Genesis 40

Chinese TTVR (現代台語譯本羅馬字版)

← Chapter 39 Jump to: Chapter 41 →

1Chiah-ê tāi-chì í-āu, Ai-ki̍p -ông ê chiú-chèng-tiúⁿ kap tû-pâng-tiúⁿ tek-chōe in ê chú Ai-ki̍p -ông.

2Ai-ki̍p -ông tùi chit nn̄g ê jîn-sîn hui-siông siū-khì,

3chiong in koaiⁿ tī sī-ōe-tiúⁿ hú-lāi ê kaⁿ, chiū-sī koaiⁿ Iok-sek ê só͘-chāi.

4Sī-ōe-tiúⁿ chiong in kau-tài Iok-sek, Iok-sek chiū sū-hāu in; in tī kaⁿ--ni̍h í-keng ū chi̍t tōaⁿ sî-kan.

5Hō͘ Ai-ki̍p -ông koaiⁿ tī kaⁿ--ni̍h ê chiú-chèng-tiúⁿ kap tû-pâng-tiúⁿ, kâng chi̍t mî kok chòe chi̍t ê bāng; in ê bāng lóng ū bô siâng ê ì-sù.

6Kàu thiⁿ-kng, Iok-sek ji̍p-khì in hia, khòaⁿ-tio̍h in iu-thâu-kat-bīn.

7Iok-sek chiū mn̄g kap i chòe-hé koaiⁿ tī chú-lâng hú-lāi kaⁿ--ni̍h hit nn̄g ê jîn-sîn, kóng, “Kin-á-ji̍t lín ná ōe bīn-tài-iu-iông?”

8In kā i kóng, “Goán nn̄g ê lóng ū bāng-tio̍h bāng, bô lâng ōe-hiáu kā goán kái-bāng.” Iok-sek kā in kóng, “Kái-bāng ê châi-lêng sī Siōng-tè só͘ sù--ê. Chhiáⁿ kā góa kóng lín ê bāng.”

9Chiú-chèng-tiúⁿ chiū tùi Iok-sek kóng i ê bāng, kóng, “Góa bāng-tiong khòaⁿ-kìⁿ tī góa ê bīn-thâu-chêng ū chi̍t châng phû-tô-chhiū;

10chhiū-téng ū saⁿ ki chhiū-oe, phah-m̂, khui-hoe, chiū kiat kui-pha sêng-se̍k ê phû-tô.

11Góa the̍h Ai-ki̍p -ông ê poe, koh the̍h phû-tô, tīⁿ chiap tī poe--ni̍h, chiong poe phâng hō͘ ông.”

12Iok-sek kā i kóng, “Lí ê bāng ê ì-sù sī án-ni: Saⁿ ki chhiū-oe chiū-sī saⁿ ji̍t.

13Saⁿ ji̍t lāi, Ai-ki̍p -ông beh chiong lí tùi kaⁿ-ga̍k chhōa--chhut-khì, kā lí ho̍k-chit; lí beh koh phâng i ê chiú-poe, hôe-ho̍k í-chêng chòe chiú-chèng-tiúⁿ ê chit-ūi.

14Lí heng-thong ê sî, chhiáⁿ lí tio̍h ōe-kì-tit góa, hó khoán-thāi góa; tī ông ê bīn-chêng thòe góa kóng--chi̍t-siaⁿ, kiù góa chhut-kaⁿ.

15Góa si̍t-chāi sī tùi Hi-pek-lâi -lâng ê só͘-chāi hō͘ lâng bōe--lâi-ê; góa tī chia mā bô chòe sím-mi̍h tāi-chì thang hō͘ in kā góa koaiⁿ tī kaⁿ-lô.”

16Tû-pâng-tiúⁿ khòaⁿ-tio̍h Iok-sek kái-bāng kái liáu chin hó, chiū kā Iok-sek kóng, “Góa mā ū bāng-tio̍h tī góa ê thâu-khak téng ū saⁿ nâ ê pe̍h mī-pau;

17téng-bīn hit-ê nâ-á ū tóe Ai-ki̍p -ông beh chia̍h ê ta̍k-khoán mi̍h-kiāⁿ; ū chiáu-á lâi tok góa thâu-khak téng nâ-á lāi ê chia̍h-mi̍h.”

18Iok-sek ìn i kóng, “Lí ê bāng ê ì-sù sī án-ni: Saⁿ ê nâ chiū-sī saⁿ ji̍t.

19Saⁿ ji̍t lāi, Ai-ki̍p -ông beh chiong lí tùi kaⁿ-ga̍k chhōa--chhut-khì, chām lí ê thâu, koh kā lí tiàu tī chhâ-kè, pe-chiáu ōe lâi tok lí seng-khu ê bah.”

20Kàu tē-saⁿ ji̍t, tú-tú sī Ai-ki̍p -ông ê siⁿ-ji̍t, i pān-toh chhiáⁿ só͘-ū ê jîn-sîn. Ông chiong chiú-chèng-tiúⁿ kap tû-pâng-tiúⁿ tùi kaⁿ-ga̍k tòa--chhut-lâi, hō͘ in khiā tī chèng jîn-sîn ê bīn-chêng.

21Ai-ki̍p -ông kā chiú-chèng-tiúⁿ ho̍k-chit, hō͘ i iû-goân phâng-poe ho̍k-sāi Ai-ki̍p -ông,

22m̄-kú chiong tû-pâng-tiúⁿ tiàu--sí, lóng chiàu Iok-sek só͘ kā in kóng--ê.

23Chóng-sī chiú-chèng-tiúⁿ bô siūⁿ-tio̍h Iok-sek, kèng-jiân kā i bōe-kì--tit.

← Chapter 39 Jump to: Chapter 41 →