Genesis 45

Chinese TTVR (現代台語譯本羅馬字版)

← Chapter 44 Jump to: Chapter 46 →

1Iok-sek lún bōe tiâu, tùi hiah-ê tī i sin-piⁿ ho̍k-sāi ê lâng hoah kóng, “Lín lóng chhut--khì!” Iok-sek tùi i ê hiaⁿ-tī piáu-pe̍k sin-hūn ê sî, bô pa̍t-lâng chāi-tiûⁿ.

2I chhut-siaⁿ tōa khàu; Ai-ki̍p -lâng thiaⁿ--kìⁿ, siau-sit mā thoân kàu Ai-ki̍p -ông ê ông-kiong.

3Iok-sek kā i ê hiaⁿ-tī kóng, “Góa sī Iok-sek! Góa ê lāu-pē iáu ióng-ióng bô?” I ê hiaⁿ-tī lóng kiaⁿ kah gāng--khì, m̄ chai beh án-chóaⁿ ìn i.

4Iok-sek koh kā i ê hiaⁿ-tī kóng, “Khah óa-lâi góa chia leh.” In chiū óa--khì. I kóng, “Góa sī lín ê sió-tī, hō͘ lín bōe lâi Ai-ki̍p ê Iok-sek.

5Lín m̄-bián in-ūi bōe góa lâi chia sim kan-khó͘, chū-chek; che sī Siōng-tè phài góa tāi-seng lín lâi, thang pó-choân tāi-ke ê sìⁿ-miā.

6Taⁿ, ki-hng í-keng nn̄g nî, iáu ū gō͘ nî bōe-tàng chèng-choh, bô thang siu-sêng.

7Siōng-tè phài góa tāi-seng lín lâi, sī beh lâu lín ê hō͘-tāi tī sè-kan; koh beh kái-kiù lín, pó-choân lín ê sìⁿ-miā.

8Án-ni khòaⁿ--khí-lâi, phài góa lâi chia--ê, m̄-sī lín, sī Siōng-tè; I koh hō͘ góa chiâⁿ-chòe Ai-ki̍p -ông ê siú-se̍k kò͘-būn, chòe Ai-ki̍p ê cháiⁿ-siòng, koán-lí choân-kok.

9“Lín tio̍h kóaⁿ-kín khì kā lāu-pē kóng, ‘Lí ê kiáⁿ Iok-sek án-ni kóng: Siōng-tè hō͘ góa chòe Ai-ki̍p ê cháiⁿ-siòng, chhiáⁿ lo̍h-lâi góa chia, m̄-thang iân-tî.

10Lí kap lí ê kiáⁿ, lí ê sun, kap gû-kûn iûⁿ-kûn, í-ki̍p it-chhè só͘ ū--ê, lóng thang lâi tòa tī lī góa bô jōa hn̄g ê Ko-san tōe-khu.

11Góa beh tī hia hōng-thāi lí; in-ūi iáu ū gō͘ nî ê ki-hng, chiah bián lí kap choân-ke, í-ki̍p it-chhè só͘ ū--ê pháiⁿ kè-ji̍t.’”

12Iok-sek koh kóng, “Taⁿ, lín kap sió-tī Piān-ngá-bín lóng ū chhin-ba̍k khòaⁿ-tio̍h góa, koh kap góa kóng-ōe.

13Lín tio̍h chiong góa tī Ai-ki̍p it-chhè ê êng-kng, kap lín só͘ khòaⁿ--tio̍h ê sū, lóng kā lāu-pē kóng; koh tio̍h kóaⁿ-kín chiap lāu-pē lâi góa chia.”

14Kóng soah, Iok-sek phak tī i ê sió-tī ê ām-kún thî-khàu, Piān-ngá-bín mā phak tī Iok-sek ê ām-kún thî-khàu.

15Iok-sek koh kap hiah-ê hiaⁿ-ko saⁿ-chim, lám-teh háu; āu-lâi i ê hiaⁿ-tī chiū kap i kóng-ōe.

16Chit-ê hong-siaⁿ thoân kàu Ai-ki̍p -ông ê kiong-lāi, kóng, “ Iok-sek ê hiaⁿ-tī lâi lah.” Ai-ki̍p -ông kap i ê jîn-sîn lóng chin hoaⁿ-hí.

17Ai-ki̍p -ông kā Iok-sek kóng, “Lí tio̍h kā lí ê hiaⁿ-tī kóng, ‘Lín tio̍h chiong mi̍h-kiāⁿ hō͘ cheng-siⁿ chài, chhut-hoat tò-khì Ka-lâm -tōe,

18chiong lín ê lāu-pē kap lín ê ka-koàn lóng chiap-lâi góa chia; góa beh chiong Ai-ki̍p -tōe siōng-hó ê mi̍h-kiāⁿ hō͘ lín, lín mā thang chia̍h chit só͘-chāi ê san-tin-hái-bī.’

19Taⁿ góa bēng-lēng lí, tio̍h tùi Ai-ki̍p -tōe phài chhia khì, chiong in ê bó͘, in ê gín-á, kap lín lāu-pē lóng chiap--lâi.

20Kiò in m̄-thang tin-sioh chhù-lāi ê mi̍h-kiāⁿ, in-ūi Ai-ki̍p choân-tōe ê hó-mi̍h, in lóng thang hióng-siū.”

21Ngá-kok ê kiáⁿ-jî chiū chiàu án-ni khì chòe. Iok-sek chiàu Ai-ki̍p -ông ê hoan-hù, hō͘ in chhia kap lō͘-tiong su-iàu ê chia̍h-mi̍h;

22koh hō͘ in ta̍k-ê lâng chi̍t thò i-ho̍k; m̄-kú hō͘ Piān-ngá-bín saⁿ-pah tè gûn, i-ho̍k gō͘ thò.

23Iok-sek sàng hō͘ in lāu-pē ê lé-mi̍h ū kang ê lû-á cha̍p chiah, chài Ai-ki̍p ê hó-mi̍h; bú ê lû-á cha̍p chiah, chài ngó͘-kok, piáⁿ, kap chia̍h-mi̍h, hō͘ lāu-pē lō͘--ni̍h thang ēng.

24Iok-sek sàng in hiaⁿ-tī tò--khì, koh kā in kóng, “Lín tī lō͘--ni̍h m̄-thang oan-ke.”

25In tùi Ai-ki̍p tò-khì kàu Ka-lâm -tōe in lāu-pē Ngá-kok hia.

26In tùi Ngá-kok kóng, “ Iok-sek iáu oa̍h--teh, koh choh cháiⁿ-siòng, tī-lí Ai-ki̍p choân-tōe.” Ngá-kok lóng bô hoán-èng, m̄ sìn in ê ōe.

27In chiū chiong Iok-sek kā in kóng ê ōe, lóng tùi in lāu-pē Ngá-kok kóng; Ngá-kok khòaⁿ-tio̍h Iok-sek phài-lâi beh chài i ê chhia, sim chiū oa̍h--khí-lâi.

28Ngá-kok kóng, “Ū-kàu hó! Góa ê kiáⁿ Iok-sek iáu oa̍h--teh, thàn góa iáu-bē sí, góa beh khì khòaⁿ i.”

← Chapter 44 Jump to: Chapter 46 →