2 Chronicles 1

Kirundi (Bibliya Yera 1951, 1967 (Burundi))

Jump to: Chapter 2 →

1Nuko Salomo mwene Dawidi ashikama ku ngoma yiwe, kand’ Uhoraho Imana yiwe abana na we, amushira hejuru cane.

2Salomo acūrira amajambo Abisirayeli bose, abagabisha bagaba ibihumbi n’abagaba amajana, n’ abacamanza, n’abaganwa bose b’ Abisirayeli, n’abakuru b’amazu ya ba sekuruza.

3Nuko Salomo ajana n’ikoraniro ryose, baja mu gitabo co ku mpinga y’umusozi i Gibeyoni, kukw aho ari ho ihema ry’ibonaniro ry’Imana ryari riri, iryo Mose umusavyi w’Uhoraho yakoreye mu bugaragwa.

4Arikw isandugu y’Imana Dawidi yari yarayidūganye, ayikūra i Kiriyati‐yeyarimu ayijana aho yayitunganirije; kuko yari yayishingiye ihema i Yerusalemu.

5Arikw igicaniro c’umuringa, cākozwe na Besaleli mwene Uri umwuzukuru wa Huri, cari kikiri ngaho imbere y’ihema ry’Uhoraho; aho ni ho Salomo n’ikoraniro bākunda kuja gusiguriza Uhoraho.

6Nuko Salomo aradūga aja kur’ ico gicaniro c’umuringa imbere y’Uhoraho, kiri kur’ iryo hema ry’ibonaniro, acoserezakw ibimazi igihumbi.

7Mur’ iryo joro Imana yiyereka Salomo, iramubarira, iti Nsaba ico ugomba, ndakiguhe.

8Salomo arayishura, ati Wagiriye neza cane data Dawidi, unsubiza ku ngoma yiwe.

9None rero, Uhoraho Mana, isezerano wasezeraniye data Dawidi ni rishike, kuko wangize umwami w’abantu b’isinzi, bangana n’umukungugu wo kw isi.

10None rero ndagusavye umpe ubgenge no gutahura, kugira ngo mmenye iyo bija n’iyo biva mur’ aba bantu. None ni nde yoshobora gucira imanza iri hanga ryawe, n’ukuntu ar’ irihambaye?

11Imana yishura Salomo, it’ Ivyo kw ari vyo biri mu mutima wawe, ukaba udasavye ubutunzi cank’ ibintu, cank’ icubahiro, canke ng’ usabe kw abakwanka bapfa, canke ng’ usabe kuramba; arik’ ukaba wisabiye ubgenge no gutahura, kugira ng’ umenye gucira abantu imanza, abo nakwimitsemwo ng’ubaganze;

12nuk’ ubgenge n’ugutahura urabihawe, kandi nzoguha n’ubutunzi n’ibintu n’icubahiro bitīgeze kugirwa n’umwami n’umwe mu bākwitangiye imbere, kandi no mu bazoguherukira nta wuzogira ibihwanye n’ivyawe.

13Nuko Salomo ava imbere y’ ihema ry’ibonaniro, ku mpinga y’umusozi Gibeyoni, asubira i Yerusalemu; akomeza kuganza Abisirayeli.

14Kandi yironderera imikogote y’intambara n’abo kugendera ku mafarasi; yar’ afise imikogote igihumbi n’amajana ane, n’abagendera ku mafarasi ibihumbi cumi na bibiri, bamwe abashira mu bisagara bibīkwamw’ imikogote, abandi i we i Yerusalemu.

15Umwami, amafeza n’ amazahabu yararushe abihindura nk’amabuye i Yerusalemu, n’ibiti vy’amasederi bihinduka nk’ivy’ imisukomora vyo mu biyaya mu kuba vyinshi.

16Kand’ amafarasi Salomo yar’ atunze bāyakūra muri Egiputa; abadandaza b’umwami bayagura ar’ amasho: ubusho bgose igiciro cabgo.

17Umukogote umwe‐umwe bāwuzana bawukūye muri Egiputa kuri shekeli z’ifeza amajana atandatu, ifarasi kw ijana na mirongwitanu. Kand’ abo bādandariza umwami bāshōrera n’abami bose bo mu Baheti n’abo mu Basiriya.

Jump to: Chapter 2 →