Genesis 21

Chinese TTVR (現代台語譯本羅馬字版)

← Chapter 20 Jump to: Chapter 22 →

1Siōng Chú chiàu I í-chêng só͘ kóng ê ōe koàn-kò͘ Sa-la, si̍t-hiān I tùi Sa-la ê èng-ún.

2A-pek-la-hán nî-lāu, kàu Siōng-tè tùi i kóng ê ji̍t-kî, Sa-la hoâi-īn, kā i siⁿ chi̍t ê hāu-siⁿ.

3A-pek-la-hán kā Sa-la ūi i siⁿ ê kiáⁿ hō-miâ kiò-chòe Í-sat.

4Í-sat chhut-sì tē-poeh ji̍t, A-pek-la-hán chiàu Siōng-tè ê bēng-lēng, kā Í-sat kiâⁿ kat-lé.

5Í-sat chhut-sì ê sî, A-pek-la-hán tú-tú chi̍t-pah hè.

6Sa-la kóng, “Siōng-tè hō͘ góa hoaⁿ-hí chhiò; só͘-ū thiaⁿ-tio̍h góa siⁿ-kiáⁿ ê lâng, mā ōe kap góa chòe-hé chhiò.”

7Koh kóng, “Siáⁿ-lâng ōe-tàng sū-sian kā A-pek-la-hán kóng ‘ Sa-la ōe hō͘ gín-á chia̍h-lin’? M̄-kú tī A-pek-la-hán nî-lāu ê sî, góa kā i siⁿ chi̍t ê kiáⁿ.”

8Gín-á chiām-chiām tōa-hàn, chiū tn̄g-lin. Í-sat tn̄g-lin hit-ji̍t, A-pek-la-hán pān-toh chhiáⁿ lâng-kheh.

9Ū chi̍t ji̍t, Sa-la khòaⁿ-tio̍h Ai-ki̍p -lâng Hā-kah ê kiáⁿ Í-si̍t-má-lī teh kā i ê kiáⁿ Í-sat kún-chhiò,

10chiū tùi A-pek-la-hán kóng, “Tio̍h kā chit-ê lú-pī kap i ê kiáⁿ kóaⁿ--chhut-khì; in-ūi lú-pī ê kiáⁿ bōe-tàng kap góa ê kiáⁿ Í-sat chòe-hé kè-sêng ke-gia̍p.”

11Chit-hāng tāi-chì hō͘ A-pek-la-hán hui-siông khó͘-náu, in-ūi Í-si̍t-má-lī mā-sī i ê kiáⁿ.

12Siōng-tè kā A-pek-la-hán kóng, “Lí m̄-thang ūi-tio̍h Í-si̍t-má-lī kap lí ê lú-pī Hā-kah khó͘-náu. Sa-la tùi lí kóng ê ōe, lí tio̍h thiaⁿ, in-ūi tùi Í-sat siⁿ--ê, chiah beh chheng-chòe lí ê hō͘-tāi.

13Kóng-tio̍h lí ê lú-pī ê kiáⁿ Í-si̍t-má-lī, góa mā beh hō͘ i chiâⁿ-chòe chi̍t kok, in-ūi i mā-sī lí siⁿ--ê.”

14A-pek-la-hán thàu-chá khí--lâi, the̍h piáⁿ kap chi̍t phê-tē ê chúi hō͘ Hā-kah, hē tī i ê keng-thâu téng, kiò i kap gín-á lóng chhut--khì. Hā-kah chiū chhut--khì, kàu Pia̍t-sī-pa ê khòng-iá soah bê-lō͘.

15Phê-tē lāi ê chúi lim-liáu, Hā-kah chiū chiong gín-á pàng tī sòe châng chhiū-kha.

16I ka-kī kiâⁿ lī-khui, tāi-iok ū siā chi̍t ki chìⁿ ê hn̄g, kap gín-á saⁿ-tùi-bīn chē--teh. I kóng, “Góa m̄-kam khòaⁿ gín-á sí.” I chē tī gín-á ê tùi-bīn, chhut-siaⁿ tōa thî-khàu.

