Genesis 48

Chinese TTVR (現代台語譯本羅馬字版)

← Chapter 47 Jump to: Chapter 49 →

1Chiah-ê tāi-chì liáu-āu, ū lâng kā Iok-sek kóng, “Lí ê lāu-pē teh phòa-pīⁿ.” Iok-sek chiū chhōa i nn̄g ê kiáⁿ Má-ná-se, Í-hoat-liân chòe-hé khì thàm Ngá-kok.

2Ū lâng thong-ti Ngá-kok kóng, “Lí ê kiáⁿ Iok-sek lâi beh khòaⁿ lí.” Ngá-kok bián-kióng khí-lâi chē tī bîn-chhn̂g.

3Ngá-kok kā Iok-sek kóng, “Choân-lêng ê Siōng-tè bat tī Ka-lâm -tōe ê Lō͘-su tùi góa hián-hiān, sù-hok góa,

4koh kā góa kóng, ‘Góa beh hō͘ lí siⁿ-thòaⁿ chin chōe, chiâⁿ-chòe chin chōe cho̍k; koh beh chiong chit-ê tōe siúⁿ-sù lí ê hō͘-tāi, chòe in éng-oán ê sán-gia̍p.’

5“Góa iáu-bē lâi Ai-ki̍p lí chia í-chêng, lí tī Ai-ki̍p siⁿ ê nn̄g ê kiáⁿ, Í-hoat-liân kap Má-ná-se, tùi hiān-chāi khí beh sǹg-chòe sī góa ê kiáⁿ, chhin-chhiūⁿ Lū-piān, Se-biān sī góa ê kiáⁿ.

6Lí í-āu siⁿ ê kiáⁿ chiū-sī lí ê, in thang sêng-chiap Í-hoat-liân kap Má-ná-se ê sán-gia̍p.

7Góa tùi Bí-soh-put-ta̍t-bí-a tò-tńg-lâi Ka-lâm -tōe ê sî, tī lī-khui Í-hoat-tha iáu ū chi̍t chām lō͘ ê lō͘-tiong, lí ê lāu-bú Lúi-kiat sí, góa hui-siông siong-sim, kā i bâi-chòng tī beh khì Í-hoat-tha ê lō͘-piⁿ.” (Í-hoat-tha chiū-sī Pek-lī-hêng.)

8Ngá-kok khòaⁿ-tio̍h Iok-sek nn̄g ê kiáⁿ, chiū kóng, “In sī sím-mi̍h-lâng?”

9Iok-sek tùi i ê lāu-pē kóng, “In sī góa ê kiáⁿ, sī Siōng-tè tī chia siúⁿ-sù góa--ê.” Ngá-kok kóng, “Chhiáⁿ kā in chhōa-lâi góa chia, góa beh kā in chiok-hok.”

10Ngá-kok nî-lāu, ba̍k-chiu hoe, khòaⁿ bōe chheng-chhó; Iok-sek chhōa hit nn̄g ê kiáⁿ óa-kūn Ngá-kok, Ngá-kok chiū kā in chim, kā in lám--teh.

11Ngá-kok kā Iok-sek kóng, “Góa siūⁿ bōe kàu ōe-tàng koh khòaⁿ-tio̍h lí; hiān-chāi Siōng-tè koh hō͘ góa khòaⁿ-tio̍h lí ê kiáⁿ.”

12Iok-sek chiong nn̄g ê kiáⁿ tùi Ngá-kok kha-thâu-u ê tiong-kan chhōa--chhut-lâi, jiân-āu phak tī thô͘-kha pài--i.

13Āu-lâi Iok-sek koh khan hit nn̄g ê kiáⁿ óa-kūn Ngá-kok; chiàⁿ-chhiú khan Í-hoat-liân khì i ê tò-pêng, tò-chhiú khan Má-ná-se khì i ê chiàⁿ-pêng.

14Ngá-kok siang-chhiú phah-chhe, chhun chiàⁿ-chhiú hōaⁿ sòe-hàn-kiáⁿ Í-hoat-liân ê thâu-khak, tò-chhiú hōaⁿ tōa-kiáⁿ Má-ná-se ê thâu-khak.

15I chiū kā Iok-sek chiok-hok kóng, “Goān góa ê chó͘-sian A-pek-la-hán kap Í-sat ho̍k-sāi ê Siōng-tè, chiū-sī koàn-kò͘ góa it-seng ti̍t-kàu kin-á-ji̍t ê Siōng-tè,

16goān kiù-sio̍k góa thoat-lī só͘-ū ê chai-lān hit-ūi thiⁿ-sài, sù-hok hō͘ chit nn̄g ê gín-á. Goān góa ê miâ, í-ki̍p góa ê chó͘-sian A-pek-la-hán kap Í-sat ê miâ thong-kè in liû-thoân tī sè-kan; goān in tī tōe-chiūⁿ siⁿ-thòaⁿ chin chōe.”

17Iok-sek khòaⁿ-tio̍h i ê lāu-pē ēng chiàⁿ-chhiú hōaⁿ Í-hoat-liân ê thâu-khak, chiū bô hoaⁿ-hí. I chiong lāu-pē ê chiàⁿ-chhiú tháⁿ--khí-lâi, beh tùi Í-hoat-liân sóa kàu Má-ná-se ê thâu-khak.

18Iok-sek tùi i ê lāu-pē kóng, “A-pa, m̄-sī án-ni lah! Chit-ê chiah sī tōa-kiáⁿ, chhiáⁿ kā lí ê chiàⁿ-chhiú hōaⁿ tī i ê thâu-khak.”

19I ê lāu-pē m̄-khéng, kóng, “Góa chai, góa ê kiáⁿ, góa chai. Má-ná-se mā beh chiâⁿ-chòe chi̍t cho̍k, koh kiông-sēng; m̄-kú i ê sió-tī Í-hoat-liân chiong-lâi ōe pí i khah kiông, chiâⁿ-chòe tōa-cho̍k.”

20Hit-ji̍t, Ngá-kok kā in chiok-hok kóng, “ Í-sek-lia̍t -lâng beh ēng lín kā lâng chiok-hok, kóng, ‘Goān Siōng-tè hō͘ lí chhin-chhiūⁿ Í-hoat-liân kap Má-ná-se kâng-khoán.’” Ngá-kok kā Í-hoat-liân pâi tī Má-ná-se ê thâu-chêng.

21Ngá-kok koh kā Iok-sek kóng, “Góa koh chia̍h bô-jōa-kú lah. M̄-kú Siōng-tè ōe kap lín tông-chāi, ōe chhōa lín tò-khì lín lia̍t-chó͘ ê tōe.

22Góa í-chêng ēng keng ēng to, tùi A-mô͘-lī -lâng chhiúⁿ--lâi ê Sī-kiàm hit-tè tōe, góa beh hō͘ lí, hō͘ lí tit--tio̍h-ê pí lí ê hiaⁿ-tī khah chōe.”

← Chapter 47 Jump to: Chapter 49 →