Genesis 42

Chinese TTVR (現代台語譯本羅馬字版)

← Chapter 41 Jump to: Chapter 43 →

1Ngá-kok thiaⁿ-tio̍h Ai-ki̍p ū ngó͘-kok, chiū kā i hiah-ê kiáⁿ kóng, “Lín sī-án-chóaⁿ iáu-teh sio-siòng.”

2Koh kóng, “Góa thiaⁿ-tio̍h Ai-ki̍p ū ngó͘-kok, lín tio̍h lo̍h-khì hia, bóe chi̍t-kóa niû-si̍t, hō͘ lán thang tō͘-oa̍h, chiah bián sí.”

3Iok-sek cha̍p ê hiaⁿ-ko chiū lóng lo̍h-khì Ai-ki̍p bóe bí-niû.

4M̄-kú Ngá-kok bô hō͘ Iok-sek ê sió-tī Piān-ngá-bín kap in hiaⁿ-ko chòe-hé khì, in-ūi i kiaⁿ Piān-ngá-bín tú-tio̍h siong-hāi.

5Ngá-kok ê kiáⁿ kap hiah-ê lâi bóe bí-niû ê lâng chòe-hé lâi, in-ūi Ka-lâm -tōe mā ū ki-hng.

6Hit-sî teh tī-lí Ai-ki̍p -tōe--ê sī Iok-sek, bōe bí-niû hō͘ hit só͘-chāi ê jîn-bîn--ê, mā-sī i; Iok-sek hiah-ê hiaⁿ-ko lâi, phak-lo̍h pài i.

7Iok-sek khòaⁿ-tio̍h i ê hiaⁿ-ko, ōe-jīn-tit in, m̄-kú ké m̄ bat, ēng giâm-hat ê kháu-khì mn̄g in, “Lín tùi tó-ūi lâi?” In ìn kóng, “Goán tùi Ka-lâm -tōe lâi beh bóe bí-niû.”

8Iok-sek ōe-jīn-tit i hiah-ê hiaⁿ-ko, m̄-kú in bōe-jīn-tit i.

9Iok-sek siūⁿ-khí í-chêng bāng-kìⁿ koan-hē in ê bāng, chiū tùi in kóng, “Lín sī cheng-thàm, lâi thàm-cha goán chia bô siat-hông ê só͘-chāi.”

10In tùi Iok-sek kóng, “Goán ê chú, m̄-sī án-ni, lí ê po̍k-jîn sī lâi beh bóe niû-si̍t.

11Goán lóng kâng lāu-pē, sī láu-si̍t-lâng; lí ê po̍k-jîn m̄-sī cheng-thàm.”

12Iok-sek kā in kóng, “M̄-sī! Lín lâi sī beh thàm-cha goán chia bô siat-hông ê só͘-chāi.”

13In kóng, “Lí ê po̍k-jîn lóng-chóng ū cha̍p-jī ê hiaⁿ-tī, kâng lāu-pē, tòa tī Ka-lâm -tōe; siōng-sòe--ê hiān-chāi kap goán lāu-pē chòe-hé; ū chi̍t ê bô--khì lah.”

14Iok-sek kā in kóng, “Góa tú-chiah kóng lín sī cheng-thàm, si̍t-chāi bô m̄-tio̍h.

15Góa ài lín chèng-bêng lín sī láu-si̍t. Góa kí Ai-ki̍p -ông ê sìⁿ-miā chiù-chōa, lín soah-bé sió-tī nā bô chhōa-lâi chia, lín it-tēng bōe-tàng lī-khui chit-ê só͘-chāi.

16Lín tio̍h phài chi̍t ê tńg-khì chhōa lín sió-tī lâi, kî-tha--ê lóng koaiⁿ tī chia, án-ni chèng-bêng lín ū láu-si̍t; nā bô, góa kí Ai-ki̍p -ông ê sìⁿ-miā chiù-chōa, lín khak-si̍t sī cheng-thàm.”

17Iok-sek chiū chiong in koaiⁿ tī kaⁿ--ni̍h saⁿ ji̍t.

18Kàu tē-saⁿ ji̍t, Iok-sek tùi in kóng, “Góa sī kiaⁿ-ùi Siōng-tè ê lâng; lín nā chiàu góa ê ōe chòe, chiū bián sí.

19Lín nā chin-chiàⁿ sī láu-si̍t-lâng, lín hiaⁿ-tī ê tiong-kan tio̍h lâu chi̍t ê koaiⁿ tī kaⁿ--ni̍h, kî-tha ê lâng thang tòa bí-niû tò-khì kiù lín ke-lāi iau-gō ê lâng.

20Lín nā chiong soah-bé sió-tī chhōa-lâi góa chia, chiū thang chèng-bêng lín kóng-ōe láu-si̍t, lín mā bián sí.” In chiū chiàu án-ni chòe.

21In hō͘-siōng kóng, “Lán si̍t-chāi tùi lán ê sió-tī hoān chin tōa ê chōe; lán khòaⁿ-tio̍h i thòng-khó͘ kā lán ai-kiû ê sî, mā bô chhap i, só͘-í lán siū pò-èng, tú-tio̍h chiah tōa ê chai-lān.”

