Genesis 44

Chinese TTVR (現代台語譯本羅馬字版)

← Chapter 43 Jump to: Chapter 45 →

1Iok-sek kau-tài koán-ke kóng, “Lí tio̍h chiàu in tòa ōe khì ê hūn-liōng, chiong niû-si̍t kā in ta̍k-ê lâng ê pò͘-tē ji̍p hō͘ tīⁿ, koh chiong ta̍k-ê lâng ê gûn lok tī in ê pò͘-tē kháu.

2Chiong góa gûn ê chiú-poe hē tī hit-ê siōng siàu-liân--ê ê pò͘-tē kháu; i bóe ngó͘-kok ê gûn mā sòa hē--lo̍h-khì.” Koán-ke chiū chiàu Iok-sek ê hoan-hù khì chòe.

3Thiⁿ chi̍t-ē kng, hia ê lâng sàng Iok-sek ê hiaⁿ-tī kap in ê lû-á lī-khui.

4In chhut-siâⁿ kiâⁿ bô jōa hn̄g, Iok-sek kā koán-ke kóng, “Kóaⁿ-kín khì tui-jip hiah-ê lâng, jip--tio̍h, chiū kā in kóng, ‘Lín sī-án-chóaⁿ ēng pháiⁿ pò hó?

5Lín ná thau-the̍h goán chú-lâng ê gûn-poe? Che sī i lim-chiú ēng ê poe-á, mā-sī pok-kòa teh ēng--ê. Lín án-ni chòe chin m̄-tio̍h.’”

6Koán-ke jip-tio̍h in, chiong chiah-ê ōe kā in kóng.

7In ìn kóng, “Sian-siⁿ, lí ná ōe án-ni kóng? Lí ê po̍k-jîn choa̍t-tùi bōe chòe chit-khoán tāi-chì.

8Goán í-chêng tī pò͘-tē kháu khòaⁿ--tio̍h ê gûn to tùi Ka-lâm -tōe tòa-lâi hêng lín, goán ná ōe tùi lín chú-lâng ê ke thau-the̍h kim-gûn?

9Lí ê po̍k-jîn tiong-kan bô-lūn sím-mi̍h-lâng hō͘ lí chhiau--tio̍h, chiū hō͘ i sí, goán mā beh chòe lí ê lô͘-lē.”

10Koán-ke kóng, “Hó, chiàu lín ê ōe chòe, tī sím-mi̍h-lâng hia chhiau--tio̍h, hit-ê lâng chiū chòe góa ê lô͘-lē; kî-tha ê lâng bô chōe.”

11In kóaⁿ-kín chiong pò͘-tē poaⁿ lo̍h-lâi thô͘-kha, ta̍k-ê lâng chiong in ê pò͘-tē tháu-khui.

12Koán-ke chiū tùi tōa--ê khai-sí chhiau, chhiau kàu sòe--ê; hit-ê gûn-poe kèng-jiân tī Piān-ngá-bín ê pò͘-tē lāi chhiau--tio̍h.

13Khòaⁿ-tio̍h án-ni, in chiū thiah-li̍h saⁿ, chiong mi̍h-kiāⁿ hō͘ lû chài, tò-khì siâⁿ-lāi.

14Iû-tāi kap i ê hiaⁿ-tī kàu Iok-sek ê chhù, Iok-sek iáu tī hia, in chiū phak-lo̍h thô͘-kha pài i.

15Iok-sek kā in kóng, “Lín ná ōe chòe chit-khoán tāi-chì? Lín kiám m̄ chai, góa chit-khoán lâng ōe-hiáu pok-kòa?”

16Iû-tāi kóng, “Goán iáu ōe-tàng tùi góa ê chú kóng sím-mi̍h? Goán bô ōe thang kóng, mā bô thang piān-kái. Siōng-tè í-keng cha-chhut lí ê po̍k-jîn ê chōe-kò, goán kap hit-ê hō͘ lí chhiau-tio̍h gûn-poe--ê, lóng beh chòe lí ê lô͘-lē.”

17Iok-sek kóng, “Góa choa̍t-tùi bōe án-ni chòe; tī sím-mi̍h-lâng hia chhiau-tio̍h gûn-poe, hit-ê lâng chiū tio̍h chòe góa ê lô͘-lē. Lín kî-tha ê lâng lóng thang pêng-an tńg-khì lín lāu-pē hia.”

