Genesis 18

Chinese TTVR (現代台語譯本羅馬字版)

← Chapter 17 Jump to: Chapter 19 →

1Siōng Chú tī Bān-lī ê siōng-chhiū hia tùi A-pek-la-hán hián-hiān; hit-sî ji̍t tng joa̍h, A-pek-la-hán chē tī pò͘-pîⁿ ji̍p-kháu.

2A-pek-la-hán gia̍h-thâu chù-ì khòaⁿ, khòaⁿ-tio̍h saⁿ ê lâng tī tùi-bīn teh khiā. I chi̍t-ē khòaⁿ--tio̍h, chiū tùi pò͘-pîⁿ-kháu cháu-khì gêng-chiap in,

3phak tī thô͘-kha tùi in kóng, “Góa ê chú, nā bô khì-hiâm, chhiáⁿ tiàm chia sió hioh--chi̍t-ē.

4Chhiáⁿ tiàm chhiū-á kha hioh-khùn, tán góa the̍h chi̍t-kóa chúi hō͘ lín sóe-kha,

5the̍h tām-po̍h piáⁿ hō͘ lín ke-thiⁿ goân-khì, āu-lâi chiah koh kè-sio̍k kiâⁿ. Lín kì-jiân lâi kàu po̍k-jîn chia, chhiáⁿ chiap-siū góa ê khoán-thāi.” In kóng, “Chiàu lí kóng--ê khì chòe.”

6A-pek-la-hán kóaⁿ-kín ji̍p-khì pò͘-pîⁿ, kā Sa-la kóng, “Lí kóaⁿ-kín nóa saⁿ táu iù mī-hún, chòe piáⁿ.”

7A-pek-la-hán koh cháu-khì gû-kûn hia, khan chi̍t chiah chíⁿ koh hó ê gû-á-kiáⁿ, kau hō͘ siàu-liân po̍k-jîn kóaⁿ-kín khì chún-pī.

8A-pek-la-hán koh the̍h chhì-jù, gû-lin, kap liāu-lí hó ê gû-á-kiáⁿ lâi, pâi tī chit saⁿ ê lâng ê bīn-chêng; ka-kī tī chhiū-kha kā in sū-hāu, in chiū chia̍h.

9In mn̄g i, “Lí ê bó͘ Sa-la tī tó-ūi?” I kóng, “Tī pò͘-pîⁿ lāi.”

10In tiong-kan ê chi̍t ê kóng, “Mê-nî chit-ê sî-chūn góa it-tēng ōe koh lâi lí chia; lí ê bó͘ Sa-la ōe siⁿ chi̍t ê hāu-siⁿ.” Sa-la tī hit-ê lâng āu-bīn ê pò͘-pîⁿ-kháu ū thiaⁿ-tio̍h chiah-ê ōe.

11A-pek-la-hán kap Sa-la í-keng lāu; Sa-la í-keng bô ge̍h-keng.

12Sa-la sim-lāi chhiò kóng, “Góa í-keng soe-lám, góa ê chú-lâng mā lāu lah, kiám iáu ū chit-khoán hoaⁿ-hí ê tāi-chì?”

13Siōng Chú tùi A-pek-la-hán kóng, “ Sa-la sī-án-chóaⁿ thau-thau-á chhiò kóng, ‘Góa í-keng lāu, kiám ū-iáⁿ ōe siⁿ-kiáⁿ?’

14Siōng Chú kiám ū bōe-tàng chòe ê tāi-chì? Kàu mê-nî chit-ê sî, góa ōe koh lâi lí chia, Sa-la ōe siⁿ chi̍t ê kiáⁿ.”

15Sa-la kiaⁿ, m̄-káⁿ sêng-jīn, kóng, “Góa bô chhiò.” Hit-ê lâng kóng, “Ū, lí chin-chiàⁿ ū chhiò.”

16Hit saⁿ ê lâng tùi hia chhut-hoat khì Só͘-to-má; A-pek-la-hán kap in chòe-hé kiâⁿ, beh sàng in chi̍t chām.

17Siōng Chú kóng, “Góa beh chòe ê tāi-chì, kiám bô beh hō͘ A-pek-la-hán chai?

18A-pek-la-hán it-tēng ōe chiâⁿ-chòe tōa koh kiông ê kok-ka; tōe-chiūⁿ bān-kok beh in-ūi i tit-tio̍h hok-khì.

