Genesis 26

Chinese TTVR (現代台語譯本羅馬字版)

← Chapter 25 Jump to: Chapter 27 →

1Í-sat tòa ê só͘-chāi, tī A-pek-la-hán chāi-siⁿ ê sî bat hoat-seng ki-hng, hiān-chāi koh ū ki-hng. Í-sat chiū khì Ki-la-ní, kàu Hui-lī-sū -lâng ê ông A-pí-bí-le̍k hia.

2Siōng Chú tùi Í-sat hián-hiān, kóng, “Lí m̄-thang lo̍h-khì Ai-ki̍p, tio̍h tòa tī góa chí-sī lí ê tōe.

3Lí tio̍h kià-ku tī chia, góa beh kap lí tông-chāi, sù-hok lí; in-ūi góa beh chiong chit-ê tōe lóng hō͘ lí kap lí ê hō͘-tāi; góa mā beh kian-li̍p góa li̍p-sè tùi lí ê lāu-pē A-pek-la-hán só͘ li̍p ê iok.

4Góa beh hō͘ lí ê hō͘-tāi jîn-sò͘ ke-thiⁿ, chhin-chhiūⁿ thiⁿ-téng ê chhiⁿ hiah chōe; koh beh chiong chiah-ê tōe lóng sù hō͘ lí ê hō͘-tāi; beh hō͘ tōe-chiūⁿ bān-cho̍k in-ūi lí ê hō͘-tāi tit-tio̍h hok-khì,

5che sī in-ūi A-pek-la-hán ū thiaⁿ-thàn góa ê ōe, chun-siú góa ê hoan-hù, bēng-lēng, kui-lē, kap kà-sī.”

6Í-sat tòa tī Ki-la-ní.

7Hit só͘-chāi ê lâng kóng-tio̍h i ê bó͘, i chiū kóng “Sī góa ê sió-bē”, m̄-káⁿ kóng “Sī góa ê bó͘”. I sim-lāi siūⁿ-kóng, “In-ūi Lē-pek-ka siⁿ-chòe chin súi, kiaⁿ-liáu hit só͘-chāi ê lâng ūi-tio̍h i ê iân-kò͘ kā góa thâi.”

8I tī hia tòa chin kú. Ū chi̍t ji̍t, Hui-lī-sū -ông A-pí-bí-le̍k tùi thang-á khòaⁿ--chhut-khì, khòaⁿ-tio̍h Í-sat kap i ê bó͘ Lē-pek-ka teh saⁿ chhin-jia̍t.

9A-pí-bí-le̍k kiò Í-sat lâi, kā i kóng, “I bêng-bêng sī lí ê bó͘, lí ná ōe kóng ‘I sī góa ê sió-bē’?” Í-sat kóng, “Góa siūⁿ-kóng góa ōe in-ūi i hō͘ lâng thâi-sí.”

10A-pí-bí-le̍k kóng, “Lí ná ōe tùi goán chòe chit-khoán tāi-chì? Jîn-bîn ê tiong-kan hiám-hiám ū lâng kap lí ê bó͘ chòe-hé khùn; lí chiū hāi goán hoān-chōe.”

11A-pí-bí-le̍k chiū bēng-lēng jîn-bîn, kóng, “Nā ū lâng kha̍p-tio̍h chit-ê lâng kap i ê bó͘, it-tēng beh hō͘ i sí.”

12Í-sat tī hit só͘-chāi chèng-choh, hit-nî tit-tio̍h pah-pē ê siu-sêng, in-ūi Siōng Chú sù-hok i.

13I ê ke-gia̍p put-toān cheng-ka, hui-siông hó-gia̍h.

14I ê gû iûⁿ chin chōe, koh ū chin chōe po̍k-jîn; Hui-lī-sū -lâng chiū oàn-tò͘ i.

15I ê lāu-pē A-pek-la-hán oa̍h--teh ê sî, po̍k-jîn khui ê chíⁿ, Hui-lī-sū -lâng lóng kā in that--teh, ēng thô͘ thūn--khí-lâi.

16A-pí-bí-le̍k tùi Í-sat kóng, “Lí tio̍h lī-khui goán, in-ūi lí pí goán ke chiok kiông-sēng.”

17Í-sat chiū lī-khui hia, khì Ki-la-ní ê soaⁿ-kok tah pò͘-pîⁿ khiā-khí.

