2 Chronicles 31

Kirundi (Bibliya Yera 1951, 1967 (Burundi))

← Chapter 30 Jump to: Chapter 32 →

1Nukw ivyo vyose bishize, Abisirayeli bose bāri bakoraniye aho, baca baja mu bisagara vy’i Buyuda, bamenagura amabuye bāshinze, batemagura inkingi bāshingiye Ashera, basibanganya ibitabo vyo ku mpinga z’imisozi, basangangura n’ibicaniro vy’i Buyuda n’i Bubenyamini, bo n’i Bgefurayimu no mu bg’Abamanase, gushitsa aho babiherengetereje vyose. Abisirayeli bose barahindukira, basubira mu bisagara vyabo, umuntu wese mw ishamvu yiwe.

2Maze Hezekiya ashinga imbu z’abaherezi n’Abalewi, nk’uko zari zisanzwe, nk’uk’ umuntu wese muri bo yar’ asanzwe akora, ar’ abo gutanga ibimazi vyoswa, ar’ abo gutanga ibimazi vy’ishimwe, ar’ abo guhēreza, ar’ abo gushima, ar’ abo guhimbaza, bahagaze ku birimba vy’urugo rw’Uhoraho.

3Umwami agera n’umugabane w’ivyo azotanga ku vyo atunze, ku vy’ ibimazi vyo kwoswa bizotangwa mu gitondo no ku mugoroba, n’ibimazi vyo kwoswa ku masabato, n’ivyo mu mboneko z’ukwezi, n’ivy’ imisi mikuru yashinzwe, nk’uko vyanditswe mu vyagezwe vy’Uhoraho.

4Kand’ agera kw abantu bose baba i Yerusalemu batanga ivyashinzwe guhabga abaherezi n’Abalewi, kugira ngo babone kwitwaririka ivyagezwe vy’Uhoraho.

5Nukw ico cagezwe kimaze gutāngāzwa, Abisirayeli bazana vyinshi cane vy’ umushuzo w’ingano na vino n’ amavuta ya elayo n’ubūki n’ ivyeze vyose vyo mu mirima; kandi n’ikigiracumi ca vyose babizana ari vyinshi cane.

6Kand’ Abisirayeli n’Abayuda, bāba mu bisagara vy’i Buyuda, na bo bazana ikigiracumi c’inka n’intama, n’ ikigiracumi c’ibintu vyejejwe bigashikanirwa Uhoraho Imana yabo, ivyo bintu babigira ibirundo.

7Mu kwezi kwa gatatu ni ho batanguye kurunda ivyo birundo, babirangiza mu kwezi kw’indwi.

8Maze Hezekiya n’abaganwa baje, bakabona ivyo birundo, baciye bashima Uhoraho n’abantu biwe b’Abisirayeli.

9Maze Hezekiya abaza abaherezi n’Abalewi ivy’ ivyo birundo.

10Azariya umuherezi mukuru, umuntu wo mu nzu ya Sadoki, aramwishura, at’ Uhereye igihe abantu batanguriye kuzana amashikanwa mu ngoro y’Uhoraho, twagiye tubona ivyo kurya, tugahāga, tugasigaza vyinshi; kuk’ Uhoraho yahaye abantu biwe umugisha, kand’ ibisāgutse ni vyo ibi bingana birtyo.

11Maze Hezekiya araheza ababarira ko batunganya ivyumba vyo mu ngoro y’Uhoraho; nuko barabitunganya;

12babishiramw’ ayo mashikanwa n’ivyo bigiracumi, n’ivyo bintu vyagizwe inyegu, babikoze nk’uko bizigiwe; umukuru yabijejwe yari Konaniya Umulewi, agakurikirwa na murumuna we Shimeyi.

13Yehiyeli na Azaziya na Nahati, na Asaheli na Yerimoti na Yozabadi, na Eliyeli na Isimakiya na Mahati na Benaya, ni bo bār’ ababgiriza bāgabga na Konaniya na murumuna we Shimeyi, nk’uk’ umwami Hezekiya yabishinze, bo na Azariya umubgiriza w’ingoro y’Imana.

14Kandi Kore, mwene Imuna Umulewi, umukumirizi w’irembo ry’i burasirazuba, ni we yar’ ajejwe amashikanwa bashikaniye Imana bavyigombeye, agatanga imigabane ku mashikanwa y’Uhoraho no ku bintu vyera cane.

15Mu bisagara vy’abaherezi yar’ afise abizigirwa yagaba, ni bo aba: Edeni na Minyamini na Yeshuwa na Shemaya na Amariya na Shekaniya; yabagaba mu gikorwa cabo co guha imigabane bagenzi babo, uhereye ku bakuru n’abatoya, ukw imbu zabo zagenda zikurikirana;

16mugabo ntibayiha abaramukiwe gukora mu ngoro y’Uhoraho ku rubu rwabo, nk’ukw ibikorwa bāgerewe biri uko bukeye, ari bo nyene banditswe mu gitabo kidondora amavuka y’izinamuhungu wese, uhereye ku bamaze imyaka itatu no kuja hejuru.

17Abaherezi bāgenda bandikwa ukw amazu ya ba sekuruza ari; Abalewi uhereye ku bamaze imyaka mirongwibiri no kuja hejuru, bakandikwa ukw ibikorwa vyabo n’imbu zabo biri.

18Kandi handikwa n’ababo bose, uhereye ku bagore babo n’abahungu n’abakobga, bose iyo bava bakagera; kuko bāgenda bayoboka mu gukora ivyera.

19Kandi kubg’ abaherezi bo mu ba Aroni bāba mu matongo aho bafise amaragiro inyuma y’ibisagara vyabo, mu gisagara cose hār’ abantu bazwi amazina bāshiriweho guha umugabane umuntu wese w’izinamuhungu mur’ abo baherezi n’ abanditswe bose mu Balewi mu gitabo kidondora amavuka yabo.

20Uko ni ko Hezekiya yakoze mu Buyuda hose; yagenda akora ivyiza n’ibiroranye n’ivy’ ukuri imbere y’Uhoraho Imana yiwe.

21Mu vyo yakora vyose arondera Imana yiwe, uhereye ku bikorwa vyo mu ngoro y’Imana, no ku vyagezwe no ku mabgirizwa, yabikora abishizek’ umutima wiwe wose, bikamubera ko.

← Chapter 30 Jump to: Chapter 32 →