Genesis 47

Chinese TTVR (現代台語譯本羅馬字版)

← Chapter 46 Jump to: Chapter 48 →

1Iok-sek ji̍p-khì kìⁿ Ai-ki̍p -ông, tùi i pò-kò, kóng, “Góa ê lāu-pē kap góa ê hiaⁿ-tī, tòa in ê gû-kûn, iûⁿ-kûn, kap it-chhè só͘ ū--ê, tùi Ka-lâm -tōe lâi tī Ko-san -tōe.”

2Iok-sek tùi i ê hiaⁿ-tī tiong-kan kéng gō͘ ê, chhōa in chòe-hé khì kìⁿ Ai-ki̍p -ông.

3Ai-ki̍p -ông mn̄g Iok-sek ê hiaⁿ-tī kóng, “Lín teh chòe sím-mi̍h kang-chok?” In tùi Ai-ki̍p -ông kóng, “Lí ê po̍k-jîn sī chhī iûⁿ ê lâng; goán kap goán ê chó͘-sian lóng teh chhī iûⁿ.”

4In koh tùi Ai-ki̍p -ông kóng, “ Ka-lâm -tōe ki-hng chin siong-tiōng, lí ê po̍k-jîn ê iûⁿ-kûn bô chháu thang chia̍h, só͘-í goán lâi, ǹg-bāng ōe-tàng kià-ku tī chia. Taⁿ kiû lí ún-chún lí ê po̍k-jîn tòa tī Ko-san tōe-khu.”

5Ai-ki̍p -ông kā Iok-sek kóng, “Lí ê lāu-pē kap lí ê hiaⁿ-tī lâi kàu lí chia;

6Ai-ki̍p -tōe lóng sī lí teh koán-lí, lí thang hō͘ lí ê lāu-pē kap lí ê hiaⁿ-tī tòa tī siōng-hó ê tōe-khu; in thang tòa tī Ko-san tōe-khu. Lí nā chai in tiong-kan sím-mi̍h-lâng khah ū châi-tiāu, thang phài in koàn-kò͘ góa ê cheng-siⁿ.”

7Iok-sek chhōa i ê lāu-pē Ngá-kok ji̍p-khì khiā tī Ai-ki̍p -ông ê bīn-chêng; Ngá-kok chiū kā Ai-ki̍p -ông chiok-hok.

8Ai-ki̍p -ông mn̄g Ngá-kok kóng, “Lí hiān-chāi kúi hè?”

9Ngá-kok tùi Ai-ki̍p -ông kóng, “Góa hiān-chāi chi̍t-pah saⁿ-cha̍p hè. Góa ê jîn-seng ê sòe-goa̍t té koh kan-khó͘, put-pí góa ê chó͘-sian chia̍h tn̂g-hè-siū.”

10Ngá-kok koh kā Ai-ki̍p -ông chiok-hok liáu-āu, chiū lī-khui Ai-ki̍p -ông chhut--khì.

11Iok-sek chiàu Ai-ki̍p -ông ê hoan-hù, hō͘ i ê lāu-pē kap i ê hiaⁿ-tī tòa tī Ai-ki̍p siōng-hó ê tōe-khu Lân-sài ê tōe, koh chiong hit-ê tōe-khu hō͘ in chòe sán-gia̍p.

12Iok-sek ēng bí-niû hōng-thāi i ê lāu-pē, koh kiong-kip i ê hiaⁿ-tī, kap in lāu-pē só͘-ū ê ka-sio̍k, liân siōng sòe-hàn ê gín-á mā chāi-lāi.

13Ki-hng chin giâm-tiōng, choân-tōe lóng bô bí-niû; Ai-ki̍p -tōe kap Ka-lâm -tōe in-ūi ki-hng hong-hòe.

14Iok-sek chiong Ai-ki̍p -tōe kap Ka-lâm -tōe ê lâng lâi bóe bí-niû ê gûn siu-chi̍p--khí-lâi, lóng sàng kàu Ai-ki̍p ông-kiong.

15Ai-ki̍p -lâng kap Ka-lâm -tōe ê lâng ê gûn lóng ēng-liáu; Ai-ki̍p jîn-bîn lâi kìⁿ Iok-sek, kóng, “Goán ê gûn lóng ēng-liáu-liáu lah. Kiû lí hō͘ goán niû-si̍t; chiah bián hō͘ lí khòaⁿ-tio̍h goán gō-sí.”

16Iok-sek kóng, “Lín nā gûn lóng ēng-liáu, thang khan cheng-siⁿ lâi ōaⁿ bí-niû.”

