2 Chronicles 21

Kirundi (Bibliya Yera 1951, 1967 (Burundi))

← Chapter 20 Jump to: Chapter 22 →

1Maze Yehoshafati ahamvya ba sekuruza, ahambga hamwe na bo ku murwa wa Dawidi; maz’ umuhungu wiwe Yehoramu asubira ku ngoma yiwe.

2Kandi Yehoramu yar’ afise barumuna biwe, abahungu ba Yehoshafati, Azariya na Yehiyeli na Zekariya na Azariyahu na Mikayeli na Shefatiya; abo bose bār’ abahungu ba Yehoshafati, umwami w’Abayuda.

3Se abaraga ibiragwa bikomeye, amafeza n’amazahabu n’ibindi bintu vy’igiciro, bo n’ibisagara vy’i Buyuda bizitiriwe inzitiro z’amabuye; ariko Yehoramu aba ari we araga ubgami, kukw ari we mfura yiwe.

4Maze Yehoramu asubiye ku ngoma ya se, amaze kwigira agakomeye, yicisha inkota abo barumuna biwe bose, bo n’abaganwa bamwe‐bamwe b’i Buyuda.

5Kandi Yehoramu, aho yatangura kwima, yar’ amaze imyaka mirongwitatu n’ibiri; araheza amara imyaka munani i Yerusalemu ari ku ngoma.

6Ariko yagendera mu ngeso z’abami b’Abisirayeli, nk’ukw ab’ inzu ya Ahabu bākora, kuko yari yābiriye umukobga wa Ahabu; nukw akora ivyo Uhoraho abona kw ari bibi.

7Mugabo Uhoraho yanka guhonnya inzu ya Dawidi, kubg’ isezerano yari yasezeranye na Dawidi kw azomuha itara rizokwama ryaka mu ruvyaro rwiwe ibihe vyose.

8Ku ngoma yiwe ni ho Abanyedomu bāgararije Abayuda, biyimikira uwabo mwami.

9Maze Yehoramu aca ajabukana n’abagabisha biwe b’ingabo n’imikogote yiwe yose y’intambara; maz’ Abanyedomu bamutaye hagati, ahenga mw ijoro, bo n’abagabisha b’imikogote yiwe, bīcīra inzira mur’ abo Banyedomu.

10Uko ni kw Abanyedomu bīkūye ku Bayuda gushitsa na bugingo n’ ubu. Ico gihe ab’i Libuna na bo baramugarariza, bamwīkūrako, kuko yar’ aretse Uhoraho, Imana ya ba sekuruza.

11Kandi Yehoramu ataba ibitabo ku mpinga z’imisozi y’i Buyuda, akwegera ababa i Yerusalemu ngo bahurumbire mu bumaka, azimiza Abayuda.

12Bukeye aronka icete kivuye k’uwavugishwa n’Imana Eliya, kivuga, ng’ Uku ni k’Uhoraho, Imana ya sogokuruza Dawidi, agize: ngo K’utāgendanye ingeso nziza za so Yehoshafati, canke za Asa umwami w’ Abayuda;

13ngw Arik’ ukagendana iz’ abami b’Abisirayeli, ugakwegera Abayuda n’ababa i Yerusalemu ngo bahurumbire mu bumaka, ngo Nk’ukw ab’ inzu ya Ahabu bākoze; ngo Kand’ ukica barumuna bawe, ari bo nyene b’inzu ya so bākurusha ingeso nziza;

14ngo Rāba Uhoraho ngw Azotēza abantu bawe ivyago bikomeye, bo n’abana bawe n’ abamikazi bawe n’ivy’ ufise vyose;

15ngo Kandi nawe uzorwara indwara ikomeye mu mara, ngo Kand’ izogenda ikura uko bukeye, gushitsa ah’ amara yawe azoruha akavyagira, akuvuye mu nda.

16Bukeye Uhoraho ahagurukiriza Yehoramu Abafilisitiya bo n’ Abarabo bahereranye n’Abanyetiyopiya;

17batera i Buyuda, barahadwēbēra, basahura ibintu vyose vyari mu ngoro y’umwami, bajana n’abahungu biwe ar’ inyagano, bo n’abamikazi biwe; ntibamusigarana umwana w’umuhungu n’umwe, atari Yehowahazi umuhererezi wiwe.

18Hanyuma y’ivyo vyose Uhoraho amutēza indwara mu mara idashobora kuvūrwa.

19Maz’ igihe kiragera, imyaka ibiri ihise, indwara yiwe ituma amara avyagira, amuva mu nda, apfa yībōnye. Arikw abantu biwe ntibamwosereza imibavu nk’ uko bābigenza kuri ba sekuruza.

20Aho yatangura kwima, yar’ amaze imyaka mirongwitatu n’ ibiri, araheza amara imyaka munani i Yerusalemu ari ku ngoma; atāmbūra ata wukimugomba. Bamuhamba ku murwa wa Dawidi, ariko si mu mva z’abandi bami.

← Chapter 20 Jump to: Chapter 22 →