù lí ê hō͘-tāi.’ I ōe chhe I ê sù-chiá kā lí ín-chhōa, hō͘ lí thang tùi hia kā góa ê kiáⁿ chhōa-bó͘.

8Hit-ê cha-bó͘ gín-á nā m̄-khéng tè lí lâi, chit-ê chiù-chōa chiū kap lí bô koan-hē; m̄-kú chhian-bān m̄-thang kā góa ê kiáⁿ chhōa tńg-khì hia.”

9Koán-ke chiū chiong chhiú hē tī i ê chú-lâng A-pek-la-hán ê tōa-thúi-ē, ūi-tio̍h chit-ê tāi-chì chiù-chōa.

10Hit-ê koán-ke tùi i chú-lâng ê lo̍k-tô soán cha̍p chiah, koh tòa i chú-lâng ta̍k-khoán ê châi-pó, chhut-hoat khì Bí-soh-put-ta̍t-bí-a, kàu Ná-ho̍k ê siâⁿ.

11I hō͘ lo̍k-tô kūi tī siâⁿ-gōa ê chíⁿ-piⁿ; hit-sî tú-tú hông-hun, hū-lú chhut-lâi chhiūⁿ-chúi.

12I kóng, “Siōng Chú — góa ê chú-lâng A-pek-la-hán ê Siōng-tè, kiû lí si-un hō͘ góa ê chú-lâng A-pek-la-hán, hō͘ góa kin-á-ji̍t ū hó ki-hōe.

13Góa taⁿ khiā tī chíⁿ-piⁿ, siâⁿ-lāi ê cha-bó͘ gín-á chhut-lâi chhiūⁿ-chúi;

14góa nā tùi kî-tiong chi̍t ê cha-bó͘ gín-á kóng ‘Chhiáⁿ pàng-lo̍h lí ê chúi-pân, hō͘ góa lim-chúi’, i nā kóng ‘Chhiáⁿ lim, góa mā beh hō͘ lí ê lo̍k-tô lim’, goān i chiū-sī lí só͘ soán beh hō͘ lí ê po̍k-jîn Í-sat chòe bó͘ ê cha-bó͘ gín-á; án-ni, góa chiū chai lí si-un hō͘ góa ê chú-lâng.”

15Ōe iáu-bē kóng soah, Lē-pek-ka keng-thâu téng hē chúi-pân chhut--lâi; i sī Pí-thó͘-lī ê cha-bó͘-kiáⁿ; Pí-thó͘-lī sī A-pek-la-hán ê sió-tī Ná-ho̍k ê bó͘ Bi̍t-ka ê kiáⁿ.

16Hit-ê cha-bó͘ gín-á bīn-māu hui-siông súi, sī chāi-sek-lú, iáu m̄-bat ū ta-po͘-lâng kap i chòe-hé khùn. I lo̍h-khì chíⁿ-piⁿ, kā chúi-pân tóe-móa chiū khí--lâi.

17Koán-ke cháu-khì tùi i kóng, “Chhiáⁿ lí chiong pân--ni̍h ê chúi chi̍t-sut-á hō͘ góa lim.”

18Cha-bó͘ gín-á kóng, “Sian-siⁿ, chhiáⁿ lim.” I chiū kóaⁿ-kín pàng-lo̍h chúi-pân, khòa tī chhiú--ni̍h, hō͘ hit-ê koán-ke lim.

19Hō͘ koán-ke lim-liáu, koh kóng, “Góa mā beh hō͘ lí ê lo̍k-tô lim kàu pá.”

20I chiū kóaⁿ-kín chiong pân-lāi ê chúi piàⁿ tī chô--ni̍h, koh cháu-khì chíⁿ-piⁿ ūi lo̍k-tô chhiūⁿ-chúi.

21Hit-ê koán-ke chù-ì kā khòaⁿ, tiām-tiām bô kóng-ōe, ài chai Siōng Chú sī m̄-sī ōe hō͘ i ê jīm-bū sūn-lī oân-sêng.

