Genesis 31 — Chinese TTVR (現代台語譯本羅馬字版)

1Ngá-kok ū thiaⁿ-tio̍h La-pan ê kiáⁿ teh kóng, “ Ngá-kok chiong lán lāu-pē só͘-ū--ê lóng chhiúⁿ--khì, lī-iōng lán lāu-pē ê châi-bu̍t tit-tio̍h it-chhè ê châi-hù.”

5tùi in kóng, “Góa khòaⁿ-tio̍h lín lāu-pē ê thài-tō͘ bô chhin-chhiūⁿ í-chêng hiah-ni̍h hó; m̄-kú góa ê lāu-pē ê Siōng-tè kap góa tông-chāi.

6Lín chai, góa ū chīn góa só͘-ū ê khùi-la̍t thòe lín lāu-pē chòe kang,

7sī lín lāu-pē phiàn góa, bat cha̍p piàn kái-piàn góa ê kang-chîⁿ, m̄-kú Siōng-tè m̄ iông-ún i hāi góa.

8I nā kóng ū-tiám--ê hō͘ góa chòe kang-chîⁿ, iûⁿ-kûn siⁿ--ê chiū lóng ū tiám; i nā kóng ū-tiâu-bûn--ê hō͘ góa chòe kang-chîⁿ, iûⁿ-kûn siⁿ--ê chiū lóng ū tiâu-bûn.

9Án-ni, Siōng-tè chiong lín lāu-pē ê cheng-siⁿ the̍h kè-lâi sù hō͘ góa.

10“Iûⁿ kau-ha̍p ê sî, góa tī bāng-tiong gia̍h-thâu chi̍t-ē khòaⁿ, khòaⁿ-tio̍h phah iûⁿ-bú ê iûⁿ-káng lóng sī ū-tiám, ū-tiâu-bûn, ū-hoe-pan--ê;

11Siōng-tè ê sù-chiá tī bāng-tiong tùi góa kóng, ‘ Ngá-kok.’ Góa kóng, ‘Góa tī chia.’

12I kóng, ‘Lí gia̍h-thâu khòaⁿ, phah iûⁿ-bú ê iûⁿ-káng lóng sī ū-tiám, ū-tiâu-bûn, ū-hoe-pan--ê. La-pan tùi lí só͘ chòe--ê, góa lóng ū khòaⁿ--tio̍h.

13Góa sī Pek-te̍k-lī ê Siōng-tè, lí bat tī hia ēng iû tò tī chio̍h-thiāu téng, tùi góa hē-goān. Taⁿ, lí tio̍h khí--lâi, lī-khui chit-ê só͘-chāi, tò-khì lí ê kò͘-hiong.’”

14Lúi-kiat kap Lē-a ìn i kóng, “Tī goán lāu-pē ê ke, kiám iáu ū goán thang tit ê ke-hé kap sán-gia̍p?

15Goán kiám m̄-sī í-keng hō͘ i khòaⁿ-chòe gōa-lâng? I bōe goán, thun-chia̍h goán ê kè-chîⁿ.

16Siōng-tè tùi goán lāu-pē the̍h--khì hiah-ê châi-bu̍t, chiū-sī goán kap goán ê kiáⁿ ê. Taⁿ, lí tio̍h chiàu Siōng-tè hoan-hù lí--ê khì chòe.”

17Ngá-kok chiū sûi-sî hō͘ i ê kiáⁿ kap bó͘ lóng khiâ lo̍k-tô,

18koh tòa i tī Bí-soh-put-ta̍t-bí-a tit--tio̍h ê cheng-siⁿ kap chek-chū ê châi-bu̍t chhut-hoat, beh tńg-khì Ka-lâm -tōe i ê lāu-pē Í-sat hia.

19Hit-sî La-pan khì chián iûⁿ-mn̂g; Lúi-kiat thau-the̍h in lāu-pē chhù-lāi ê ka-cho̍k-sîn-siōng.

20Ngá-kok bô kā A-lân -lâng La-pan kóng chiū thau-thau-á lī-khui.

21I tòa i it-chhè só͘ ū--ê tô-cháu, chin kín kè Iù-hoat-la-tí-hô, ǹg Ki-lia̍t-soaⁿ khì.

22Kàu tē-saⁿ ji̍t, ū lâng kā La-pan kóng Ngá-kok tô-cháu lah.

23La-pan chiū chhōa i ê chhin-cho̍k chòe-hé khì tui-jip; jip chhit ji̍t, kàu Ki-lia̍t-soaⁿ chiah jip--tio̍h.

