Genesis 17

Chinese TTVR (現代台語譯本羅馬字版)

← Chapter 16 Jump to: Chapter 18 →

1A-pek-lân káu-cha̍p-káu hè ê sî, Siōng Chú tùi i hián-hiān, kā i kóng, “Góa sī Choân-lêng ê Siōng-tè, lí tī góa ê bīn-chêng kiâⁿ-chòe tio̍h oân-choân.

2Góa beh kap lí li̍p-iok, beh hō͘ lí ê hō͘-tāi ke-thiⁿ ke̍k-kî chōe.”

3A-pek-lân phak tī thô͘-kha; Siōng-tè koh tùi i kóng,

4“Góa kap lí li̍p ê iok sī án-ni: Lí beh chòe chin chōe pang-kok ê lāu-pē.

5Tùi taⁿ í-āu, lí ê miâ bô koh kiò-chòe A-pek-lân, beh kiò-chòe A-pek-la-hán, in-ūi góa beh hō͘ lí chòe chin chōe kok ê lāu-pē.

6Góa beh hō͘ lí ê hō͘-tāi ke-thiⁿ ke̍k-kî chōe, kiàn-li̍p chin chōe kok, chhut chin chōe kun-ông.

7“Góa beh kian-li̍p góa kap lí, í-ki̍p lí sè-sè-tāi-tāi ê kiáⁿ-sun só͘ li̍p éng-oán ê iok, beh chòe lí kap lí ê hō͘-tāi ê Siōng-tè.

8Góa beh chiong lí hiān-chāi kià-ku ê Ka-lâm choân-tōe, siúⁿ-sù lí kap lí ê hō͘-tāi chòe éng-oán ê sán-gia̍p; góa mā beh chòe in ê Siōng-tè.”

9Siōng-tè koh tùi A-pek-la-hán kóng, “Lí kap lí ê kiáⁿ-sun sè-sè-tāi-tāi tio̍h chun-siú góa ê iok.

10Lín tiong-kan só͘-ū ê ta-po͘-lâng lóng tio̍h siū kat-lé; che chiū-sī góa kap lí í-ki̍p lí ê kiáⁿ-sun só͘ li̍p ê iok, lín it-tēng tio̍h chun-siú.

11Lín tio̍h koah lín ê pau-phê; che beh chòe góa kap lín li̍p-iok ê kì-hō.

12Lín ta̍k sè-tāi ê ta-po͘-eⁿ, bô-lūn ka-kī siⁿ--ê, á-sī tùi gōa-cho̍k-lâng bóe--lâi-ê, chhut-sì tē-poeh ji̍t, lóng tio̍h siū kat-lé.

13Lí ke-lāi siⁿ--ê kap ēng gûn bóe--ê, lóng it-tēng tio̍h siū kat-lé; án-ni góa kap lín só͘ li̍p éng-oán ê iok chiū tī lín ê sin-chiūⁿ chòe kì-hō.

14Bô siū kat-lé ê ta-po͘-lâng, it-tēng tio̍h tùi góa ê chú-bîn ê tiong-kan kek-chhut, in-ūi i bô koah pau-phê, ûi-pōe góa ê iok.”

15Siōng-tè koh tùi A-pek-la-hán kóng, “Lí m̄-thang koh kiò lí ê bó͘ chòe Sa-lâi, tio̍h kiò i chòe Sa-la.

16Góa beh sù-hok i, hō͘ lí tùi i tit-tio̍h chi̍t ê kiáⁿ; góa beh sù-hok i, hō͘ i chòe chin chōe kok ê lāu-bú, chhut chin chōe kun-ông.”

17A-pek-la-hán phak tī thô͘-kha teh chhiò, sim-lāi siūⁿ, “Chi̍t-pah-hè ê lâng kiám ōe siⁿ-kiáⁿ? Sa-la í-keng káu-cha̍p hè, ná iáu ōe siⁿ?”

18A-pek-la-hán tùi Siōng-tè kóng, “Hō͘ Í-si̍t-má-lī chòe góa ê kè-sêng-jîn chiū hó.”

19Siōng-tè kóng, “M̄-sī án-ni, lí ê bó͘ Sa-la beh kā lí siⁿ chi̍t ê kiáⁿ, lí tio̍h kā i hō-miâ kiò-chòe Í-sat; góa beh kian-li̍p góa kap i í-ki̍p i ê kiáⁿ-sun só͘ li̍p éng-oán ê iok.

20Koan-hē Í-si̍t-má-lī, góa mā thiaⁿ lí ê kî-kiû. Góa beh sù-hok i, góa ōe hō͘ i heng-ōng, ke-thiⁿ ke̍k-kî chōe. I ōe siⁿ cha̍p-jī ê cho̍k-tiúⁿ, góa mā beh hō͘ i chiâⁿ-chòe tōa-kok.

21Kàu mê-nî chit-ê sî, Sa-la ōe kā lí siⁿ Í-sat; góa beh kap i li̍p-iok.”

22Siōng-tè kap A-pek-la-hán kóng soah, chiū lī-khui i chiūⁿ--khì.

23Tú-tú hit-ji̍t, A-pek-la-hán chiàu Siōng-tè kóng ê ōe, kā i ê kiáⁿ Í-si̍t-má-lī kap ke-lāi só͘-ū ê ta-po͘-lâng, bô-lūn sī ke-lāi siⁿ--ê á-sī bóe--lâi-ê, lóng kā in kiâⁿ kat-lé.

24A-pek-la-hán siū kat-lé ê sî káu-cha̍p-káu hè;

25i ê kiáⁿ Í-si̍t-má-lī siū kat-lé ê sî cha̍p-saⁿ hè.

26Tú-tú hit-ji̍t, A-pek-la-hán kap i ê kiáⁿ Í-si̍t-má-lī chòe-hé siū kat-lé.

27Só͘-ū ê ta-po͘-lâng, bô-lūn sī ke-lāi siⁿ--ê, á-sī tùi gōa-cho̍k-lâng bóe--ê, lóng kap i chòe-hé siū kat-lé.

← Chapter 16 Jump to: Chapter 18 →