22Lū-piān ìn in kóng, “Góa kiám bô kā lín kóng, m̄-thang siong-hāi hit-ê siàu-liân-lâng, m̄-kú lín lóng m̄ thiaⁿ. Só͘-í lâu i ê huih ê chōe, hiān-chāi teh kā lán thó.”

23In m̄ chai Iok-sek thiaⁿ ū in teh kóng ê ōe, in-ūi tī in ê tiong-kan ū hoan-e̍k-koaⁿ teh hoan-e̍k.

24Iok-sek oa̍t-tńg-sin lī-khui in khì háu, āu-lâi koh tńg-lâi kap in kóng-ōe. Iok-sek tùi in tiong-kan kéng Se-biān, tī in ba̍k-chiu chêng kā i pa̍k--khí-lâi.

25Iok-sek hoan-hù lâng chiong ngó͘-kok kā in ê pò͘-tē tóe-móa-móa, chiong in ta̍k-ê lâng ê gûn hêng in, hē tī in ê tē-á lāi, koh ēng lō͘-tiong su-iàu ê chia̍h-mi̍h hō͘ in; hiah-ê lâng chiū chiàu án-ni chòe.

26Iok-sek ê hiaⁿ-ko chiong bí-niû hē tī lû-á téng, lī-khui hia tò--khì.

27Kàu hioh-mî ê só͘-chāi, in tiong-kan ū chi̍t ê tháu-khui i ê tē-á, beh the̍h chhī-liāu hō͘ lû-á chia̍h, chiah khòaⁿ-tio̍h gûn iáu tī tē-á lāi, hē tī pò͘-tē kháu.

28I chiū kā i ê hiaⁿ-tī kóng, “Lín khòaⁿ! Góa ê gûn koh tò-tńg--lâi, iû-goân tī góa ê tē-á lāi.” In chiū kiaⁿ kah sîn-put-hū-thé, ngia̍uh-ngia̍uh-chhoah, hō͘-siōng kóng, “Siōng-tè ná án-ni tùi-thāi lán?”

29In tò-khì Ka-lâm -tōe, kàu in lāu-pē Ngá-kok hia, chiong tú--tio̍h ê sū lóng kā i kóng,

30“Hit só͘-chāi ê chú-lâng kā goán kóng chin giâm-hat ê ōe, kā goán tòng-chòe sī cheng-thàm.

31Goán kā i kóng, ‘Goán sī láu-si̍t-lâng, m̄-sī cheng-thàm.

32Goán ū cha̍p-jī ê hiaⁿ-tī, lóng kâng lāu-pē; ū chi̍t ê bô--khì, siōng-sòe ê sió-tī hiān-chāi kap goán lāu-pē tī Ka-lâm -tōe.’

33Hit só͘-chāi ê chú-lâng kā goán kóng, ‘Lín nā beh hō͘ góa siong-sìn lín sī láu-si̍t-lâng, lín tio̍h lâu chi̍t ê hiaⁿ-tī tī góa chia, kî-tha ê lâng thang tòa bí-niû tò--khì, kiù lín ke-lāi iau-gō ê lâng;

34lín chhōa soah-bé sió-tī lâi góa chia, góa chiū chai lín m̄-sī cheng-thàm, sī láu-si̍t-lâng; án-ni, góa chiū chiong lín ê hiaⁿ-tī kau hêng lín, lín mā thang tī chia chū-iû hêng-tōng.’”

35Āu-lâi, in chiong in ê tē-á tò--chhut-lâi, bô phah-sǹg, in ta̍k-ê lâng ê chîⁿ-tē-á lóng tī in ê pò͘-tē lāi; in kap in lāu-pē khòaⁿ-tio̍h chîⁿ-tē-á lóng kiaⁿ-chi̍t-tiô.

36In ê lāu-pē Ngá-kok kā in kóng, “Lín hō͘ góa sit-khì góa ê kiáⁿ; Iok-sek bô--khì, Se-biān mā bô--khì, lín koh beh chhōa Piān-ngá-bín khì. Chiah-ê tāi-chì ná ōe lóng hoat-seng tī góa sin-chiūⁿ!”

37Lū-piān kā i ê lāu-pē kóng, “Góa nā bô chhōa Piān-ngá-bín tò-lâi kau hō͘ lí, lí thang thâi góa nn̄g ê kiáⁿ. Chòe lí chiong Piān-ngá-bín kau-tài góa, góa it-tēng ōe kā i chhōa tò-lâi hō͘ lí.”

38Ngá-kok kóng, “Góa bô beh hō͘ góa ê kiáⁿ kap lín khì; i ê hiaⁿ-ko í-keng sí, chí-ū chhun i chi̍t ê. I nā tī lō͘-tiong tú-tio̍h chai-hāi, chiū-sī lín hāi góa pe̍h-thâu-mn̂g chhiⁿ-chhám lo̍h Im-kan.”

← Chapter 41 Jump to: Chapter 43 →