17Siōng-tè thiaⁿ-tio̍h gín-á ê siaⁿ; Siōng-tè ê sù-chiá tùi thiⁿ kiò Hā-kah, kóng, “ Hā-kah, lí sī-án-chóaⁿ leh? M̄-bián kiaⁿ! Siōng-tè í-keng thiaⁿ-tio̍h gín-á teh háu ê siaⁿ.

18Khí--lâi, mā kā lí ê gín-á phō--khí-lâi; góa beh hō͘ i chiâⁿ-chòe tōa-kok.”

19Siōng-tè khui Hā-kah ê ba̍k-chiu, i chiū khòaⁿ-tio̍h chúi-chíⁿ. Hā-kah khì kàu chíⁿ-piⁿ, chiong phê-tē ji̍p-chúi ji̍p kàu móa, koh hō͘ gín-á lim.

20Siōng-tè kap gín-á tông-chāi; i chiām-chiām tōa-hàn, tòa tī khòng-iá, chiâⁿ-chòe chin gâu siā-chìⁿ ê lâng.

21I tòa tī Pa-lân ê khòng-iá; i ê lāu-bú tùi Ai-ki̍p kā i chhōa chi̍t ê bó͘.

22Hit-sî, A-pí-bí-le̍k kap i ê kun-tiúⁿ Hui-kok lâi kā A-pek-la-hán kóng, “Lí bô-lūn chòe sím-mi̍h, Siōng-tè lóng kā lí chiok-hok.

23Lí hiān-chāi tio̍h kí Siōng-tè tùi góa chiù-chōa, m̄-thang khi-hū góa, góa ê kiáⁿ, kap góa ê hō͘-tāi; góa án-chóaⁿ hó khoán-thāi lí, lí mā tio̍h án-ni hó khoán-thāi góa, í-ki̍p lí só͘ kià-ku chit-ê tōe.”

24A-pek-la-hán kóng, “Hó, góa chiù-chōa.”

25Í-chêng A-pí-bí-le̍k ê po̍k-jîn bat pà-chiàm chi̍t kháu chúi-chíⁿ, A-pek-la-hán ūi-tio̍h chit-ê tāi-chì chek-pī A-pí-bí-le̍k.

26A-pí-bí-le̍k kóng, “Siáⁿ-lâng chòe chit-ê tāi-chì, góa m̄ chai; lí mā m̄-bat kā góa kóng, kin-á-ji̍t góa chiah chai.”

27A-pek-la-hán chiū chiong gû kap iûⁿ sàng hō͘ A-pí-bí-le̍k; nn̄g ê lâng chiū li̍p-iok.

28A-pek-la-hán koh chiong chhit chiah bú ê iûⁿ-ko lēng-gōa ûi tī pa̍t-ê só͘-chāi.

29A-pí-bí-le̍k mn̄g A-pek-la-hán kóng, “Lí chiong chhit chiah bú ê iûⁿ-ko lēng-gōa ûi--teh, sī sím-mi̍h ì-sù?”

30A-pek-la-hán ìn kóng, “Lí tio̍h chiap-siū góa chit chhit chiah bú ê iûⁿ-ko, chèng-si̍t chit-kháu chíⁿ sī góa ó͘--ê.”

31Só͘-í hit-ê só͘-chāi kiò-chòe Pia̍t-sī-pa, in-ūi in nn̄g ê lâng tī hia li̍p-iok.

32In tī Pia̍t-sī-pa li̍p-iok; A-pí-bí-le̍k chiū kap i ê kun-tiúⁿ Hui-kok tńg-khì Hui-lī-sū -tōe.

33A-pek-la-hán tī Pia̍t-sī-pa chai chi̍t châng liú-chhiū, koh tī hia kiû-kiò Siōng Chú — éng-oa̍h Siōng-tè ê miâ.

34A-pek-la-hán tī Hui-lī-sū -lâng ê tōe kià-ku chin kú.

← Chapter 20 Jump to: Chapter 22 →