Genesis 23

Chinese TTVR (現代台語譯本羅馬字版)

← Chapter 22 Jump to: Chapter 24 →

1Sa-la it-seng hióng-siū chi̍t-pah jī-cha̍p-chhit hè.

2Sa-la sí tī Ka-lâm -tōe ê Ki-lia̍t A-pa, chiū-sī Hi-pek-lûn. A-pek-la-hán ūi-tio̍h i ai-siong thî-khàu.

3A-pek-la-hán lī-khui khǹg Sa-la si-thé ê só͘-chāi, khì kā Hek -lâng kóng,

4“Góa sī kià-ku tī lín chia ê gōa-cho̍k-lâng, chhiáⁿ lín hō͘ góa chi̍t tè bōng-tōe, thang an-chòng góa ê bó͘.”

5Hek -lâng ìn A-pek-la-hán, kóng,

6“Sian-siⁿ, chhiáⁿ thiaⁿ: Lí tī goán chia sī siōng chun-kùi ê jîn-bu̍t; chhut-chāi lí tī goán ê bōng-tōe kéng chi̍t tè siōng-hó ê tōe, an-chòng lí ê bó͘. Goán bô chi̍t ê lâng ōe hoán-tùi lí tī goán ê bōng-tōe an-chòng lí ê bó͘.”

7A-pek-la-hán khí--lâi, tùi hit só͘-chāi ê Hek -lâng phak tī thô͘-kha kiâⁿ-lé,

8tùi in kóng, “Lín nā khéng hō͘ góa an-chòng góa ê bó͘, chiū chhiáⁿ thòe góa chhéng-kiû Só-hat ê kiáⁿ Í-hut-lûn,

9chiong i thó͘-tōe bé-liu ê Be̍k-pí-la-tōng bōe hō͘ góa; i thang chiàu chiok-gia̍h ê kè-siàu bōe góa, hō͘ góa tī lín tiong-kan ū thó͘-tōe thang chòe bōng-tōe.”

10Hit-chūn Í-hut-lûn kap kî-tha ê Hek -lâng chē tī siâⁿ-mn̂g-kháu; i tī tāi-ke ê bīn-chêng ìn A-pek-la-hán, chèng-lâng lóng ū thiaⁿ--tio̍h. I kóng,

11“M̄-thang án-ni, sian-siⁿ, chhiáⁿ thiaⁿ góa kóng. Hit-tè tōe góa sàng lí, liân lāi-bīn ê tōng-hia̍t mā hō͘ lí. Góa tī góa tông-pau ê bīn-chêng sàng hō͘ lí, hō͘ lí bâi-chòng lí ê bó͘.”

12A-pek-la-hán chiū phak tī thô͘-kha kā tong-tōe ê lâng kiâⁿ-lé,

13tī tāi-ke ê bīn-chêng ìn Í-hut-lûn, chèng-lâng lóng ū thiaⁿ--tio̍h. I kóng, “Chhiáⁿ thiaⁿ góa kóng. Góa beh kā lí bóe hit-tè tōe, chhiáⁿ lí tio̍h kā góa siu chîⁿ, hō͘ góa thang tī hia an-chòng góa ê bó͘.”

14Í-hut-lûn ìn A-pek-la-hán kóng,

15“Sian-siⁿ, chhiáⁿ thiaⁿ góa kóng. Hit-tè tōe ta̍t sì-pah tè gûn, chit-ê kè-siàu tùi lán nn̄g ê kiám ū sǹg sím-mi̍h? Lí thang an-chòng lí ê bó͘.”

16A-pek-la-hán thiaⁿ Í-hut-lûn ê ōe, chiàu i tī Hek -lâng ê bīn-chêng só͘ kóng--ê, chiong bóe-bōe thong-iōng ê gûn, sǹg sì-pah tè hō͘ Í-hut-lûn.

17Tùi hit-sî khí, Í-hut-lûn tī Bān-lī tùi-bīn Be̍k-pí-la-tōng hit-tè tōe, pau-koat hit-khu hn̂g, hit lāi-bīn ê tōng-hia̍t, kap sì-ûi só͘-ū ê chhiū-ba̍k lóng kui-sio̍k A-pek-la-hán.

18Tī siâⁿ-mn̂g-kháu ê Hek -lâng lóng choh-chèng, hit-tè tōe kui-sio̍k A-pek-la-hán.

19Āu-lâi, A-pek-la-hán chiong i ê bó͘ Sa-la an-chòng tī Ka-lâm -tōe Bān-lī tùi-bīn Be̍k-pí-la chhân-iá ê tōng-hia̍t; Bān-lī chiū-sī Hi-pek-lûn.

20Tùi án-ni, hit-khu hn̂g kap hn̂g--ni̍h ê tōng-hia̍t, tùi Hek -lâng î-choán hō͘ A-pek-la-hán chòe su-jîn bōng-tōe.

← Chapter 22 Jump to: Chapter 24 →