22Lo̍k-tô lim-liáu, hit-ê lâng chiū the̍h chi̍t ê la̍k kong-khek ê kim phīⁿ-khoân, chi̍t tùi chi̍t-pah cha̍p-sì kong-khek ê kim chhiú-khoân hō͘ chit-ê cha-bó͘ gín-á,

23tùi i kóng, “Chhiáⁿ mn̄g, lí sī sím-mi̍h-lâng ê cha-bó͘-kiáⁿ? Lín lāu-pē ê chhù kiám ū só͘-chāi hō͘ goán hioh-mî?”

24Lē-pek-ka chiū kā i kóng, “Góa sī Pí-thó͘-lī ê cha-bó͘-kiáⁿ; goán lāu-pē sī Bi̍t-ka kā Ná-ho̍k siⁿ ê kiáⁿ.

25Goán ū chhiong-chiok ê chháu-liāu bí-niû, mā ū só͘-chāi thang hō͘ lín hioh-mî.”

26Hit-ê koán-ke chiū kūi lo̍h-khì kèng-pài Siōng Chú, kóng,

27“Góa beh chheng-chàn Siōng Chú — góa ê chú-lâng A-pek-la-hán ê Siōng-tè; I it-ti̍t ēng chû-ài sìn-si̍t tùi-thāi góa ê chú-lâng, chi̍t-lō͘ ín-chhōa góa lâi kàu góa ê chú-lâng hiaⁿ-tī ê ke.”

28Cha-bó͘ gín-á cháu--tò-khì, chiong chiah-ê tāi-chì kā in lāu-bú choân-ke ê lâng kóng.

29Lē-pek-ka ū chi̍t ê hiaⁿ-ko La-pan, i chi̍t-ē khòaⁿ-tio̍h in sió-bē sin-chiūⁿ ê phīⁿ-khoân kap chhiú-khoân, koh thiaⁿ-tio̍h Lē-pek-ka kóng “Hit-ê lâng tùi góa kóng án-ni, án-ni”, chiū cháu-khì chíⁿ-piⁿ, kìⁿ hit-ê lâng. I kàu ê sî, hit-ê lâng iáu khiā tī chúi-chíⁿ piⁿ lo̍k-tô hia.

31I kā hit-ê lâng kóng, “Lí sī Siōng Chú sù-hok ê lâng, ná iáu khiā tī gōa-bīn? Chhiáⁿ lâi goán tau. Lí ê pâng-keng kap lo̍k-tô hioh-khùn ê só͘-chāi, góa í-keng chún-pī hó-sè.”

32Hit-ê koán-ke chiū ji̍p-khì La-pan ê chhù. Ū lâng lâi tháu lo̍k-tô chài ê mi̍h-kiāⁿ, ēng chháu-liāu niû-si̍t chhī lo̍k-tô, koh phâng chúi hō͘ hit-ê koán-ke í-ki̍p kap i chòe-hé lâi ê lâng sóe-kha.

33Ū lâng chiong chia̍h-mi̍h pâi tī koán-ke bīn-chêng, beh chhiáⁿ i chia̍h, m̄-kú i kóng, “Thèng-hāu góa chiong góa lâi ê bo̍k-te̍k kóng chheng-chhó, góa chiah chia̍h.” La-pan kóng, “Chhiáⁿ kóng.”

34I chiū kóng, “Góa sī A-pek-la-hán ê po̍k-jîn.

35Siōng Chú ū tōa-tōa sù-hok góa ê chú-lâng, hō͘ i chin hó-gia̍h, koh hō͘ i gû, iûⁿ, kim, gûn, po̍k-jîn, lú-pī, lo̍k-tô kap lû-á.

36Góa ê chú-lâng ê bó͘ Sa-la nî-lāu ê sî, kā i siⁿ chi̍t ê kiáⁿ; góa ê chú-lâng mā chiong i só͘-ū--ê hō͘ chit-ê kiáⁿ.