18I ê lāu-pē A-pek-la-hán chāi-siⁿ ê sî khui ê chíⁿ, lóng hō͘ Hui-lī-sū -lâng thūn--khì. Í-sat têng-chài khui hiah-ê chíⁿ, chiàu in lāu-pē só͘ hō ê miâ kā hiah-ê chíⁿ hō-miâ.

19Í-sat ê po̍k-jîn tī soaⁿ-kok ó͘ chíⁿ, ó͘-tio̍h chi̍t kháu oa̍h-chúi ê chíⁿ.

20Ki-la-ní ê bo̍k-chiá kap Í-sat ê bo̍k-chiá saⁿ-chiⁿ, kóng, “Chit-kháu chíⁿ sī goán ê.” Í-sat chiū kā hit-kháu chíⁿ hō-miâ kiò-chòe Ai-sek; in-ūi in kap i saⁿ-chiⁿ.

21Í-sat ê po̍k-jîn koh ó͘ chi̍t kháu chíⁿ, in koh ūi-tio̍h chit-kháu chíⁿ saⁿ-chiⁿ; Í-sat chiū kā i hō-miâ kiò-chòe Se-thê-ná.

22Í-sat lī-khui hia, koh khì khui chi̍t kháu chíⁿ; in bô koh ūi-tio̍h chit-kháu chíⁿ saⁿ-chiⁿ. Í-sat chiū kā i hō-miâ kiò-chòe Lī-hô-pek; i kóng, “Taⁿ Siōng Chú hō͘ goán khui-khoah ê tōe thang hoat-tián; goán beh tī chit-ê tōe heng-ōng.”

23Í-sat tùi hia chiūⁿ-khì Pia̍t-sī-pa.

24Hit-mî, Siōng Chú tùi i hián-hiān, kóng, “Góa sī lí ê lāu-pē A-pek-la-hán ê Siōng-tè. M̄-bián kiaⁿ, in-ūi góa kap lí tông-chāi; góa beh ūi-tio̍h góa ê po̍k-jîn A-pek-la-hán ê iân-kò͘ sù-hok lí, hō͘ lí ê hō͘-tāi heng-ōng.”

25Í-sat chiū tī hia khí chi̍t chō chè-tôaⁿ, kèng-pài Siōng Chú, tah pò͘-pîⁿ khiā-khí. I ê po̍k-jîn tī hia ó͘ chi̍t kháu chíⁿ.

26A-pí-bí-le̍k chhōa i ê kò͘-būn A-hō͘-sat kap goân-sòe Hui-kok, tùi Ki-la-ní lâi kìⁿ Í-sat.

27Í-sat tùi in kóng, “Lín kì-jiân oàn-hūn góa, kā góa kóaⁿ-cháu, sī-án-chóaⁿ koh lâi chhē góa?”

28In kóng, “Goán chheng-chhó chai Siōng Chú kap lí tông-chāi, só͘-í goán siūⁿ, lán siang-hong lâi chiù-chōa, li̍p-iok.

29Lí m̄-thang siong-hāi goán, chhin-chhiūⁿ goán m̄-bat kha̍p-tio̍h lí; í-chêng goán hó khoán-thāi lí, koh sàng lí an-choân lī-khui. Taⁿ Siōng Chú ū sù-hok lí.”

30Í-sat pān-toh chhiáⁿ in, in chiū chòe-hé lim-chia̍h.

31Keh-ji̍t thàu-chá, in hō͘-siōng chiù-chōa. Í-sat sàng in khí-sin, in chiū pêng-an lī-khui.

32Siâng hit-ji̍t, Í-sat ê po̍k-jîn lâi, chiong in khui-chíⁿ ê sū kā i pò-kò, kóng, “Goán ó͘-tio̍h chúi lah.”

33Í-sat chiū kā hit-kháu chíⁿ kiò-chòe Sī-pa; só͘-í kàu kin-á-ji̍t, hit-ê siâⁿ kiò-chòe Pia̍t-sī-pa.

34Í-sò sì-cha̍p hè ê sî chhōa Hek -lâng Pī-lī ê cha-bó͘-kiáⁿ Iû-tek, kap Hek -lâng Í-lûn ê cha-bó͘-kiáⁿ Pa-si̍t-boat chòe bó͘.

35Chit nn̄g ê hū-jîn-lâng siông-siông hō͘ Í-sat kap Lē-pek-ka sim-lāi iu-būn chhau-hoân.

← Chapter 25 Jump to: Chapter 27 →