24Mî--sî, Siōng-tè tī A-lân -lâng La-pan ê bîn-bāng tiong tùi i hián-hiān, kā i kóng, “Lí tio̍h sòe-jī, m̄-thang kā Ngá-kok kha̍p--tio̍h.”

25La-pan jip-tio̍h Ngá-kok, Ngá-kok í-keng tī Ki-lia̍t-soaⁿ tah pò͘-pîⁿ; La-pan kap i ê chhin-cho̍k mā tī hit-chō soaⁿ tah pò͘-pîⁿ.

26La-pan kā Ngá-kok kóng, “Lí ná ōe chòe chit-khoán tāi-chì? Lí môa-phiàn góa, chiong góa ê cha-bó͘-kiáⁿ chhiúⁿ-cháu, chhin-chhiūⁿ ēng to teh ah hu-ló͘.

27Lí sī-án-chóaⁿ bô kā góa kóng chiū tiām-tiām-á thau-cháu, bô thang hō͘ góa chhiùⁿ-koa, phah-kó͘, tôaⁿ-khîm kā lí hoan-sàng,

28hāi góa soah bô ki-hōe thang chim góa ê sun, góa ê cha-bó͘-kiáⁿ, kap in saⁿ-sî? Lí si̍t-chāi ū-kàu gōng.

29Góa pún-lâi ōe-tàng siong-hāi lín, m̄-kú lín lāu-pē ê Siōng-tè chā-àm tùi góa kóng, ‘Lí tio̍h sòe-jī, m̄-thang kā Ngá-kok kha̍p--tio̍h.’

30Lí siàu-liām lín lāu-pē ê ke, ko͘-put-chiong tio̍h tńg--khì, m̄-kú sī-án-chóaⁿ thau-the̍h góa ê sîn-bêng?”

31Ngá-kok ìn La-pan kóng, “In-ūi góa kiaⁿ lí ōe chiong lí ê cha-bó͘-kiáⁿ chhiúⁿ--khì.

32Lí ê sîn-bêng, lí tùi siáⁿ-lâng chhiau--tio̍h, hit-ê lâng chiū kai-sí. Tī lán chhin-cho̍k ê bīn-chêng, lí jīn-khòaⁿ góa chia ū sím-mi̍h mi̍h-kiāⁿ sī lí ê, lóng the̍h--khì.” Ngá-kok m̄ chai Lúi-kiat ū thau-the̍h hiah-ê sîn-siōng.

33La-pan chiū ji̍p-khì Ngá-kok, Lē-a, kap nn̄g ê lú-pī ê pò͘-pîⁿ, chhiau lóng bô, chiū tùi Lē-a ê pò͘-pîⁿ chhut--lâi, ji̍p-khì Lúi-kiat ê pò͘-pîⁿ.

34Lúi-kiat the̍h hiah-ê sîn-siōng, khǹg tī lo̍k-tô ê oaⁿ-ē, lâng chē tī hit téng-bīn. La-pan tī i ê pò͘-pîⁿ lāi sì-kòe chhiau, mā chhiau lóng bô.

35Lúi-kiat tùi i ê lāu-pē kóng, “Góa keng-kî tú-á kàu, bô hong-piān tī lí ê bīn-chêng khí--lâi; chhiáⁿ hū-chhin tāi-jîn m̄-thang siū-khì.” La-pan sì-kòe chhē sîn-siōng, chhē lóng bô.

36Ngá-kok chiū siū-khì, kap La-pan kè-kàu, kóng, “Góa kiám ū chòe sím-mi̍h m̄-tio̍h, hoān sím-mi̍h chōe, lí kèng-jiân pek góa chiah ân?

37Lí chhiau góa só͘-ū ê mi̍h-kiāⁿ, kiám ū chhiau-tio̍h sím-mi̍h sī lí ê? Nā ū, tio̍h hē tī lán ê chhin-cho̍k bīn-chêng, hō͘ in kā lán nn̄g ê chhâi-koat.

38Góa kap lí tòa chit jī-cha̍p nî ê tiong-kan, lí ê mî-iûⁿ-bú, soaⁿ-iûⁿ-bú m̄-bat làu-the; góa mā m̄-bat chia̍h lí hiah-ê iûⁿ-káng ê bah.

39Hō͘ iá-siù siong-hāi--ê, góa m̄-bat tòa-lâi hō͘ lí, lóng sī góa ka-kī sêng-tam. Iûⁿ bô-lūn ji̍t--sî mî--sî hō͘ lâng thau lia̍h--khì, lí lóng iau-kiû góa pê-siông.

