Genesis 29

Chinese TTVR (現代台語譯本羅馬字版)

← Chapter 28 Jump to: Chapter 30 →

1Ngá-kok kè-sio̍k kiâⁿ, khì kàu tang-hng ê lâng ê tōe.

2I khòaⁿ-tio̍h iá-tōe ū chi̍t kháu chíⁿ, ū saⁿ tīn iûⁿ tó tī hia; lâng lóng chhiūⁿ hit-kháu chíⁿ ê chúi hō͘ iûⁿ lim. Chíⁿ ēng tōa tè chio̍h khàm--teh.

3Pêng-sî, iûⁿ-kûn chū-chi̍p tī hia, kò͘-iûⁿ--ê chiong chio̍h-thâu sóa-khui, chhiūⁿ-chúi hō͘ iûⁿ lim, chiah koh chiong chio̍h-thâu sóa tò-khì goân-ūi.

4Ngá-kok tùi in kóng, “Pêng-iú ah, lín tùi tó-ūi lâi?” In kóng, “Goán tùi Hap-lân lâi.”

5I mn̄g in, “Lín kiám bat Ná-ho̍k ê sun La-pan?” In kóng, “Goán bat.”

6Ngá-kok koh kóng, “I ū hó-sè hó-sè bô?” In kóng, “Ū. Lí khòaⁿ, i ê cha-bó͘-kiáⁿ Lúi-kiat chhōa i ê iûⁿ-kûn teh lâi.”

7Ngá-kok kóng, “Ji̍t-thâu iáu chiah tōa, iáu-bē kàu kóaⁿ iûⁿ tńg--khì ê sî-kan, ná m̄ hō͘ iûⁿ lim-chúi, koh khì chia̍h-chháu?”

8In kóng, “Goán iáu bōe-tàng, tio̍h thèng-hāu só͘-ū ê iûⁿ-kûn lóng kàu, bo̍k-chiá kā chio̍h-thâu sóa-khui, chiah ōe-tàng hō͘ iûⁿ lim-chúi.”

9Ngá-kok teh kap in kóng-ōe ê sî, Lúi-kiat chhōa in lāu-pē ê iûⁿ lâi, in-ūi sī i teh kò͘.

10Ngá-kok khòaⁿ-tio̍h bú-kū La-pan ê cha-bó͘-kiáⁿ Lúi-kiat kap La-pan ê iûⁿ-kûn, chiū chìn-chêng chiong chio̍h-thâu sóa-khui, hō͘ La-pan ê iûⁿ-kûn lim.

11Ngá-kok chim Lúi-kiat, kā i chhéng-an, koh tōa-siaⁿ háu.

12Ngá-kok kā Lúi-kiat kóng, i sī in lāu-pē ê gōe-seng-á, sī Lē-pek-ka ê kiáⁿ; Lúi-kiat chiū cháu tńg-khì kā in lāu-pē kóng.

13La-pan thiaⁿ-tio̍h gōe-seng-á Ngá-kok ê siau-sit, chiū cháu-khì chiap i, kā i lám--teh, kā i chim, chhōa i khì in tau; Ngá-kok chiong tāi-chì ê keng-kè kā La-pan kóng.

14La-pan kā Ngá-kok kóng, “Lí chin-chiàⁿ sī góa ê kut-jio̍k chì-chhin.” Ngá-kok chiū kap i tòa chi̍t ge̍h-ji̍t.

15La-pan kā Ngá-kok kóng, “Lán sui-jiân sī chhin-chiâⁿ, góa ná thang hō͘ lí pe̍h-pe̍h kā góa chòe kang? Lí tio̍h kā góa kóng, góa tio̍h hō͘ lí jōa-chōe kang-chîⁿ.”

16La-pan ū nn̄g ê cha-bó͘-kiáⁿ, tōa--ê kiò-chòe Lē-a, sòe--ê kiò-chòe Lúi-kiat.

17Lē-a ba̍k-chiu súi, Lúi-kiat sin-châi hó, siⁿ-chòe súi.

