Genesis 12

Chinese TTVR (現代台語譯本羅馬字版)

← Chapter 11 Jump to: Chapter 13 →

1Siōng Chú tùi A-pek-lân kóng, “Lí tio̍h lī-khui pún-tōe, pún-cho̍k, lín lāu-pē ê ke, khì góa beh chí-sī lí ê tōe.

2Góa beh hō͘ lí chiâⁿ-chòe tōa-kok, beh sù-hok lí, hō͘ lí ê miâ siū kèng-tiōng, lí mā beh hō͘ lâng tit-tio̍h hok-khì.

3Chiok-hok lí--ê, góa beh sù-hok hō͘ in; chiù-chó͘ lí--ê, góa beh chiù-chó͘ i; tōe-chiūⁿ bān-cho̍k beh in-ūi lí tit-tio̍h hok-khì.”

4A-pek-lân chiàu Siōng Chú ê hoan-hù, chiū chhut--khì, Lô-tek mā kap i khì. A-pek-lân lī-khui Hap-lân ê sî chhit-cha̍p gō͘ hè.

5A-pek-lân chhōa i ê bó͘ Sa-lâi kap i ê ti̍t-á Lô-tek chhut-hoat, koh tòa in tī Hap-lân só͘ chek-chū ê châi-bu̍t, tit--tio̍h ê po̍k-jîn lú-pī, beh khì Ka-lâm -tōe. In lâi kàu Ka-lâm -tōe,

6A-pek-lân kè-sio̍k kiâⁿ, lâi kàu Sī-kiàm ê Mô͘-lī siōng-chhiū hia; hit-sî Ka-lâm -lâng tòa tī hit-ê tōe.

7Siōng Chú tùi A-pek-lân hián-hiān, kóng, “Góa beh chiong chit-ê tōe siúⁿ-sù lí ê hō͘-tāi.” I chiū tī hia ūi-tio̍h tùi i hián-hiān ê Siōng Chú khí chi̍t chō chè-tôaⁿ.

8I koh tùi hia sóa kàu Pek-te̍k-lī tang-pêng ê soaⁿ-khu, tah pò͘-pîⁿ, tī hia ūi-tio̍h Siōng Chú khí chi̍t chō tôaⁿ, kiû-kiò Siōng Chú ê miâ; hit-ê só͘-chāi sai-pêng sī Pek-te̍k-lī, tang-pêng sī Ai.

9A-pek-lân chiām-chiām sóa-khì lâm-pêng ê Nî-kek-hu.

10Hit-ê tōe ki-hng chin giâm-tiōng. A-pek-lân lo̍h-khì Ai-ki̍p, kià-ku tī hia.

11Teh-beh kàu Ai-ki̍p ê sî, A-pek-lân tùi i ê bó͘ Sa-lâi kóng, “Góa chai lí sī siⁿ-chòe chin súi ê hū-jîn-lâng;

12Ai-ki̍p -lâng nā khòaⁿ-tio̍h lí, ōe kóng, ‘Chit-ê sī i ê bó͘.’ In ōe kā góa thâi-sí, hō͘ lí oa̍h--teh.

13Pài-thok lí kóng lí sī góa ê sió-bē, hō͘ góa thang in-ūi án-ni pêng-an bô-sū, bián hō͘ lâng thâi-sí.”

14A-pek-lân kàu Ai-ki̍p ê sî, Ai-ki̍p -lâng khòaⁿ-tio̍h hit-ê hū-jîn-lâng ū-kàu súi.

15Hoat-ló ê jîn-sîn khòaⁿ-tio̍h i, chiū tī Hoat-ló ê bīn-chêng o-ló i ê súi. Hit-ê hū-jîn-lâng chiū hō͘ lâng tòa ji̍p-khì Hoat-ló ê ông-kiong.

16Hoat-ló in-ūi chit-ê hū-jîn-lâng hó khoán-thāi A-pek-lân; A-pek-lân chiū tit-tio̍h gû, iûⁿ, kang ê lû, bú ê lû, lo̍k-tô, í-ki̍p po̍k-jîn kap lú-pī.

17Siōng Chú in-ūi A-pek-lân ê bó͘ Sa-lâi ê iân-kò͘, kàng tōa chai-hō tī Hoat-ló kap i ê choân-ke.

18Hoat-ló chiū kiò A-pek-lân lâi, kóng, “Lí ná tùi góa chòe chit-khoán tāi-chì? Bô kā góa kóng i sī lí ê bó͘?

19Sī-án-chóaⁿ lí kóng i sī lí ê sió-bē, soah hāi góa kā i chhōa-lâi chòe bó͘? Taⁿ lí ê bó͘ tī chia, chhōa--tńg-khì.”

20Hoat-ló chiū bēng-lēng pō͘-hā sàng A-pek-lân, i ê bó͘, kap i it-chhè só͘ ū--ê lī-khui.

← Chapter 11 Jump to: Chapter 13 →