Genesis 37

Chinese TTVR (現代台語譯本羅馬字版)

← Chapter 36 Jump to: Chapter 38 →

1Ngá-kok khiā-khí tī i ê lāu-pē kià-ku ê Ka-lâm -tōe.

2Ē-bīn sī Ngá-kok ê ka-têng ê kì-sū. Iok-sek cha̍p-chhit hè ê sî kap i ê hiaⁿ-ko chòe-hé khì kò͘-iûⁿ; i sī chi̍t ê siàu-liân-lâng, siông-siông kā i lāu-pē ê sòe-î Phek-la kap Sek-phà ê kiáⁿ tàu-kha-chhiú. Iok-sek ōe chiong hiaⁿ-ko ê pháiⁿ phín-hēng kā in lāu-pē pò-kò.

3Tī só͘-ū ê kiáⁿ tiong-kan, Ngá-kok siōng thiàⁿ Iok-sek, in-ūi Iok-sek sī i nî-lāu ê sî siⁿ--ê; i kā Iok-sek chòe chi̍t niá tn̂g-chhiú-ńg ê gōa-phàu.

4Iok-sek ê hiaⁿ-ko khòaⁿ-tio̍h in lāu-pē khah thiàⁿ Iok-sek, chiū oàn-tò͘ i, bô beh kap i hó-hó-á kóng-ōe.

5Iok-sek bāng-kìⁿ chi̍t ê bāng, kā i hiah-ê hiaⁿ-ko kóng; in chiū koh-khah oàn-tò͘ i.

6Iok-sek kā in kóng, “Chhiáⁿ lín thiaⁿ góa kóng góa bāng-tio̍h sím-mi̍h.

7Lán tī hn̂g--ni̍h hâ be̍h-khún; hut-jiân, góa hâ ê be̍h-khún khí-lâi khiā--teh, lín hâ--ê ûi-teh pài góa ê be̍h-khún.”

8I ê hiaⁿ-ko ìn i kóng, “Lí kiám chin-chiàⁿ beh chòe goán ê ông? Chin-chiàⁿ beh koán goán?” In chiū in-ūi i ê bāng kap i ê ōe koh-khah oàn-tò͘ i.

9Āu-lâi, Iok-sek koh bāng-tio̍h chi̍t ê bāng, koh kā i ê hiaⁿ-ko kóng, “Lín khòaⁿ, góa koh bāng-tio̍h chi̍t ê bāng; ji̍t-thâu, ge̍h-niû, kap cha̍p-it lia̍p chhiⁿ lóng teh kā góa pài.”

10Iok-sek chiong chit-ê bāng kā i ê lāu-pē kap hiaⁿ-ko kóng; i ê lāu-pē chiū kā i chek-pī, kóng, “Lí o͘-pe̍h bāng. Kiám kóng góa kap lín lāu-bú, lín hiaⁿ-tī-á, lóng beh phak-pài lí?”

11I ê hiaⁿ-ko lóng oàn-tò͘ i; i ê lāu-pē chiong chit-ê sū kì tī sim-lāi.

12Iok-sek ê hiaⁿ-ko khì Sī-kiàm chhī in lāu-pē ê iûⁿ.

13Ngá-kok kā Iok-sek kóng, “Lín hiaⁿ-ko tī Sī-kiàm chhī iûⁿ. Lí lâi, góa siūⁿ-beh kiò lí khì in hia.” I ìn kóng, “Hó, góa lâi-khì.”

14Ngá-kok kā i kóng, “Lí khì khòaⁿ lín hiaⁿ-ko ū pêng-an, iûⁿ-kûn ū hó-sè á bô; tò-lâi kā góa kóng.” Ngá-kok chiū tī Hi-pek-lûn soaⁿ-kok sàng i chhut-hoat; i chiū khì kàu Sī-kiàm.

15Ū lâng khòaⁿ-tio̍h Iok-sek tī iá-tōe bê-lō͘, chiū mn̄g i kóng, “Lí teh chhē sím-mi̍h?”

16I kóng, “Góa teh chhē góa ê hiaⁿ-ko. Chhiáⁿ kā góa kóng, in tī tó-ūi teh chhī iûⁿ.”

17Hit-ê lâng kā i kóng, “In í-keng lī-khui chia, in-ūi góa ū thiaⁿ-tio̍h in teh kóng, ‘Lán lâi-khì To-tan.’” Iok-sek chiū jip-khì chhē in hiaⁿ-ko; tī To-tan chhē-tio̍h in.

18In tī hn̄g-hn̄g khòaⁿ-tio̍h Iok-sek; i iáu-bē kàu in hia, in chiū kè-bô͘ beh hāi-sí i.

