Genesis 8

Chinese TTVR (現代台語譯本羅馬字版)

← Chapter 7 Jump to: Chapter 9 →

1Siōng-tè bô bōe-kì-tit Ná-a, í-ki̍p kap Ná-a tī tōa-chûn lāi-bīn ê cheng-siⁿ kap iá-siù; Siōng-tè hō͘ hong chhe tāi-tōe, chúi chiū chiām-chiām siau-thè.

2Chhim-ian ê chúi-goân kap thiⁿ-téng ê chúi-mn̂g lóng koaiⁿ-ba̍t; thiⁿ bô koh lo̍h-hō͘.

3Chúi tùi tōe-chiūⁿ chiām-chiām thè--khì; chi̍t-pah gō͘-cha̍p ji̍t āu, chúi ti̍t-ti̍t siau-thè.

4Chhit-ge̍h cha̍p-chhit, chûn tiâu tī A-la-la̍h-soaⁿ.

5Chúi koh chiām-chiām thè, it-ti̍t kàu cha̍p--ge̍h. Cha̍p-ge̍h chhoe-it, soaⁿ-thâu chiah chhut-hiān.

6Kè sì-cha̍p ji̍t, Ná-a khui i só͘ chòe tōa-chûn ê thang-á,

7pàng chi̍t chiah o͘-a chhut--khì; o͘-a pe--lâi koh pe--khì, it-ti̍t kàu tāi-tōe ê chúi siau-thè.

8I koh pàng chi̍t chiah hún-chiáu chhut--khì, beh khòaⁿ chúi tùi tōe-bīn siau-thè á bē.

9M̄-kú hún-chiáu chhē bô hioh-khùn ê só͘-chāi, chiū pe tńg-lâi tōa-chûn Ná-a hia, in-ūi choân-tōe iáu ū chúi. Ná-a chhun-chhiú chiap i, tòa-ji̍p tōa-chûn.

10Chhit ji̍t āu, Ná-a koh pàng hún-chiáu chhut--khì.

11Kàu ē-hng, hún-chiáu tò-lâi i hia, chhùi kā chi̍t hio̍h sin ê kaⁿ-ná-chhiū-hio̍h; Ná-a chiah chai, chúi í-keng siau-thè.

12I koh thèng-hāu chhit ji̍t, pàng hún-chiáu chhut--khì; hún-chiáu chiū bô koh tò--lâi.

13Kàu Ná-a la̍k-pah khòng chi̍t hè, chiaⁿ-ge̍h chhoe-it, tōe-bīn ê chúi lóng ta; Ná-a phah-khui tōa-chûn ê kòa, khòaⁿ-tio̍h tōe-bīn í-keng ta.

14Jī-ge̍h jī-chhit, thó͘-tōe lóng ta lah.

15Siōng-tè tùi Ná-a kóng,

16“Lí kap lí ê bó͘, lí ê kiáⁿ, lí ê sin-pū lóng tio̍h chhut tōa-chûn.

17Lí mā tio̍h hō͘ hiah-ê ū jio̍k-thé ê oa̍h-mi̍h, pau-koat pe-chiáu, cheng-siⁿ, kap teh pê ê tōng-bu̍t lóng chhut--lâi, hō͘ in tī tōe-chiūⁿ siⁿ-thòaⁿ, ke-thiⁿ chin chōe.”

18Ná-a chiū kap i ê kiáⁿ, i ê bó͘, i ê sin-pū lóng chhut--lâi;

19só͘-ū ê cháu-siù, pe-chiáu, teh pê ê tōng-bu̍t, kap tōe-chiūⁿ it-chhè ê oa̍h-mi̍h, kok chiàu in ê chióng-lūi mā lóng chhut tōa-chûn.

20Ná-a ūi-tio̍h Siōng Chú khí chi̍t chō chè-tôaⁿ; tùi lé-gî-siōng chheng-khì ê cheng-siⁿ kap pe-chiáu tiong-kan, tòa chi̍t-pō͘-hūn lâi tī chè-tôaⁿ téng hiàn-chòe sio-hòa-chè.

21Siōng Chú phīⁿ-tio̍h chè-mi̍h ê phang-bī, sim-lāi chiū kóng, “Góa bô beh koh in-ūi lâng ê iân-kò͘ chiù-chó͘ thó͘-tōe, sui-jiân lâng tùi sòe-hàn sim só͘ siūⁿ--ê lóng sī pháiⁿ; góa bô beh koh chiàu góa í-chêng só͘ chòe--ê húi-bia̍t só͘-ū ê oa̍h-mi̍h.

22Tāi-tōe nā iáu chûn-chāi, chai-chèng siu-sêng, kôaⁿ joa̍h, tang-thiⁿ hē-thiⁿ, ji̍t--sî mî--sî, lóng ōe kè-sio̍k.”

← Chapter 7 Jump to: Chapter 9 →