19Góa kéng-soán i, sī beh hō͘ i bēng-lēng i ê kiáⁿ-sun kap chiong-lâi ê ka-sio̍k, tio̍h chun-siú Siōng Chú ê kà-sī, péng-kong-hêng-gī, thang hō͘ Siōng Chú tùi A-pek-la-hán ê èng-ún lóng si̍t-hiān.”

20Siōng Chú kóng, “ Só͘-to-má kap Gô-mô͘-la chōe-tāi-ok-ke̍k, khòng-kò in ê siaⁿ chin tōa.

21Taⁿ góa beh lo̍h--khì, khòaⁿ in ê só͘-chòe sī m̄-sī chhin-chhiūⁿ góa só͘ thiaⁿ--tio̍h-ê án-ni; nā m̄-sī án-ni, góa mā ōe chai.”

22Tiong-kan nn̄g ê lâng tùi hia oa̍t-tńg-sin khì Só͘-to-má; A-pek-la-hán iáu khiā tī Siōng Chú ê bīn-chêng.

23A-pek-la-hán kiâⁿ chìn-chêng kóng, “Gī-lâng kap pháiⁿ-lâng, lí lóng beh chòe-hé châu-bia̍t sī--bô?

24Siâⁿ-lāi nā ū gō͘-cha̍p ê gī-lâng, lí iû-goân beh châu-bia̍t chit-ê siâⁿ sī--bô? Bô beh ūi-tio̍h siâⁿ-lāi chit gō͘-cha̍p ê gī-lâng sià-bián in sī--bô?

25Lí choa̍t-tùi bōe chòe chit-khoán tāi-chì, chiong gī-lâng kap pháiⁿ-lâng chòe-chi̍t-ē thâi-sí, soah hō͘ gī-lâng kap pháiⁿ-lâng lóng siâng-khoán. Lí choa̍t-tùi bōe. Sím-phòaⁿ choân-tōe ê Chú kiám m̄-sī tio̍h chiàu kong-gī sím-phòaⁿ?”

26Siōng Chú kóng, “Góa nā tī Só͘-to-má siâⁿ-lāi chhē ōe tio̍h gō͘-cha̍p ê gī-lâng, góa chiū ūi-tio̍h in ê iân-kò͘ khoan-sià chit-ê siâⁿ.”

27A-pek-la-hán koh kóng, “Góa put-kò sī hé-hu thô͘-hún, m̄-kú chhiáⁿ iông-ún góa tùi góa ê Chú kóng-ōe.

28Chit gō͘-cha̍p ê gī-lâng nā kiám gō͘ ê, lí kiám beh in-ūi chha gō͘ ê, iû-goân beh châu-bia̍t choân-siâⁿ?” Siōng Chú kóng, “Góa nā tī hia chhē ū sì-cha̍p-gō͘ ê, mā bōe kā i châu-bia̍t.”

29A-pek-la-hán koh tùi I kóng, “Tī hia nā chhē ū sì-cha̍p ê leh?” I kóng, “Ūi-tio̍h chit sì-cha̍p ê ê iân-kò͘, góa mā bōe chòe chit-ê tāi-chì.”

30A-pek-la-hán koh kóng, “Kiû Chú m̄-thang siū-khì. Góa beh koh kóng, tī hia nā chhē ū saⁿ-cha̍p ê leh?” I kóng, “Tī hia nā chhē ū saⁿ-cha̍p ê, góa mā bōe chòe chit-ê tāi-chì.”

31A-pek-la-hán kóng, “Chhiáⁿ iông-ún góa tùi góa ê Chú kóng, tī hia nā chhē ū jī-cha̍p ê leh?” I kóng, “Ūi-tio̍h chit jī-cha̍p ê ê iân-kò͘, góa mā bô beh kā in châu-bia̍t.”

32A-pek-la-hán koh kóng, “Góa ê Chú ah, chhiáⁿ m̄-thang siū-khì, góa koh kóng chòe-āu chi̍t piàn, tī hia nā chhē ū cha̍p ê leh?” I kóng, “Ūi-tio̍h chit cha̍p ê ê iân-kò͘, góa mā bô beh kā in châu-bia̍t.”

33Siōng Chú kap A-pek-la-hán kóng soah, chiū lī-khui. A-pek-la-hán mā tò-khì i ê só͘-chāi.

← Chapter 17 Jump to: Chapter 19 →