Genesis 25

Chinese TTVR (現代台語譯本羅馬字版)

← Chapter 24 Jump to: Chapter 26 →

1A-pek-la-hán koh chhōa Ki-thó͘-la chòe bó͘.

2Ki-thó͘-la kā i siⁿ Sim-lân, Iok-san, Bí-tān, Bí-tiân, I-si-pa, kap Su-a.

3Iok-san siⁿ Sī-pa kap Tí-tān. Tí-tān ê hō͘-tāi sī A-su-lī -lâng, Lī-to͘-sī -lâng, kap Lī-o͘-bí -lâng.

4Bí-tiân ê kiáⁿ sī Í-hoat, Í-hut, Í-lo̍k, A-pí-tāi, Í-le̍k-tāi; chiah-ê lóng sī Ki-thó͘-la ê hō͘-tāi.

5A-pek-la-hán chiong i it-chhè só͘ ū--ê hō͘ Í-sat.

6A-pek-la-hán mā thàn i iáu oa̍h--teh ê sî, chiong châi-bu̍t pun hō͘ i ê sòe-î hiah-ê kiáⁿ, koh kiò in lī-khui i ê kiáⁿ Í-sat khì tang-pêng ê tōe.

7A-pek-la-hán it-seng oa̍h chi̍t-pah chhit-cha̍p gō͘ hè.

8A-pek-la-hán chia̍h tn̂g-hè-siū, pêng-pêng-an-an tńg-khì i ê chó͘-sian hia.

9I ê kiáⁿ Í-sat kap Í-si̍t-má-lī chiong i an-chòng tī Bān-lī tùi-bīn ê Be̍k-pí-la tōng-hia̍t, sī tī A-pek-la-hán tùi Hek -lâng Só-hat ê kiáⁿ Í-hut-lûn bóe--lâi hit-khu hn̂g ê lāi-bīn. A-pek-la-hán kap i ê bó͘ Sa-la lóng bâi-chòng tī hia.

11A-pek-la-hán sí liáu-āu, Siōng-tè sù-hok hō͘ i ê kiáⁿ Í-sat; Í-sat tòa tī Pí-ní La-hái Lâi hù-kūn.

12Ē-bīn sī A-pek-la-hán ê kiáⁿ Í-si̍t-má-lī ê hō͘-tāi: Í-si̍t-má-lī sī Sa-la ê lú-pī Ai-ki̍p -lâng Hā-kah kā A-pek-la-hán siⁿ ê kiáⁿ.

13Í-si̍t-má-lī chiah-ê kiáⁿ chiàu in chhut-sì ê sūn-sū siá tī ē-bīn: Í-si̍t-má-lī ê tōa-kiáⁿ Nî-pài-iok, koh ū Ki-ta̍t, A-tek-pia̍t, Bí-pí-san,

14Bí-si-má, Tō͘-má, Má-sat,

15Hap-tāi, Thê-má, I-tu̍t, Ná-hui-si, Ki-tí-má;

16chiah-ê lóng sī Í-si̍t-má-lī ê kiáⁿ, chòe cha̍p-jī cho̍k ê cho̍k-tiúⁿ. In tòa ê chng-siā kap iâⁿ-tōe, lóng chiàu in ê miâ lâi hō.

17Í-si̍t-má-lī oa̍h chi̍t-pah saⁿ-cha̍p chhit hè chiū kè-sin, tńg-khì i ê chó͘-sian hia.

18I ê hō͘-tāi tòa tī tùi Hap-hui-la kàu Ai-ki̍p tang-pêng ê Su-ní, beh khì A-su̍t ê lō͘ hit-ê tōe-khu; khiā-khí tī i chhin-cho̍k ê tùi-bīn.

19Ē-bīn sī A-pek-la-hán ê kiáⁿ Í-sat ê hō͘-tāi: A-pek-la-hán siⁿ Í-sat;

20Í-sat sì-cha̍p hè ê sî chhōa Lē-pek-ka chòe bó͘. Lē-pek-ka sī Bí-soh-put-ta̍t-bí-a ê A-lân -lâng Pí-thó͘-lī ê cha-bó͘-kiáⁿ, La-pan ê sió-bē.

21Í-sat in-ūi i ê bó͘ bōe siⁿ, chiū ūi-tio̍h i kî-kiû Siōng Chú; Siōng Chú èng-ún i ê khún-kiû, i ê bó͘ Lē-pek-ka chiū hoâi-īn.

22Nn̄g ê siang-siⁿ-á tī Lē-pek-ka ê pak-tó͘ lāi sio-khoeh, hō͘ i chin kan-khó͘; i chiū kóng, “Sī-án-chóaⁿ góa tio̍h chiah kan-khó͘?” I chiū mn̄g Siōng Chú.

23Siōng Chú kā i kóng: Nn̄g kok tī lí ê pak-tó͘ lāi; nn̄g cho̍k beh tùi lí ê seng-khu chhut; chi̍t cho̍k beh pí lēng-gōa chi̍t cho̍k khah kiông; tōa--ê beh ho̍k-sāi sòe--ê.

24Seng-sán ê sî kàu, kó-jiân pak-tó͘ lāi sī siang-siⁿ-á.

25Tāi-seng chhut--lâi-ê, seng-khu âng-âng, kui seng-khu hoat mn̂g chhin-chhiūⁿ chhēng phê-saⁿ; chiū kā i hō-miâ kiò-chòe Í-sò.

26Tè-āu, i ê sió-tī koh chhut--lâi, chhiú giú Í-sò ê kha-āu-tiⁿ; chiū kā hō-miâ kiò Ngá-kok. Nn̄g ê kiáⁿ chhut-sì ê sî, Í-sat tú-á la̍k-cha̍p hè.

27Nn̄g ê gín-á chiām-chiām tōa-hàn; Í-sò gâu phah-la̍h, siông-siông tī soaⁿ-iá; Ngá-kok kò-sèng an-chēng, siông-siông tī pò͘-pîⁿ lāi.

28Í-sat thiàⁿ Í-sò, in-ūi siông-siông chia̍h Í-sò phah--lâi ê iá-bī. Lē-pek-ka thiàⁿ Ngá-kok.

29Ū chi̍t ji̍t Ngá-kok teh khòng-thng, Í-sò tùi soaⁿ-iá tò--lâi, seng-khu chin thiám.

30Í-sò kā Ngá-kok kóng, “Góa thiám kah beh sí, pài-thok lí chiong hit-ê âng-âng ê thng hō͘ góa chia̍h.” In-ūi án-ni, Í-sò mā kiò-chòe Í-tong.

31Ngá-kok kóng, “Lí seng chiong tōa-kiáⁿ ê bêng-hūn bōe hō͘ góa.”

32Í-sò kóng, “Góa to iau kah beh sí ah, chit-ê tōa-kiáⁿ ê bêng-hūn tùi góa ū siáⁿ lō͘-ēng?”

33Ngá-kok kóng, “Lí tio̍h seng chiù-chōa.” Í-sò chiū tùi i chiù-chōa, chiong tōa-kiáⁿ ê bêng-hūn bōe hō͘ i.

34Ngá-kok chiū chiong piáⁿ kap âng-tāu-thng hō͘ Í-sò; i chiū chia̍h, chia̍h-liáu chiū chòe i khì. Án-ni, Í-sò khòaⁿ-khin i tōa-kiáⁿ ê bêng-hūn.

← Chapter 24 Jump to: Chapter 26 →