Genesis 43

Chinese TTVR (現代台語譯本羅馬字版)

← Chapter 42 Jump to: Chapter 44 →

1Ka-lâm tōe-khu ê ki-hng chin giâm-tiōng.

2Ngá-kok hiah-ê kiáⁿ tùi Ai-ki̍p tòa--tńg-lâi ê ngó͘-kok í-keng chia̍h-liáu, in lāu-pē kā in kóng, “Lín koh khì kā lán bóe chi̍t-kóa bí-niû.”

3Iû-tāi tùi i ê lāu-pē kóng, “Hit-ê lâng giâm-giâm kā goán kéng-kò, kóng, ‘Lín nā bô chhōa lín sió-tī lâi, chiū bián siūⁿ-beh kìⁿ góa.’

4Lí nā hō͘ goán sió-tī chòe-hé khì, goán chiū lo̍h-khì kā lí bóe bí-niû.

5Lí nā m̄ hō͘ i kap goán chòe-hé khì, goán chiū bô beh lo̍h--khì; in-ūi hit-ê lâng kā goán kóng, ‘Lín nā bô chhōa lín sió-tī lâi, chiū bián siūⁿ-beh kìⁿ góa.’”

6Ngá-kok kóng, “Lín sī-án-chóaⁿ án-ni hāi góa, kā hit-ê lâng kóng lín iáu ū sió-tī?”

7In ìn kóng, “Hit-ê lâng it-ti̍t kā goán mn̄g goán kap chhin-cho̍k ê tāi-chì, kóng, ‘Lín lāu-pē iáu oa̍h--teh bô? Lín iáu ū hiaⁿ-tī bô?’ Goán lóng chiàu-si̍t kóng, goán ná ōe chai i ōe kóng ‘Tio̍h chhōa lín sió-tī lâi’.”

8Iû-tāi koh kā i ê lāu-pē Ngá-kok kóng, “Lí chiong chit-ê gín-á kau hō͘ góa, goán chiū sûi-sî chhut-hoat, thang hō͘ lán chi̍t ke tōa-sòe lóng oa̍h--lo̍h-khì, bián iau--sí.

9Góa kā i tam-pó, lí thang tùi góa thó lâng; góa nā bô chhōa i tò-lâi kau hō͘ lí, góa goān it-seng taⁿ chit-ê chōe.

10Lán nā bô án-ni iân-tî, goán í-keng tē-jī piàn tò--lâi lah.”

11In lāu-pē Ngá-kok kā in kóng, “Nā sī án-ni, lín tio̍h tòa lán chia siōng-hó ê thó͘-sán: Chi̍t-kóa jú-hiuⁿ kap phang-bi̍t, í-ki̍p hiuⁿ-liāu, bu̍t-io̍h, khai-sim-kó, hēng-jîn, chòe lé-mi̍h, sàng hō͘ hit-ê lâng.

12Lín koh tio̍h tòa têng-pē ê gûn, chiong lín tī pò͘-tē kháu hoat-kiàn ê gûn tòa tńg-khì hêng i; hit-ê khó-lêng sī sit-chhò.

13Lín thang chhōa lín sió-tī chhut-hoat, khì kìⁿ hit-ê lâng.

14Goān Choân-lêng ê Siōng-tè hō͘ lín tit-tio̍h hit-ê lâng lîn-bín, hō͘ lín hit-ê hiaⁿ-tī kap Piān-ngá-bín ōe-tàng tò--lâi; góa nā sit-lo̍h góa ê kiáⁿ, góa mā tio̍h chiap-siū.”

15In chiū tòa hiah-ê lé-mi̍h kap têng-pē ê gûn, koh chhōa Piān-ngá-bín chhut-hoat lo̍h-khì Ai-ki̍p, khiā tī Iok-sek ê bīn-chêng.

16Iok-sek khòaⁿ-tio̍h Piān-ngá-bín kap in chòe-hé lâi, chiū tùi koán-ke kóng, “Chhōa chiah-ê lâng khì chhù-lāi, koh thâi cheng-siⁿ, chún-pī iàn-se̍k; tiong-tàu, chiah-ê lâng beh kap góa chòe-hé chia̍h-pn̄g.”

17Koán-ke chiū chiàu Iok-sek ê hoan-hù khì chòe, chhōa in ji̍p-khì Iok-sek ê chhù-lāi.