37Góa ê chú-lâng kah góa chiù-chōa, kóng, ‘M̄-thang kā góa chhōa chia ê Ka-lâm lú-chú chòe sin-pū.

38Lí tio̍h khì góa ê lāu-pē ê ke, góa pún-cho̍k hia, kā góa ê kiáⁿ chhōa chi̍t ê bó͘.’

39Góa tùi góa ê chú-lâng kóng, ‘Hit-ê cha-bó͘ gín-á nā m̄-khéng tè góa lâi lán chia, beh án-chóaⁿ?’

40I chiū kā góa kóng, ‘Góa ho̍k-sāi ê Siōng Chú ōe chhe I ê sù-chiá kap lí chòe-hé khì, hō͘ lí chi̍t-lō͘ sūn-lī, lí chiū thang tùi góa ê chong-cho̍k, goán lāu-pē ê ke, kā góa ê kiáⁿ chhōa-bó͘.

41Lí nā ū khì kàu góa pún-cho̍k hia, chiū sǹg ū chiàu chiù-chōa chòe; bān-it in m̄ chiong hit-ê cha-bó͘ gín-á kau hō͘ lí, chit-ê chiù-chōa chiū kap lí bô koan-hē.’

42“Kin-á-ji̍t góa kàu chíⁿ-piⁿ, kî-tó kóng: Siōng Chú — góa chú-lâng A-pek-la-hán ê Siōng-tè, kiû lí hō͘ góa chi̍t-lō͘ sūn-lī.

43Góa taⁿ khiā tī chíⁿ-piⁿ, tùi chhut-lâi chhiūⁿ-chúi ê chi̍t ê cha-bó͘ gín-á kóng ‘Chhiáⁿ lí chiong chúi-pân ê chúi chi̍t-sut-á hō͘ góa lim’,

44i nā kóng ‘Chhiáⁿ lim, góa mā beh hō͘ lí ê lo̍k-tô lim’, goān i chiū-sī Siōng Chú só͘ soán beh hō͘ góa chú-lâng ê kiáⁿ chòe bó͘ ê cha-bó͘ gín-á.

45Góa sim-lāi ê ōe kóng iáu-bē liáu, Lē-pek-ka chiū chhut--lâi, keng-thâu téng hē chúi-pân; lo̍h-khì chíⁿ-piⁿ chhiūⁿ-chúi; góa kā i kóng, ‘Chhiáⁿ lí hō͘ góa lim.’

46I chiū kóaⁿ-kín tùi keng-thâu téng pàng-lo̍h chúi-pân, kóng, ‘Chhiáⁿ lim, góa mā beh hō͘ lí ê lo̍k-tô lim.’ Góa chiū lim, i mā hō͘ góa ê lo̍k-tô lim.

47Góa koh mn̄g i, ‘Lí sī sím-mi̍h-lâng ê cha-bó͘-kiáⁿ?’ I kóng, ‘Góa sī Pí-thó͘-lī ê cha-bó͘-kiáⁿ; goán lāu-pē sī Bi̍t-ka kā Ná-ho̍k siⁿ ê kiáⁿ.’ Góa chiū chiong phīⁿ-khoân kòa tī i ê phīⁿ, chhiú-khoân kòa tī i ê chhiú.

48Góa kūi lo̍h-khì kèng-pài Siōng Chú, chheng-chàn Siōng Chú — góa ê chú-lâng A-pek-la-hán ê Siōng-tè, in-ūi I ín-chhōa góa chi̍t-lō͘ sūn-lī, hō͘ góa chhē-tio̍h góa chú-lâng ê sió-tī ê cha-bó͘-sun lâi hō͘ i chòe sin-pū.

49Taⁿ lín nā beh ēng chû-ài sìn-si̍t tùi-thāi góa ê chú-lâng, chiū kā góa kóng; nā m̄, mā kā góa kóng, hō͘ góa thang koat-tēng koh-lâi beh án-chóaⁿ.”

