Genesis 46

Chinese TTVR (現代台語譯本羅馬字版)

← Chapter 45 Jump to: Chapter 47 →

1Ngá-kok chhōa choân-ke chhut-hoat, khì kàu Pia̍t-sī-pa, tī hia hiàn-chè hō͘ i ê lāu-pē Í-sat ê Siōng-tè.

2Mî--sî Siōng-tè tī īⁿ-siōng tiong kā Ngá-kok kóng, “ Ngá-kok! Ngá-kok!” I kóng, “Góa tī chia.”

3Siōng-tè kóng, “Góa sī Siōng-tè, sī lí ê lāu-pē ê Siōng-tè. Lí beh lo̍h-khì Ai-ki̍p, m̄-bián kiaⁿ, in-ūi góa beh hō͘ lí tī hia chiâⁿ-chòe tōa-cho̍k.

4Góa beh kap lí chòe-hé lo̍h-khì Ai-ki̍p, mā it-tēng ōe chhōa lí tò--lâi. Lí kè-sin ê sî, Iok-sek ōe tī lí ê sin-piⁿ sū-hāu lí, kā lí an-chòng.”

5Ngá-kok tùi Pia̍t-sī-pa chhut-hoat; Ngá-kok hiah-ê kiáⁿ, hō͘ in ê lāu-pē Ngá-kok, kap in ê kiáⁿ-jî, in ê bó͘ lóng chē tī Ai-ki̍p -ông phài-lâi beh chài in ê chhia.

6Ngá-kok kap i lóng-chóng ê kiáⁿ-sun, tòa in ê cheng-siⁿ, í-ki̍p tī Ka-lâm -tōe só͘ tit--tio̍h ê châi-bu̍t, lo̍h-khì Ai-ki̍p.

7Ngá-kok tòa i ê hāu-siⁿ, cha-bó͘-kiáⁿ, ta-po͘-sun, cha-bó͘-sun, kap i só͘-ū ê hō͘-tāi, lóng khì Ai-ki̍p.

8Ē-bīn sī lo̍h-khì Ai-ki̍p ê Í-sek-lia̍t -lâng, Ngá-kok hō͘-tāi ê miâ-toaⁿ: Ngá-kok ê tōa-kiáⁿ Lū-piān.

9Lū-piān ê kiáⁿ Í-lo̍k, Hoat-lō͘, Hi-su-lûn, Ka-bí.

10Se-biān ê kiáⁿ Iâ-bō͘-lī, Ngá-bín, O-hat, Ngá-kun, Só-hat; kap Ka-lâm lú-chú só͘ siⁿ ê kiáⁿ Sò-lô.

11Lī-bī ê kiáⁿ Kek-sūn, Ko-hat, Bí-la-lī.

12Iû-tāi ê kiáⁿ Ní, Gô-lâm, Sī-la, Hoat-le̍k-su, Siā-la; Ní kap Gô-lâm sí tī Ka-lâm -tōe. Hoat-le̍k-su ê kiáⁿ Hi-su-lûn, Hap-bō͘-le̍k.

13Í-sat-ka ê kiáⁿ Tô-la, Phó͘-óa, Iok-pek, Sin-lûn.

14Se-pò͘-lûn ê kiáⁿ Se-lia̍t, Í-lûn, Ngá-lī.

15Í-siōng sī Lē-a tī Bí-soh-put-ta̍t-bí-a kā Ngá-kok siⁿ ê kiáⁿ; koh ū i ê cha-bó͘-kiáⁿ Tí-ná; Ngá-kok kap Lē-a siⁿ ê kiáⁿ-sun, lâm-lú kiōng saⁿ-cha̍p-saⁿ lâng.

16Ka-tek ê kiáⁿ Sé-hui-ûn, Hap-ki, Su-nî, Í-su-pún, Í-lī, A-lô-tí, A-lia̍t-lī.

17A-siat ê kiáⁿ Im-ná, E̍k-si-óa, E̍k-si-úi, Pí-lī-a; koh in ê sió-bē Se-la. Pí-lī-a ê kiáⁿ Hi-pek, Má-kiat.

