2 Chronicles 29

Kirundi (Bibliya Yera 1951, 1967 (Burundi))

← Chapter 28 Jump to: Chapter 30 →

1Hezekiya yar’ amaze imyaka mirongwibiri n’itanu igihe yima, amara imyaka mirongwibiri n’icenda i Yerusalemu ari ku ngoma. Nyina yitwa Abiya, umukobga wa Zekariya.

2Akora ivyo Uhoraho abona kw ari vyiza, nk’ ivyo sekuruza Dawidi yakoze vyose.

3Mu mwaka wa mbere agiye ku ngoma, mu kwezi kwa mbere, yugurura inzugi z’ingoro y’Uhoraho, arazisana.

4Ahamagaza abaherezi n’Abalewi, abakoraniriza mu karusha gahera i burasirazuba,

5arababarira, ati Ni muntege amatwi, yemwe Balewi; enda ni mwiyeze, mweze n’ingoro y’Uhoraho Imana ya ba sogokuruza banyu, mukūre ibihumanya Ahēra Cane.

6Kuko ba sogokuruza bacu bācumuye, bagakora ivyo Uhoraho Imana yacu abona kw ari bibi, bakamuta, bakarora irya, bagakūra amaso ahantu Uhoraho aba, bakahatera ibitugu.

7Ikindi, bugaye inzugi zo ku rubaraza, amatara barayazimya, kandi ntibosereza imibavu Imana y’Abisirayeli, canke ngo bosereze ibimazi Ahantu hēra;

8ni co catumye uburake bg’Uhoraho buza ku Bayuda no ku b’i Yerusalemu, akabatanga ngo babe akūmiza n’akajoreza, n’abo kuvuzwakw agahwa, nk’uko namwe muvyibonera n’amaso yanyu.

9Ereg’ ivyo ni vyo vyatumye ba sogokuruza bacu bicwa n’inkota, kand’ abahungu bacu n’abakobga bacu n’abagore bacu bakaba bārabaye inyagano.

10None ngabiye mu mutima wanje gusezerana isezerano n’Uhoraho Imana y’Abisirayeli, kugira ng’ uburake bgiwe bg’inkazi butuveko.

11None rero bana banje, mureke kuvyanjanjwako, kukw ari mwebge Uhoraho yatoranije ngo mumuhagarare imbere, mumusukurire, mube abasuku biwe, mwose imibavu.

12Maz’ Abalewi bava hasi, Mahati mwene Amasayi, na Yoweli mwene Azariya, bo mu ba Kohati; n’abo mu ba Merari, Kishi mwene Abudi, na Azariya mwene Yehaleleli; n’abo mu ba Gerushoni, Yowa mwene Zima, na Edeni mwene Yowa.

13Abo mu ba Elisafani ni Shimuri na Yeweli; abo mu ba Asafu ni Zekariya na Mataniya;

14abo mu ba Hemani ni Yehuweli na Shimeyi; abo mu ba Yedutuni ni Shemaya na Uziyeli.

15Bakoranya bagenzi babo, bariyeza; baraheza barinjira ngo bahumanure iyo ngoro y’Uhoraho, nk’uk’ umwami yageze, kandi nk’uk’ Uhoraho yabgirije.

16Abaherezi baja haruguru mur’ iyo ngoro y’Uhoraho kugira ngo bahahumanure, ibihumanya vyose basanze mur’ urwo rusengero rwiwe babisohora mu rugo rw’iyo ngoro yiwe. Abalewi baraheza baravyābīra, babijana hirya ku mugezi Kidironi.

17Kandi bāri bahēreye ku musi wa mbere w’ukwezi kwa mbere mu gutangura ivy’ ukweza; ku musi ugira umunani w’ukwo kwezi bashika ku rubaraza rw’Uhoraho; nuko bamara imisi munani beza iyo ngoro y’Uhoraho; maze ku musi ugira icumi na gatandatu w’ ukwo kwezi kwa mbere bararangiza.

18Baraheza baja i bgami, bashika i kare ah’ umwami Hezekiya ari, baramubarira, bati Tumaze guhumanura ingoro yose y’ Uhoraho, n’igicaniro co kwoserezakw ibimazi bo n’ibintu vyaco vyose, n’ameza y’imitsima y’ibiterekērwa n’ibintu vyayo vyose.

19Kandi n’ibintu vyose umwami Ahazi yataye mu gucumura kwiwe igihe yari ku ngoma, twabitunganije, turavyeza; none bir’ imbere y’igicaniro c’Uhoraho.