18Ngá-kok ài Lúi-kiat, chiū kóng, “Góa goān-ì ūi-tio̍h lí ê sòe-hàn cha-bó͘-kiáⁿ Lúi-kiat chòe kang chhit nî.”

19La-pan kóng, “Kā i kè hō͘ lí, pí kè hō͘ pa̍t-lâng khah hó. Lí kap góa tòa.”

20Ngá-kok chiū ūi-tio̍h Lúi-kiat kā La-pan chòe kang chhit nî; in-ūi chhim-chhim ài i, chhit nî ká-ná chhin-chhiūⁿ kúi-ji̍t-á.

21Ngá-kok tùi La-pan kóng, “Chhit nî móa lah, chhiáⁿ lí chiong góa ê bó͘ hō͘ góa, góa thang kap i kiat-hun.”

22La-pan pān-toh chhiáⁿ hit só͘-chāi ê lâng.

23Kàu ji̍t àm, La-pan chiong i ê cha-bó͘-kiáⁿ Lē-a sàng-lâi hō͘ Ngá-kok, i chiū kap Lē-a tâng-pâng.

24La-pan chiong i ê lú-pī Sek-phà hō͘ i ê cha-bó͘-kiáⁿ Lē-a chòe lú-pī.

25Kàu thiⁿ-kng, Ngá-kok chi̍t-ē khòaⁿ-tio̍h sī Lē-a, chiū tùi La-pan kóng, “Lí ná ōe án-ni tùi-thāi góa? Góa kā lí chòe kang, kiám m̄-sī ūi-tio̍h Lúi-kiat? Lí sī-án-chóaⁿ khi-phiàn góa?”

26La-pan kóng, “Iáu-bē kè tōa--ê, seng kè sòe--ê, tī goán chia bô chit-ê lē.

27Lí kap Lē-a chhit ji̍t ê hí-sū liáu-āu, goán chiū chiong Lúi-kiat kè hō͘ lí, m̄-kú lí tio̍h koh kā góa chòe kang chhit nî.”

28Ngá-kok chiū chiàu án-ni chòe. I kap Lē-a chòe-hé chhit ji̍t liáu-āu, La-pan chiū chiong i ê cha-bó͘-kiáⁿ Lúi-kiat hō͘ Ngá-kok chòe bó͘.

29La-pan chiong i ê lú-pī Phek-la hō͘ Lúi-kiat chòe lú-pī.

30Ngá-kok mā kap Lúi-kiat tâng-pâng; i khah thiàⁿ Lúi-kiat, chiū koh kā La-pan chòe kang chhit nî.

31Siōng Chú khòaⁿ-tio̍h Lē-a bô siū thiàⁿ-sioh, chiū hō͘ i hoâi-īn; m̄-kú Lúi-kiat bōe siⁿ.

32Lē-a hoâi-īn siⁿ-kiáⁿ, chiū kā i hō-miâ kiò-chòe Lū-piān; i kóng, “Siōng Chú khòaⁿ-kìⁿ góa ê khó͘-chêng; taⁿ góa ê tiōng-hu ōe thiàⁿ góa.”

33I koh hoâi-īn siⁿ tē-jī ê kiáⁿ; i kóng “Siōng Chú thiaⁿ-kìⁿ góa bô siū thiàⁿ-sioh, só͘-í koh hō͘ góa chit-ê kiáⁿ”, chiū kā i hō-miâ kiò-chòe Se-biān.

34I koh hoâi-īn siⁿ tē-saⁿ ê kiáⁿ, kóng “Góa kā tiōng-hu siⁿ saⁿ ê kiáⁿ, i ōe kap góa kiat-liân”, chiū kā i hō-miâ kiò-chòe Lī-bī.

35I koh hoâi-īn siⁿ tē-sì ê kiáⁿ, kóng “Chit-piàn góa beh chheng-chàn Siōng Chú”, chiū kā i hō-miâ kiò-chòe Iû-tāi; Lē-a chiū bô koh siⁿ.

← Chapter 28 Jump to: Chapter 30 →