19In hō͘-siōng kóng, “Khòaⁿ leh, hit-ê choh-bāng--ê lâi lah.

20Hō͘-lâi! Lâi kā thâi--sí, kā i hiat tiàm khiⁿ--ni̍h, kóng i hō͘ iá-siù chia̍h--khì; lán chiah khòaⁿ i ê bāng chiong-lâi án-chóaⁿ.”

21Lū-piān thiaⁿ--tio̍h, siūⁿ-beh kiù Iok-sek, chiū kóng, “Lán m̄-thang hāi i ê sìⁿ-miā.”

22Lū-piān koh kā in kóng, “M̄-thang hō͘ i lâu-huih. Lán thang kā i hiat tī chit-ê khòng-iá ê khiⁿ--ni̍h, m̄-thang siong-hāi i.” I án-ni kóng, ì-sù sī beh kiù Iok-sek thoat-lī in ê chhiú, hō͘ i tò-khì in lāu-pē hia.

23Iok-sek kàu i ê hiaⁿ-ko hia, in sûi-sî pak i chhēng--teh hit-niá tn̂g-chhiú-ńg ê gōa-phàu,

24kā i lia̍h--teh, hiat-lo̍h khiⁿ; hit-ê khiⁿ khang-khang, lāi-bīn bô chúi.

25In chē-teh chia̍h-piáⁿ ê sî, gia̍h-thâu khòaⁿ, khòaⁿ-tio̍h chi̍t tīn tùi Ki-lia̍t lâi ê Í-si̍t-má-lī -lâng ê siong-tūi; in ê lo̍k-tô chài hiuⁿ-liāu, jú-hiuⁿ, bu̍t-io̍h beh lo̍h-khì Ai-ki̍p.

26Iû-tāi tùi chiah-ê hiaⁿ-tī kóng, “Lán thâi-sí lán sió-tī, am-khàm lán ê chōe, ū sím-mi̍h lī-ek?

27Lán lâi kā i bōe hō͘ Í-si̍t-má-lī -lâng; m̄-thang hē-chhiú hāi i, in-ūi i sī lán ê sió-tī, lán ê kut-jio̍k.” Hiaⁿ-tī lóng tông-ì.

28Hiah-ê Bí-tiân ê seng-lí-lâng tùi hia kè ê sî, Iok-sek ê hiaⁿ-ko kā i tùi khiⁿ--ni̍h giú--khí-lâi, ēng jī-cha̍p ê gûn chiong i bōe hō͘ Í-si̍t-má-lī -lâng. Hiah-ê lâng chiū tòa Iok-sek khì Ai-ki̍p.

29Lū-piān tò-tńg-lâi khiⁿ hia, khòaⁿ-tio̍h Iok-sek bô tī lāi-bīn, chiū thiah-li̍h ka-kī ê saⁿ,

30tò-khì i ê sió-tī hia, kóng, “Siàu-liân--ê bô--khì ah; góa leh, góa beh án-chóaⁿ?”

31In chiū thâi chi̍t chiah soaⁿ-iûⁿ-káng, chiong Iok-sek hit-niá gōa-phàu kō huih,

32phài lâng the̍h hit-niá saⁿ khì in lāu-pē hia, kóng, “Goán chhē-tio̍h chit-niá, chhiáⁿ jīn khòaⁿ sī m̄-sī lín kiáⁿ ê gōa-phàu.”

33Ngá-kok jīn-tio̍h hit-niá saⁿ, chiū kóng, “Che sī góa ê kiáⁿ ê gōa-phàu. Iok-sek it-tēng hō͘ iá-siù chia̍h--khì, hō͘ iá-siù thiah-chhùi lah!”

34Ngá-kok chiū thiah-li̍h gōa-saⁿ, io hâ môa-pò͘, ūi-tio̍h i ê kiáⁿ Iok-sek ai-siong chōe-chōe ji̍t.

35I ê kiáⁿ kap cha-bó͘-kiáⁿ lóng kā i an-ùi; i m̄-khéng siū an-ùi, kóng, “Góa lêng-khó ai-siong lo̍h-khì Im-hú, khì góa ê kiáⁿ hia.” Ngá-kok ūi-tio̍h Iok-sek thî-khàu.

36Bí-tiân -lâng tòa Iok-sek khì kàu Ai-ki̍p, chiong i bōe hō͘ Hoat-ló ê jîn-sîn sī-ōe-tiúⁿ Pho-thê-hoa̍t.

← Chapter 36 Jump to: Chapter 38 →