Genesis 15

Chinese TTVR (現代台語譯本羅馬字版)

← Chapter 14 Jump to: Chapter 16 →

1Chiah-ê tāi-chì í-āu, Siōng Chú tī īⁿ-siōng tiong tùi A-pek-lân kóng, “ A-pek-lân, m̄-bián kiaⁿ! Góa sī lí ê pó-hō͘-chiá, góa ōe hō͘ lí hong-hù ê pò-siúⁿ.”

2A-pek-lân kóng, “Chì-koân ê Siōng Chú, lí beh hō͘ góa sím-mi̍h? Góa it-ti̍t bô kiáⁿ; beh kè-sêng góa ê châi-sán--ê, sī Tāi-má-sū-kek -lâng Í-lī-í-siā.”

3A-pek-lân koh kóng, “Lí bô hō͘ góa hō͘-sû; chhut-sì tī góa ke-lāi ê po̍k-jîn ōe kè-sêng góa ê châi-sán.”

4Siōng Chú tùi i kóng, “Lí ê kè-sêng-jîn m̄-sī chit-ê lâng; lí chhin-siⁿ--ê, chiah sī lí ê hō͘-sû.”

5Siōng Chú chiū chhōa i chhut-khì gōa-bīn, kóng, “Lí khòaⁿ thiⁿ, sǹg hiah-ê chhiⁿ. Lí kiám sǹg ōe liáu? Lí ê hō͘-tāi mā ōe chhin-chhiūⁿ án-ni.”

6A-pek-lân sìn Siōng Chú, Siōng Chú chiū kā i sǹg chòe gī.

7Siōng Chú koh tùi i kóng, “Góa sī Siōng Chú. Góa chhōa lí lī-khui Pa-pí-lûn ê Ngô͘-ní -siâⁿ, sī beh chiong chit-ê tōe sù lí chòe sán-gia̍p.”

8A-pek-lân kóng, “Chì-koân ê Siōng Chú, góa beh án-chóaⁿ chai ōe tit-tio̍h chit-ê tōe chòe sán-gia̍p?”

9Siōng Chú kā i kóng, “Lí khì lia̍h chi̍t chiah saⁿ-hè ê gû-bú, chi̍t chiah saⁿ-hè ê soaⁿ-iûⁿ-bú, chi̍t chiah saⁿ-hè ê mî-iûⁿ-káng, chi̍t chiah pan-kah, chi̍t chiah hún-chiáu-á-kiáⁿ lâi.”

10I chiū khì lia̍h hiah-ê tōng-bu̍t lâi, ta̍k-chiah tùi tiong-ng phòa-chòe nn̄g pêng, nn̄g pêng pâi sio-tùi; chí-ū chiáu-á bô phòa-khui.

11Ū thuh-thâu-eng pe lo̍h-lâi thêng tī cheng-siⁿ si-thé ê téng-bīn, A-pek-lân kā in kóaⁿ-cháu.

12Ji̍t beh lo̍h ê sî, A-pek-lân khùn tāng-bîn; hut-jiân ū hō͘ lâng kiaⁿ-hiâⁿ ê tōa o͘-àm tà-óa.

13Siōng Chú tùi A-pek-lân kóng, “Lí it-tēng tio̍h chai, lí ê hō͘-tāi ōe kià-ku tī pa̍t-lâng ê tōe, chòe hia ê lâng ê lô͘-lē, siū-khó͘ sì-pah nî.

14Khi-ap in ê kok-ka, góa ōe kā i sím-phòaⁿ; āu-lâi in ōe tòa chin chōe châi-bu̍t tùi hia chhut--lâi.

15Lí ōe chia̍h tn̂g-hè-siū, hō͘ lâng an-chòng, pêng-pêng-an-an tńg-khì lín chó͘-sian hia.

16Kàu tē-sì tāi, in ōe tò-lâi chia, in-ūi A-mô͘-lī -cho̍k ê chōe iáu-bē koàn-boán.”

17Ji̍t lo̍h thiⁿ àm, hut-jiân ū chhut-ian ê lô͘, kap teh to̍h ê hé-pé, tùi hiah-ê phòa-pêng ê bah ê tiong-kan keng-kè.

18Hit-ji̍t Siōng Chú kap A-pek-lân li̍p-iok, kóng, “Góa beh chiong tùi Ai-ki̍p ê pian-kài kàu Iù-hoat-la-tí-hô chit-ê tōe sù hō͘ lí ê hō͘-tāi,

19chiū-sī chiong Ki-nî -lâng, Ki-nî-sé -lâng, Kah-mô͘-nî -lâng,

20Hek -lâng, Pí-lī-sé -lâng, Lī-hoa̍t-im -lâng,

21A-mô͘-lī -lâng, Ka-lâm -lâng, Kek-ka-sat -lâng, Iâ-pò͘-su -lâng in ê tōe sù hō͘ lí ê hō͘-tāi.”

← Chapter 14 Jump to: Chapter 16 →