50La-pan kap Pí-thó͘-lī ìn kóng, “Chit-ê tāi-chì kì-jiân Siōng Chú án-ni an-pâi, goán bōe-tàng tùi lí kóng sím-mi̍h.

51Taⁿ, Lē-pek-ka tī chia, lí thang chhōa i khì, chiàu Siōng Chú ê an-pâi, hō͘ lí ê chú-lâng ê kiáⁿ chòe bó͘.”

52A-pek-la-hán ê koán-ke thiaⁿ-tio̍h chiah-ê ōe, chiū phak tī thô͘-kha kèng-pài Siōng Chú.

53Hit-ê koán-ke khí--lâi, the̍h kim-khì, gûn-khì, kap i-ho̍k sàng Lē-pek-ka, koh chiong kùi-tiōng ê lé-mi̍h sàng hō͘ i ê hiaⁿ-ko kap lāu-bú.

54Hit-ê koán-ke kap tè i ê lâng chit-sî chiah lim-chia̍h hioh-mî. Keh-ji̍t thàu-chá, koán-ke tùi in kóng, “Chhiáⁿ hō͘ góa tò-khì góa ê chú-lâng hia.”

55Lē-pek-ka ê hiaⁿ-ko kap lāu-bú kóng, “Chhiáⁿ hō͘ cha-bó͘ gín-á kap goán tòa kúi-ji̍t-á, siōng chió cha̍p ji̍t, i chiah kap lín khì.”

56I tùi in kóng, “Chhiáⁿ m̄-thang kā góa lâu. Siōng Chú í-keng hō͘ góa chi̍t-lō͘ sūn-lī, chhiáⁿ hō͘ góa kóaⁿ-kín tò-khì góa ê chú-lâng hia.”

57In kóng, “Goán kiò cha-bó͘ gín-á lâi, thàm i ê ōe-ì.”

58In chiū kiò Lē-pek-ka lâi, mn̄g i kóng, “Lí kiám beh kap chit-ê koán-ke chòe-hé khì?” Lē-pek-ka ìn kóng, “Góa beh.”

59In chiū sàng sió-bē Lē-pek-ka kap i ê lin-bú, tè A-pek-la-hán ê koán-ke kap kun-sûi i ê lâng khì.

60In kā Lē-pek-ka chiok-hok, kóng: Goán ê sió-bē, goān lí ê kiáⁿ-sun chheng-chheng-bān-bān; goān lí ê hō͘-tāi chiàm-léng tùi-te̍k ê siâⁿ.

61Lē-pek-ka kap i ê lú-pī khiâ lo̍k-tô tè hit-ê koán-ke khì; koán-ke chiū chhōa Lē-pek-ka tńg--khì.

62Hit-sî, Í-sat sóa-khì Pí-ní La-hái Lâi, tòa tī Nî-kek-hu.

63Hông-hun ê sî, Í-sat chhut-lâi iá-gōa sàn-pō͘, gia̍h-thâu chi̍t-ē khòaⁿ, khòaⁿ-tio̍h lo̍k-tô teh lâi.

64Lē-pek-ka khòaⁿ-tio̍h Í-sat, chiū tùi lo̍k-tô lo̍h--lâi.

65I mn̄g hit-ê koán-ke kóng, “Tī iá-tōe ǹg lán chia kiâⁿ--lâi-ê sī sím-mi̍h-lâng?” Hit-ê koán-ke kóng, “Sī góa ê chú-lâng.” Lē-pek-ka chiū ēng phè jia bīn.

66Koán-ke chiong i só͘ chòe ê tāi-chì lóng kā Í-sat pò-kò.

67Í-sat chiū khan Lē-pek-ka ji̍p-khì i ê lāu-bú Sa-la ê pò͘-pîⁿ, chhōa i chòe bó͘. Í-sat chin thiàⁿ Lē-pek-ka; i tùi lāu-bú sí liáu-āu, kàu chit-sî chiah tit-tio̍h an-ùi.