Genesis 28

Chinese TTVR (現代台語譯本羅馬字版)

← Chapter 27 Jump to: Chapter 29 →

1Í-sat kiò Ngá-kok lâi, kā i chiok-hok, hoan-hù i kóng, “Lí m̄-thang chhōa Ka-lâm ê cha-bó͘ gín-á chòe bó͘.

2Lí sûi-sî khì Bí-soh-put-ta̍t-bí-a, khì lín gōa-kong Pí-thó͘-lī hia, chhōa lín bú-kū La-pan ê cha-bó͘-kiáⁿ chòe bó͘.

3Goān Choân-lêng ê Siōng-tè sù-hok lí, hō͘ lí ê hō͘-tāi ke-thiⁿ ke̍k-kî chōe, chiâⁿ-chòe chin chōe cho̍k.

4Goān Siōng-tè chiong I beh hō͘ A-pek-la-hán ê hok-khì sù hō͘ lí kap lí ê hō͘-tāi, hō͘ lí sêng-chiap lí hiān-chāi kià-ku ê tōe chòe sán-gia̍p, chiū-sī Siōng-tè hō͘ A-pek-la-hán ê tōe.”

5Í-sat kiò Ngá-kok chhut-hoat, Ngá-kok chiū khì Bí-soh-put-ta̍t-bí-a, A-lân -lâng Pí-thó͘-lī ê kiáⁿ La-pan hia; La-pan sī Lē-pek-ka ê hiaⁿ-ko, Ngá-kok kap Í-sò ê bú-kū.

6Í-sò khòaⁿ-tio̍h Í-sat kā Ngá-kok chiok-hok, kiò i khì Bí-soh-put-ta̍t-bí-a, tùi hia chhōa-bó͘; koh thiaⁿ-tio̍h Í-sat chiok-hok Ngá-kok ê sî, hoan-hù i m̄-thang kap Ka-lâm ê cha-bó͘ gín-á kiat-hun;

7koh khòaⁿ-tio̍h Ngá-kok thiaⁿ pē-bú ê ōe khì Bí-soh-put-ta̍t-bí-a,

8chiū chai i ê lāu-pē Í-sat bô kah-ì i chhōa Ka-lâm ê cha-bó͘ gín-á chòe bó͘.

9Í-sò chiū khì Í-si̍t-má-lī hia, tī i hiah-ê bó͘ í-gōa koh chhōa Má-hap-la; Má-hap-la sī A-pek-la-hán ê kiáⁿ Í-si̍t-má-lī ê cha-bó͘-kiáⁿ, Nî-pài-iok ê sió-bē.

10Ngá-kok lī-khui Pia̍t-sī-pa, beh khì Hap-lân.

11Kàu chi̍t ê só͘-chāi, in-ūi ji̍t lo̍h, chiū tī hia hioh-mî; i the̍h chi̍t tè chio̍h-thâu chòe chím-thâu, tī hia khùn.

12I bāng-kìⁿ ū chi̍t ê thui chhāi tī tōe--ni̍h, thui ê téng-bīn tú-thiⁿ, ū Siōng-tè ê sù-chiá tī thui--ni̍h khí-khí-lo̍h-lo̍h.

13Hit-sî, Siōng Chú khiā tī thui-téng, kóng, “Góa sī Siōng Chú — lí ê a-kong A-pek-la-hán ê Siōng-tè, mā-sī Í-sat ê Siōng-tè. Góa beh chiong lí hiān-chāi khùn ê tōe siúⁿ-sù lí kap lí ê hō͘-tāi.

14Lí ê hō͘-tāi ōe chhin-chhiūⁿ tōe-chiūⁿ ê thô͘-soa hiah-ni̍h chōe; lí ōe ǹg tang, sai, lâm, pak hoat-tián; tōe-chiūⁿ bān-cho̍k ōe in-ūi lí kap lí ê hō͘-tāi tit-tio̍h hok-khì.

15Lí bô-lūn khì tó-ūi, góa beh kap lí tông-chāi, pó-hō͘ lí; mā beh chhōa lí tò-lâi chit-ê só͘-chāi, lóng bōe pàng-sak lí, ti̍t-kàu góa si̍t-hiān tùi lí kóng ê èng-ún.”

16Ngá-kok tùi bîn-bāng chhíⁿ--khí-lâi, chiū kóng, “Siōng Chú chin-chiàⁿ tī chia, góa kèng-jiân m̄ chai.”

17I chin kiaⁿ, kóng, “Chit-ê só͘-chāi ū-kàu khó-phàⁿ! Chia chin-chiàⁿ sī Siōng-tè ê chhù, sī thiⁿ ê mn̂g.”

18Ngá-kok thàu-chá khí--lâi, chiong i chòe chím-thâu ê chio̍h chhāi chòe thiāu, koh tò iû tī hit téng-bīn.

19I kā hit-ê só͘-chāi hō-chòe Pek-te̍k-lī; chit-ê siâⁿ pún-lâi kiò-chòe Lō͘-su.

20Ngá-kok hē-goān kóng, “Siōng-tè nā kap góa tông-chāi, chi̍t-lō͘ pó-hō͘ góa, koh hō͘ góa ū mi̍h thang chia̍h, ū saⁿ thang chhēng,

21hō͘ góa pêng-an tò-lâi goán lāu-pē ê chhù, góa chiū chun Siōng Chú lí chòe góa ê Siōng-tè.

22Góa chhāi khí-lâi chòe thiāu chit-tè chio̍h-thâu beh chòe Siōng-tè ê chhù. Só͘-ū lí siúⁿ-sù góa--ê, góa it-tēng beh hiàn cha̍p-hūn-chi̍t hō͘ lí.”

← Chapter 27 Jump to: Chapter 29 →