Genesis 3

Chinese TTVR (現代台語譯本羅馬字版)

← Chapter 2 Jump to: Chapter 4 →

1Chú Siōng-tè só͘ chō iá-tōe it-chhè ê tōng-bu̍t, chôa siōng khúi-khiat. Chôa tùi hū-jîn-lâng kóng, “Siōng-tè kiám ū-iáⁿ kóng, hn̂g-lāi só͘-ū ê ké-chí lín lóng bōe-ēng-tit chia̍h?”

2Hū-jîn-lâng tùi chôa kóng, “Hn̂g-lāi só͘-ū ê ké-chí goán lóng thang chia̍h,

3chí-ū hn̂g-tiong hit-châng chhiū ê ké-chí, Siōng-tè bat kóng, ‘Lín m̄-thang chia̍h, mā m̄-thang bong; lín nā m̄ thiaⁿ, lín ōe sí.’”

4Chôa tùi hū-jîn-lâng kóng, “Lín bô it-tēng ōe sí.

5Siōng-tè chai, lín chia̍h ê sî, lín ê ba̍k-chiu chiū ōe khui, ōe chhin-chhiūⁿ Siōng-tè hun-pia̍t siān-ok.”

6Hū-jîn-lâng khòaⁿ hit-châng chhiū ê ké-chí hó-chia̍h, kah-ba̍k, koh ōe hō͘ lâng ū tì-hūi, chiū chin him-siān. I chiū bán hit-ê ké-chí lâi chia̍h, sòa hō͘ kap i chòe-hé ê tiōng-hu chia̍h, i ê tiōng-hu mā chia̍h.

7In nn̄g ê lâng ê ba̍k-chiu chiū khui, chiah chai ka-kī sī chhiah-sin-lō͘-thé, chiū pīⁿ bû-hoa-kó chhiū-hio̍h chòe kûn hâ--teh.

8Hông-hun liâng-léng ê sî, hit-ê lâng kap i ê hū-jîn-lâng thiaⁿ-tio̍h Chú Siōng-tè tī hn̂g-lāi teh kiâⁿ ê siaⁿ, chiū bih tī hn̂g--ni̍h ê chhiū-á lāi, siám-pī Chú Siōng-tè ê bīn.

9Chú Siōng-tè kiò hit-ê lâng, kóng, “Lí tī tó-ūi?”

10Hit-ê lâng chiū kóng, “Góa tī hn̂g-lāi thiaⁿ-tio̍h lí ê siaⁿ chiū chin kiaⁿ, in-ūi góa chhiah-sin-lō͘-thé, chiū bih--khí-lâi.”

11Chú Siōng-tè chiū mn̄g, “Sím-mi̍h-lâng kā lí kóng lí chhiah-sin-lō͘-thé? Lí sī m̄-sī chia̍h góa hoan-hù lí m̄-thang chia̍h hit-châng chhiū ê ké-chí?”

12Hit-ê lâng kóng, “Lí hō͘ góa kap góa chòe-hé hit-ê cha-bó͘-lâng, i the̍h hit-châng chhiū ê ké-chí hō͘ góa, góa chiū chia̍h.”

13Chú Siōng-tè tùi hū-jîn-lâng kóng, “Lí ná ōe án-ni chòe?” Hū-jîn-lâng kóng, “Chôa kā góa ín-iú, góa chiū chia̍h.”

14Chú Siōng-tè tùi chôa kóng, “Lí kì-jiân chòe chit-ê tāi-chì, tī it-chhè ê cheng-siⁿ kap iá-tōe ê cháu-siù, lí te̍k-pia̍t tio̍h siū chiù-chó͘; lí beh ēng pak-tó͘ kiâⁿ-lō͘, it-seng chia̍h thô͘-hún.

15Góa beh hō͘ lí kap hū-jîn-lâng kiat oan-siû, lí ê hō͘-tāi kap i ê hō͘-tāi mā kiat oan-siû; i beh siong lí ê thâu-khak, lí beh siong i ê kha-āu-tiⁿ.”

16Koh tùi hū-jîn-lâng kóng, “Góa beh tōa-tōa ke-thiⁿ lí hoâi-īn ê thòng-khó͘; lí beh chhui-chūn thòng-khó͘ chiah siⁿ-kiáⁿ; lí beh loân-bō͘ lí ê tiōng-hu, i beh koán-hat lí.”

17Chú Siōng-tè mā tùi A-tong kóng, “Lí kì-jiân thiaⁿ-thàn lí ê bó͘ ê ōe, chia̍h góa hoan-hù lí m̄-thang chia̍h hit-châng chhiū ê ké-chí, só͘-í thó͘-tōe in-ūi lí ê iân-kò͘ siū chiù-chó͘; lí tio̍h chi̍t-sì-lâng lô-khó͘, chiah ōe-tàng tùi thó͘-tōe tit-tio̍h chia̍h-mi̍h.

18Thó͘-tōe beh in-ūi lí hoat chhì-phè kap chi̍t-lê; lí beh chia̍h iá-tōe ê chhài-soe.

19Lí tio̍h kōaⁿ-lâu-móa-bīn chiah ū thang chia̍h, kàu lí kui-thó͘, in-ūi lí sī tùi thô͘ lia̍p-chō--ê; lí pún sī thô͘-hún, mā beh kui tī thô͘-hún.”

20Hit-ê lâng kā i ê bó͘ hō-miâ kiò-chòe Hā-oa; in-ūi i sī jîn-lūi ê lāu-bú.

21Chú Siōng-tè ūi-tio̍h A-tong kap i ê bó͘ ēng phê chòe saⁿ hō͘ in chhēng.

22Chú Siōng-tè kóng, “Taⁿ, chit-ê lâng í-keng kap lán siâng-khoán, ōe hun-pia̍t siān-ok; i nā chhun-chhiú khì bán oa̍h-miā-chhiū ê ké-chí lâi chia̍h, chiū ōe oa̍h kàu éng-oán.”

23Chú Siōng-tè chiū chiong i kóaⁿ-chhut I-tiân-hn̂g, hō͘ i khì chèng-choh thó͘-tōe; i sī tùi thô͘ lia̍p-chō--chhut-lâi--ê.

24Chú Siōng-tè chiong hit-ê lâng kóaⁿ--chhut-khì í-āu, tī I-tiân-hn̂g ê tang-pêng siat sì-bīn tńg-se̍h hoat hé-iām ê kiàm, phài thiⁿ-sài ki-lō͘-pek hông-siú khì oa̍h-miā-chhiū ê lō͘.

← Chapter 2 Jump to: Chapter 4 →

推荐阅读

注释 Genesis 注释书 → 灵修 Genesis 灵修指南 → 购买此圣经 TTVR (現代台語譯本羅馬字版) 研读本圣经 →