40Góa ji̍t--sî hō͘ ji̍t pha̍k, mî--sî hō͘ sng tàng, siông-siông bô khùn, put-sî lóng án-ni.

41Góa chit jī-cha̍p nî tī lín tau, ūi-tio̍h beh chhōa lí nn̄g ê cha-bó͘-kiáⁿ, kā lí chòe kang cha̍p-sì nî; ūi-tio̍h beh tit-tio̍h lí ê iûⁿ-kûn chòe kang la̍k nî; lí cha̍p piàn kái-piàn góa ê kang-chîⁿ.

42Nā m̄-sī góa ê chó͘-sian A-pek-la-hán ê Siōng-tè, Í-sat só͘ kiaⁿ-ùi ê Siōng-tè, kap góa tông-chāi, lí it-tēng ōe hō͘ góa khang-chhiú lī-khui. Siōng-tè khòaⁿ-kìⁿ góa ê khó͘-chêng kap góa ê lô-lo̍k, chiah tī chā-mî kā lí chek-pī.”

43La-pan ìn Ngá-kok kóng, “Chiah-ê cha-bó͘-kiáⁿ sī góa ê, chiah-ê gín-á sī góa ê, chiah-ê iûⁿ-kûn mā-sī góa ê; lí khòaⁿ--tio̍h-ê, lóng sī góa ê. Góa ê cha-bó͘-kiáⁿ kap in siⁿ ê gín-á, góa kin-á-ji̍t iáu ōe-tàng kā in án-chóaⁿ?

44Taⁿ, lán nn̄g ê lâi li̍p-iok, chòe lí kap góa tiong-kan ê chèng-kù.”

45Ngá-kok chhú chi̍t tè chio̍h, khiā chòe thiāu.

46Ngá-kok tùi hiah-ê chhin-cho̍k kóng, “Lín tio̍h khì khioh chio̍h-thâu lâi chia.” In chiū chiong chio̍h-thâu khioh lâi thia̍p kui-tui. In tī hit-tui chio̍h-thâu ê piⁿ--á lim-chia̍h.

47La-pan chiū chiong hit-tui chio̍h-thâu kiò-chòe I-ka-ní Sat-hap-tō͘-tha; Ngá-kok kā i kiò-chòe Ka-lūi-tek.

48La-pan kóng, “Kin-á-ji̍t chit-ê chio̍h-tui chòe lí góa tiong-kan li̍p-iok ê chèng-kù.” Chit-ê só͘-chāi kiò-chòe Ka-lūi-tek,

49mā kiò-chòe Bí-su-pa, in-ūi La-pan kóng, “Lán hun-khui liáu-āu, goān Siōng Chú tī lí góa ê tiong-kan kàm-chhat.

50Lí nā ge̍k-thāi góa ê cha-bó͘-kiáⁿ, koh lēng-gōa chhōa pa̍t-lâng choh-bó͘, sui-jiân góa m̄ chai, lí tio̍h ōe-kì--tit, Siōng-tè tī lí góa ê tiong-kan choh-chèng.”

51La-pan koh tùi Ngá-kok kóng, “Lí khòaⁿ, góa hē tī lí góa tiong-kan ê chit-tui chio̍h-thâu kap chit-ki chio̍h-thiāu,

52che sī beh choh-chèng thê-chhíⁿ lán, góa bô beh kè chit-tui chio̍h-thâu khì hāi lí, lí mā bōe-ēng-tit kè chit-tui chio̍h-thâu kap chit-ki chio̍h-thiāu lâi hāi góa.

53Goān A-pek-la-hán ê Siōng-tè, Ná-ho̍k ê Siōng-tè, in chó͘-sian ê Siōng-tè, tī lí góa ê tiong-kan chhâi-koat.” Ngá-kok chiū kí in lāu-pē Í-sat só͘ kiaⁿ-ùi ê Siōng-tè chiù-chōa.

54Ngá-kok tī soaⁿ--ni̍h hiàn-chè, chhiáⁿ i hiah-ê chhin-cho̍k chòe-hé lim-chia̍h; in chia̍h-liáu, chiū tī soaⁿ--ni̍h hioh-mî.

55La-pan thàu-chá khí--lâi, chim i ê sun, i ê cha-bó͘-kiáⁿ, kap in saⁿ-sî, kā in chiok-hok, jiân-āu tò-khì ka-kī ê só͘-chāi.