2 Chronicles 16

Kirundi (Bibliya Yera 1951, 1967 (Burundi))

← Chapter 15 Jump to: Chapter 17 →

1Mu mwaka ugira mirongwitatu na gatandatu Asa ari ku ngoma, Bayasha umwami w’ Abisirayeli atera i Buyuda, yubaka i Rama, ngo yīmīre abaja kwa Asa umwami w’Abayuda, cank’ abavayo.

2Maze Asa abibonye, yābīra ku mafeza no ku mazahabu yari mu bubīko bgo mu ngoro y’ Uhoraho n’ubgo mu ngoro yiwe, ayarungikira Beni‐hadadi umwami w’i Siriya yaba i Damasiko;

3amutumako, ut’ Urazi ko mwe na we mufitaniye isezerano, uti Nk’ uko ryamye hagati ya so na se; uti Non’ akurungikiye ifeza n’ izahabu: uti Genda ureke isezerano war’ ufitaniye na Bayasha umwami w’Abisirayeli, uti Kugira ngw amuvire mu gihugu.

4Nuko Beni‐hadadi yemerera umwami Asa, agomora abagabisha b’ingabo ziwe ngo baje gutera ibisagara vy’Abisirayeli; nuko batsinda Iyoni n’i Dani n’i Abeli‐mayimu n’ ibisagara vyose vy’ibigega vy’i Bunafutali.

5Bayasha avyumvise, areka kwubaka i Rama, aheba ivyo yahakorera.

6Maz’ umwami Asa ahitana Abayuda bose, baja i Rama, bakūray’ amabuye n’ibiti, ivyo Bayasha yarikw arubakisha; maz’ avyubakisha i Geba n’i Misipa.

7Ico gihe Hanani kamenyi aza iyo Asa ari, umwami w’i Buyuda, aramubarira, ati Kuko wizigiye umwami w’i Siriya, ntiwizigire Uhoraho Imana yawe, ni co catumye ingabo z’umwami w’i Siriya zigukira.

8Mbeg’ Abanyetiyopiya n’Abalubimu ntibār’ ingabo nyinshi z’isinzi, zifise imikogote y’intambara n’abagendera ku mafarasi vyinshi cane? Ariko kuko wari wizigiye Uhoraho abagabura mu maboko yawe.

9Kand’ inyonga z’Uhoraho zinyuranganya mw isi yose hirya no hino, kugira ngo yerekane ububasha bgiwe bgo gutabara abafise imitima imutunganiye. Mu vyo wakoze ivyo, wakoze ivy’ ubupfu; nuk’ uhereye ubu uzohora ubona intambara.

10Maze Asa ashavurira kamenyi uwo, amushira mw ibohero mu mpatane z’ibiti, kukw iryo jambo ryamuteye kumugirira ubushangashirwe. Ico gihe Asa yagenda acuranguza abantu bamwe‐bamwe.

11Ibindi vyose vyadonzwe kuri Asa, uhereye ku ca mbere ugashitsa ku c’imperēra, vyanditswe mu gitabo c’abami b’Abayuda n’ab’ Abisirayeli.

12Maz’ ashitse mu mwaka ugira mirongwitatu n’ icenda ari ku ngoma arwara ibirenge, kand’ iyo ndwara imumerera nabi cane; ariko na ho nyene no mu ndwara yiwe ntiyaja kubaza Uhoraho, atar’ ukuja ku bavūzi.

13Hanyuma Asa ahamvya ba sekuruza, atanga amaze imyaka mirongwine n’umwe ari ku ngoma.

14Bamuhamba mu mva yiwe yiyimbishirije mu gisagara ca Dawidi, bamurambika ku buriri bguzuye ibintu bitāmirana n’ ibintu bimoga vy’amoko yose, vyinjijwe n’abahinga bābimogoreye; bamwosereza imibavu myinshi cane.

← Chapter 15 Jump to: Chapter 17 →