18Í-siōng sī La-pan hō͘ i ê cha-bó͘-kiáⁿ Lē-a ê lú-pī Sek-phà kā Ngá-kok siⁿ ê kiáⁿ-sun, kiōng cha̍p-la̍k lâng.

19Ngá-kok ê bó͘ Lúi-kiat ê kiáⁿ Iok-sek kap Piān-ngá-bín.

20Iok-sek tī Ai-ki̍p -tōe siⁿ Má-ná-se kap Í-hoat-liân, chiū-sī Hi-lī-pho-lí -siâⁿ ê chè-si Pho-thê Hui-la ê cha-bó͘-kiáⁿ A-se-la̍p kā Iok-sek siⁿ--ê.

21Piān-ngá-bín ê kiáⁿ Pí-la, Pí-kiat, A-si̍t-pia̍t, Ki-la, Nái-bān, Í-hi, Lô-si̍t, Bō͘-pêng, Hō͘-pêng, A-le̍k.

22Í-siōng sī Lúi-kiat kā Ngá-kok siⁿ ê kiáⁿ-sun, kiōng cha̍p-sì lâng.

23Tān ê kiáⁿ sī Hō͘-sin.

24Ná-hut-tha-lī ê kiáⁿ Ngá-sih, Ko͘-nî, Iâ-sek, Sī-léng.

25Í-siōng sī La-pan hō͘ i ê cha-bó͘-kiáⁿ Lúi-kiat ê lú-pī Phek-la kā Ngá-kok siⁿ ê kiáⁿ-sun, kiōng chhit lâng.

26Kap Ngá-kok chòe-hé khì Ai-ki̍p ê kiáⁿ-sun, sin-pū bô sǹg, kiōng la̍k-cha̍p-la̍k lâng.

27Koh ū Iok-sek tī Ai-ki̍p siⁿ ê nn̄g ê kiáⁿ; Ngá-kok ê ke lâi kàu Ai-ki̍p --ê, chóng-kiōng chhit-cha̍p lâng.

28Ngá-kok chhe Iû-tāi seng khì kìⁿ Iok-sek, chhiáⁿ i kā in kóng beh án-chóaⁿ khì Ko-san; in chiū lâi kàu Ko-san.

29Iok-sek kā chhia chún-pī hó-sè, khì Ko-san gêng-chiap i ê lāu-pē Ngá-kok. In chi̍t-ē kìⁿ-tio̍h bīn, Iok-sek chiū phak tī lāu-pē ê ām-kún khàu chin kú.

30Ngá-kok kā Iok-sek kóng, “Góa khòaⁿ-tio̍h lí ê bīn, chai lí iáu oa̍h--teh, taⁿ góa sí mā kam-goān.”

31Iok-sek kā i ê hiaⁿ-tī kap in lāu-pē choân-ke ê lâng kóng, “Góa tio̍h khì tùi Ai-ki̍p -ông pò-kò, kóng, ‘Góa ê hiaⁿ-tī kap góa ê lāu-pē choân-ke ê lâng, lóng í-keng tùi Ka-lâm -tōe lâi kàu góa chia.

32In sī chhī iûⁿ, sī chiàu-kò͘ cheng-siⁿ ê lâng; in chiong gû-kûn, iûⁿ-kûn, kap it-chhè só͘ ū--ê lóng tòa--lâi.’

33Ai-ki̍p -ông nā tiàu lín, mn̄g lín kóng, ‘Lín sī chòe sím-mi̍h kang-chok--ê?’

34Lín tio̍h kóng, ‘Lí ê po̍k-jîn tùi siàu-liân kàu taⁿ, kap goán ê chó͘-sian lóng sī teh chhī cheng-siⁿ.’ Án-ni lín chiū ōe-tàng tòa tī Ko-san tōe-khu; in-ūi Ai-ki̍p -lâng thó-ià chhī cheng-siⁿ ê lâng.”

← Chapter 45 Jump to: Chapter 47 →