18Iû-tāi kiâⁿ chìn-chêng tùi Iok-sek kóng, “Góa ê chú, chhiáⁿ ún-chún lí ê po̍k-jîn kóng chi̍t kù ōe, m̄-thang siū-khì; lí kap Ai-ki̍p -ông pîⁿ ū koân-pèng.

19Góa ê chú lí bat mn̄g goán kóng, ‘Lín ū lāu-pē, ū hiaⁿ-tī bô?’

20Goán ìn kóng, ‘Goán ū lāu-pē, í-keng nî-lāu; koh ū i nî-lāu chiah siⁿ ê soah-bé-kiáⁿ; i ê chhin-siⁿ hiaⁿ-ko í-keng sí, in lāu-bú kan-ta pàng i chi̍t ê, koh in lāu-pē siōng thiàⁿ i.’

21Lí kā lí ê po̍k-jîn kóng, ‘Chhōa i lâi góa chia, hō͘ góa chhin-ba̍k khòaⁿ-tio̍h i.’

22Goán kā góa ê chú kóng, ‘Gín-á bōe-tàng lī-khui i ê lāu-pē; nā lī-khui, i ê lāu-pē ōe sí.’

23Lí kā lí ê po̍k-jîn kóng, ‘Lín ê soah-bé sió-tī nā bô kap lín chòe-hé lo̍h--lâi, lín chiū bián siūⁿ-beh kìⁿ góa.’

24“Goán tò-khì lí ê po̍k-jîn goán lāu-pē hia, chiū chiong lí ê ōe kā i kóng.

25Goán lāu-pē kóng, ‘Lín koh khì kā lán bóe chi̍t-kóa bí-niû.’

26Goán chiū kóng, ‘Goán bōe-tàng lo̍h--khì; lí nā hō͘ goán soah-bé sió-tī chòe-hé khì, goán chiū lo̍h--khì; in-ūi soah-bé sió-tī nā bô kap goán khì, goán chiū bōe-tàng kìⁿ hit-ê lâng.’

27Lí ê po̍k-jîn goán ê lāu-pē kā goán kóng, ‘Lín chai góa ê bó͘ kā góa siⁿ nn̄g ê kiáⁿ;

28chi̍t ê lī-khui góa, i it-tēng hō͘ iá-siù thiah-chhùi lah! Kàu taⁿ góa iáu m̄-bat koh khòaⁿ-tio̍h i.

29Taⁿ, lín koh chiong chit-ê chhōa--khì, lī-khui góa; nā i tú-tio̍h chai-hāi, chiū-sī lín hāi góa pe̍h-thâu-mn̂g chhiⁿ-chhám lo̍h Im-kan.’

30“Goán lāu-pē ê sìⁿ-miā kap chit-ê gín-á ê sìⁿ-miā kat saⁿ-liân. Taⁿ goán tò-khì lí ê po̍k-jîn goán lāu-pē hia, nā chit-ê gín-á bô kap goán chòe-hé, goán lāu-pē khòaⁿ bô i, goán lāu-pē it-tēng ōe sí,

31án-ni chiū-sī goán hō͘ lí ê po̍k-jîn goán lāu-pē pe̍h-thâu-mn̂g chhiⁿ-chhám lo̍h Im-kan.

32Lí ê po̍k-jîn ū tùi góa ê lāu-pē pó chit-ê gín-á, kóng, ‘Góa nā bô chhōa i tò-lâi kau hō͘ lí, góa goān it-seng taⁿ chit-ê chōe.’

33Taⁿ kiû lí ún-chún lí ê po̍k-jîn lâu--teh, thòe chit-ê gín-á chòe lí ê lô͘-lē; hō͘ i kap i ê hiaⁿ-ko chòe-hé tńg--khì.

34I nā bô kap góa chòe-hé tńg--khì, góa ná káⁿ khì kìⁿ goán lāu-pē? Góa put-jím-sim khòaⁿ-tio̍h goán lāu-pē tú-tio̍h chit-khoán chai-hō.”

← Chapter 43 Jump to: Chapter 45 →