20Bukeye umwami Hezekiya akoroka kare, akoranya abaganwa bo kur’ uwo murwa, aradūga aja ku ngoro y’Uhoraho.

21Bazana amamasa ndwi, n’amapfizi y’intama ndwi, n’imyagazi y’intama ndwi, n’amapfizi y’impene ndwi nyene, kw ikimazi co gutangirwa ivyaha, ngo babitangire ubgami n’urusengero n’Abayuda. Abarira abaherezi bene Aroni kubitangira ku gicaniro c’Uhoraho.

22Nuko bakerera ayo mamasa, abaherezi batega amaraso, bayamija ku gicaniro; bakerera n’ayo mapfizi y’intama, bamija amaraso yayo kur’ ico gicaniro, bakerera n’iyo myagazi y’intama, bamija n’amaraso yayo kur’ ico gicaniro nyene.

23Maze ya mapfizi y’ impene bayīgiza hafi imbere y’ umwami n’ikoraniro, ngw abe ikimazi co gutangirwa ivyaha; baraheza bayarambikakw ibiganza.

24Abaherezi barayakerera, batanga amaraso yayo ku gicaniro kw ikimazi gitangirwa ivyaha, ngo bahongerere Abayuda bose; kuk’ umwami yavuze kw ikimazi co kwoswa n’ikimazi co gutangirwa ivyaha bitangirwa Abayuda bose.

25Kand’ ashira Abalewi mu ngoro y’Uhoraho bafise ivyo kuvuza vyitwa matowazi n’amakembe n’inanga, nk’uko vyashinzwe na Dawidi na Gadi kamenyi w’ umwami na Natani yavugishwa n’ Imana, kukw ico cagezwe cari kivuye k’Uhoraho agitumye abo yavugisha.

26Nukw abo Balewi bahagarara ngaho bafise ivyo kuvuza vyashinzwe na Dawidi, n’ abaherezi na bo bafise inzumbete.

27Maze Hezekiya avuga kw ikimazi co kwoswa bacosereza ku gicaniro. Nukw ico kimazi bagitanguye kucosa, abaririmba indirimbo y’Uhoraho na bo bashirako, bo n’abavuza inzumbete n’ibindi vyo kuvuza vyashinzwe na Dawidi umwami w’Abisirayeli.

28Maz’ ikoraniro ryose rirasenga, abaririmvyi bakaririmba, abavuza inzumbete bakavuza; vyose biba birtyo gushitsa ah’ ikimazi coshejwe kirangiriye.

29Nukw ivy’ ico kimazi birangiye, umwami n’abari kumwe na we barūnama, barasenga.

30Kand’ umwami Hezekiya n’abaganwa babarira Abalewi kuririmbira Uhoraho ishimwe mu ndirimbo za Dawidi n’iza Asafu kamenyi; nuko baririmba ishimwe banezerewe, bunamika amaso, barasenga.

31Maze Hezekiya arababarira, ati None ko mwirobanuriye Uhoraho, mwīgire hafi, muzane ibimazi n’amashikanwa yo gukenguruka mu ngoro y’Uhoraho. Nukw iryo koraniro rizana ibimazi n’amashikanwa yo gukenguruka; n’abāri bafise imitima ikunze bose bazana ibimazi vyo kwosa.

32Igitigiri c’ibimazi vyo kwoswa ikoraniro ryazanye car’ amapfizi mirongwirindwi n’amapfizi y’intama ijana n’imyagazi y’intama amajana abiri; ivyo vyose vyar’ ivyo kuba ikimazi co kwosereza Uhoraho.

33Kand’ ibimazi vyejejwe vyar’ amapfizi amajana atandatu n’intama ibihumbi bitatu.

34Arikw abaherezi baba bake, ntibāshobora kubāga ibimazi vyose vyo kwoswa; ni co catumye bagenzi babo b’ Abalewi babafasha, gushitsa ah’ igikorwa kirangiriye, no gushitsa ah’ abandi baherezi bāri bamaze kwiyeza, kukw Abalewi bārusha abaherezi kugororoka mu mitima yabo bigatuma bakunda kwiyeza.

35Kand’ ivyo bimazi vyo kwoswa vyari vyinshi cane, hamwe n’ibinure vy’ibimazi vy’ishimwe, n’ amashikanwa y’ibiturire yagendana n’ikimazi cose co kwoswa. Uko ni kw ibikorwa vyo mu ngoro y’ Uhoraho vyatunganijwe.

36Nuko Hezekiya agira akanyamuneza, bo n’abantu bose, kubg’ ivyo Imana yateguriye abantu, kuko vyakozwe giturumbuka.

← Chapter 28 Jump to: Chapter 30 →