18Hiah-ê lâng hō͘ koán-ke chhōa ji̍p-khì Iok-sek ê chhù, chiū chin kiaⁿ-hiâⁿ, kóng, “Chhōa lán lâi chia, it-tēng sī in-ūi thâu chi̍t piàn tī pò͘-tē kháu hêng lán gûn, beh chhē lán ê khang-phāng, hē-chhiú hāi lán, kiông-pek lán chòe lô͘-lē, chhiúⁿ lán ê lû.”

19In chiū kiâⁿ-óa Iok-sek ê koán-ke, tī mn̂g-kháu tùi i

20kóng, “Sian-siⁿ, goán téng-piàn lo̍h--lâi, chin-chiàⁿ sī beh bóe niû-si̍t;

21āu-lâi kàu hioh-mî ê só͘-chāi, khui goán ê tē-á, bô phah-sǹg, goán ta̍k-ê lâng ê gûn goân-hong-put-tōng tī ta̍k-ê lâng ê pò͘-tē kháu; taⁿ goán ū koh tòa-lâi beh hêng lín. Goán lēng-gōa ū koh tòa gûn beh lâi bóe bí-niû.

22Goán m̄ chai sím-mi̍h-lâng chiong goán ê gûn hē tī goán ê pò͘-tē lāi.”

23Hit-ê koán-ke kóng, “Chòe lín an-sim, bián kiaⁿ; sī lín ê Siōng-tè, mā-sī lín lāu-pē ê Siōng-tè, chiong châi-pó khǹg tī lín ê pò͘-tē lāi; lín ê gûn góa í-keng siu--tio̍h.” Jiân-āu i chiū chhōa Se-biān chhut-lâi kau hō͘ in.

24Koán-ke chhōa hiah-ê lâng ji̍p-khì Iok-sek ê chhù, phâng chúi hō͘ in sóe-kha, koh the̍h chháu-liāu chhī in ê lû-á.

25In chiū chún-pī hiah-ê lé-mi̍h, thèng-hāu Iok-sek tiong-tàu tò--lâi; in-ūi in thiaⁿ-tio̍h in beh tī hia chia̍h-pn̄g.

26Iok-sek tò-lâi kàu chhù, in chiū chiong tòa ji̍p-khì chhù-lāi ê lé-mi̍h the̍h chhut-lâi sàng i, koh phak tī thô͘-kha pài i.

27Iok-sek kā in chhéng-an, koh mn̄g in, kóng, “Lín só͘ kóng hit-ê nî-lāu ê lāu-pē ū pêng-an bô? I ū hó-sè hó-sè bô?”

28In ìn kóng, “Lí ê po̍k-jîn goán lāu-pē ū pêng-an, iáu oa̍h--teh.” In chiū àⁿ-thâu pài i.

29Iok-sek gia̍h-thâu khòaⁿ i kâng lāu-bú ê sió-tī Piān-ngá-bín, chiū kóng, “Lín kā góa kóng ê soah-bé sió-tī sī chit-ê sī--bô?” Koh kóng, “Siàu-liân-lâng, goān Siōng-tè si-un hō͘ lí.”

30Iok-sek thiàⁿ sió-tī ê chêng tōa kek-tōng, kóaⁿ-kín beh chhē chi̍t ê só͘-chāi háu, chiū ji̍p-khì i ê pâng-keng thî-khàu.

31Āu-lâi i sóe-bīn liáu chhut--lâi, bián-kióng lún--teh, hoan-hù khui-toh.

32In ūi-tio̍h Iok-sek lēng-gōa pâi chi̍t tè toh, ūi i ê hiaⁿ-tī koh pâi chi̍t-tè, mā ūi hiah-ê kap Iok-sek chòe-hé chia̍h ê Ai-ki̍p -lâng lēng-gōa pâi chi̍t-tè; in-ūi Ai-ki̍p -lâng khòaⁿ kap Hi-pek-lâi -lâng chòe-hé chia̍h-pn̄g chòe kìm-khī.

33Iok-sek ê hiaⁿ-tī chē tī i ê tùi-bīn, in ê chē-ūi chiàu tōa-sòe ê chhù-sū an-pâi; in lóng chin gông-ngia̍h, hō͘-siōng khòaⁿ-lâi-khòaⁿ-khì.

34Iok-sek chiong i bīn-chêng ê chia̍h-mi̍h pun hō͘ in, m̄-kú Piān-ngá-bín tit--tio̍h-ê pí pa̍t-lâng gō͘ pē chōe; in kap Iok-sek chòe-hé lim-chiú iàn-lo̍k.

← Chapter 42 Jump to: Chapter 44 →