2 Chronicles 12

Kirundi (Bibliya Yera 1951, 1967 (Burundi))

← Chapter 11 Jump to: Chapter 13 →

1Maze Rehobowamu, amaze gushikama ku ngoma yiwe, no kuba ūhambaye, aca areka ivyagezwe vy’Uhoraho, akwega n’ Abayuda bose.

2Maze mu mwaka ugira gatanu uwo mwami Rehobowamu ari ku ngoma, Shishaki umwami wa Egiputa adūga gutera i Yerusalemu, kuko bācumuye k’Uhoraho.

3Azanana n’ imikogote y’intambara igihumbi n’amajana abiri, n’abagendera ku mafarasi ibihumbi mirongwitandatu, n’ingabo zitoharūrika zivanye na we muri Egiputa: Abalubimu n’Abasukimu n’Abanyetiyopiya.

4Atsinda ibisagara vy’i Buyuda bizitijwe inzitiro z’amabuye, araruha ashika n’i Yerusalemu.

5Maz’ uwavugishwa n’Imana Shemaya aja aho Rehobowamu n’ abaganwa b’i Buyuda bāri bakoraniye i Yerusalemu kubgo gutinya Shishaki, arababarira, at’ Uku ni k’Uhoraho agize, ngo Ko mwamuhevye, ngo Ni co gitumye na we abaheba akabagabura mu maboko ya Shishaki.

6Maz’ abo baganwa b’Abayuda bo n’umwami baca bicisha bugufi, baravuga, bat’ Uhoraho aragororoka, akoze ibikwiye.

7Uhoraho abonye ko bicishije bugufi, ijambo ryiwe rica riza kuri Shemaya, riti Ko bicishije bugufi, sinzobarandura, ariko nzobakiza haciye akanya; kand’ uburake bganje ntibugisukwa kuri Yerusalemu bikozwe na Shishaki;

8mugabo azobaganza, kugira ngo bamenye amasabo yanje n’amasabo y’abandi bami bo mw isi.

9Nuko Shishaki umwami wa Egiputa ni kwo kudūga agatera i Yerusalemu, asahura ivy’ ubutunzi vyari bibītswe mu ngoro y’ Uhoraho n’ivyo mu ngoro y’ umwami, arabijana vyose, atakw ajana n’inkinzo z’amazahabu Salomo yari yaracurishije.

10Maz’ umwami Rehobowamu acurisha izindi nkinzo mu miringa zo gusubira mu gishingo cazo, azizēza abakuru b’abashibamyi bāshibama ku gisapfu c’ingoro yiwe.

11Kand’ uk’ umwami yinjira mu ngoro y’Uhoraho, abo bashibamyi bāgenda bazijanye, hanyuma bakazigarukana bakazisubiza mu nzu yabo.

12Nuko yicishije bugufi, uburake bg’Uhoraho bumuvako, ntiyabarandura rwose; kandi n’i Buyuda vyari bikimeze neza.

13Nuk’ umwami Rehobowamu ashikama i Yerusalemu, akomeza kuganza; kandi yagiye ku ngoma amaze imyaka mirongwine n’ umwe, ayimarakw imyaka cumi n’indwi ar’ i Yerusalemu nyene, uwo murwa Uhoraho yari yaratoranije mu miryango yose y’ Abisirayeli, ngw ahashire izina ryiwe. Kandi nyina yitwa Nayama Umwamonikazi.

14Ariko yagenda akora ivy’ ukugabitanya, kukw atāshize umutima ku kurondera Uhoraho.

15Non’ ivyadonzwe kuri Rehobowamu vyose, uhereye ku ca mbere ugashitsa ku c’imperēra, mbega ntivyanditswe mu vyo Shemaya uwavugishwa n’Imana na Ido kamenyi bādonze, mu vyo kudondōra ba sekuruza? Kandi hāmah’ intambara hagati ya Rehobowamu na Yerobowamu na ntaryo.

16Nuko Rehobowamu ahamvya ba sekuruza, ahambga ku murwa wa Dawidi; maz’ umuhungu wiwe Abiya asubira ku ngoma yiwe.

← Chapter 11 Jump to: Chapter 13 →