17In chiū chiong cheng-siⁿ kóaⁿ-lâi Iok-sek hia; Iok-sek ēng bí-niû ōaⁿ in ê bé, gû-kûn, iûⁿ-kûn, kap lû-á; in ēng só͘-ū ê cheng-siⁿ ōaⁿ bí-niû, chiū án-ni tō͘-kè hit-nî.

18Tē-jī nî, in koh lâi kìⁿ Iok-sek, kóng, “Goán ê chú, goán bô phiàn lí, goán ê gûn lóng ēng-liáu, cheng-siⁿ mā lóng bōe hō͘ lí; tû-liáu goán ê seng-khu kap goán ê chhân-tōe í-gōa, lí mā chai, goán lóng bô-pòaⁿ-hāng lah.

19Lí kiám jím-sim khòaⁿ goán lâng sí, tōe pha-hng? Kiû lí ēng bí-niû bóe goán kap goán ê tōe, goán kap goán ê tōe chiū lóng kui-sio̍k Ai-ki̍p -ông. Koh kiû lí hō͘ goán chéng-chí, goán chiah ōe-tàng tō͘-oa̍h, bián sí, thó͘-tōe mā bián hong-hòe.”

20Tùi án-ni, Iok-sek ūi Ai-ki̍p -ông bóe choân-kok ê thó͘-tōe. Ai-ki̍p -lâng in-ūi ki-hng giâm-tiōng, ko͘-put-chiong tio̍h bōe in ê chhân-tōe; hiah-ê tōe chiū lóng kui-sio̍k Ai-ki̍p -ông.

21Iok-sek hō͘ Ai-ki̍p choân-kok ta̍k só͘-chāi ê jîn-bîn lóng chiâⁿ-chòe lô͘-lē.

22M̄-kú Ai-ki̍p -ông bô bóe chè-si ê tōe; in-ūi chè-si ū tit-tio̍h Ai-ki̍p -ông kiong-kip ê niû-si̍t, só͘-í in bô bōe in ê tōe.

23Iok-sek kā jîn-bîn kóng, “Góa kin-á-ji̍t ūi Ai-ki̍p -ông bóe lín kap lín ê tōe. Taⁿ, góa chiong chéng-chí hō͘ lín, lín thang khì chèng-choh.

24Kàu siu-sêng ê sî, lín tio̍h la̍p gō͘-hūn-chi̍t hō͘ Ai-ki̍p -ông; sì hūn kui lín, chòe hn̂g--ni̍h ê chéng-chí, koh chòe lín kap lín choân-ke, í-ki̍p lín ê gín-á ê chia̍h-mi̍h.”

25In kóng, “Goán ê sìⁿ-miā sī lí kiù--ê, goán chin kám-kek, goān-ì chòe Ai-ki̍p -ông ê lô͘-lē.”

26Án-ni, Iok-sek ūi Ai-ki̍p chè-tēng chi̍t ê tiâu-lē, kàu kin-á-ji̍t iáu-teh si̍t-si, chiū-sī siu-sêng ê gō͘-hūn-chi̍t tio̍h la̍p hō͘ Ai-ki̍p -ông, m̄-kú chè-si ê tōe bô kui Ai-ki̍p -ông.

27Í-sek-lia̍t -lâng tòa tī Ai-ki̍p ê Ko-san tōe-khu, tī hia kiàn-tì ke-gia̍p, siⁿ-thòaⁿ chin chōe.

28Ngá-kok tòa tī Ai-ki̍p cha̍p-chhit nî. I it-seng oa̍h chi̍t-pah sì-cha̍p-chhit hè.

29Ngá-kok chai i sí ê ji̍t kūn lah, chiū kiò i ê kiáⁿ Iok-sek lâi, kóng, “Lí nā chin-chiàⁿ iú-hàu góa, chhiáⁿ chiong lí ê chhiú hē tī góa ê tōa-thúi-ē chiù-chōa, tiong-sêng tah-èng góa, bô kā góa bâi-chòng tī Ai-ki̍p.

30Góa tńg-khì góa ê chó͘-sian hia ê sî, lí tio̍h chiong góa tòa lī-khui Ai-ki̍p, bâi-chòng tī in an-chòng ê só͘-chāi.” Iok-sek kóng, “Góa ōe chiàu lí kóng--ê khì chòe.”

31Ngá-kok kóng, “Lí tio̍h tùi góa chiù-chōa.” Iok-sek chiū tùi i chiù-chōa. Tùi án-ni Ngá-kok óa chhn̂g-thâu kèng-pài.

← Chapter 46 Jump to: Chapter 48 →