2 Chronicles 7

Kirundi (Bibliya Yera 1951, 1967 (Burundi))

← Chapter 6 Jump to: Chapter 8 →

1Nuko Salomo arangije gusenga, umuriro utibuka uvuye mw ijuru, utōngōra ibimazi vy’ ukwoswa n’ibindi bimazi; ubgiza bg’Uhoraho bguzura iyo ngoro.

2Abaherezi ntibāba bagishobora kwinjira muri yo, kuk’ ubgiza bg’ Uhoraho buyuzuye.

3Abisirayeli bose babonye ingen’ umuriro utibutse, n’ubgiza bg’Uhoraho ingene bgari kur’ iyo ngoro, bunamika amaso, barūnama bashika hasi ku mabuye ahashashe, barasenga, bakengurukira Uhoraho, bat’ Uhoraho ni mwiza, kukw imbabazi ziwe zamah’ ibihe bidashira.

4Maz’ umwami n’abantu bose bafataniriza hamwe gutangira ibimazi imbere y’Uhoraho.

5Umwami Salomo atanga inka ibihumbi mirongwibiri na bibiri n’intama ibihumbi ijana na mirongwibiri kw ibimazi. Uko ni k’umwami n’abantu bose bāshikirije Imana ingoro yayo.

6Kand’ abaherezi bari bahagaze mu myanya yabo, n’Abalewi na bo bafise ibintu vyo kuvugiriza Uhoraho, ivyo umwami Dawidi yari yarakoresheje vyo gushima Uhoraho, akababgira kubivuza igihe yamuhimbaza, ati Kukw imbabazi ziwe zamah’ ibihe bidashira; nukw abaherezi bavugiriza inzumbete imbere yabo; Abisirayeli bose na bo barahagarara.

7Maze Salomo ashinga umwanya wo hagati mu nyubakwa imbere y’ingoro y’Uhoraho, arahēza; aho ni ho yoshereje ibimazi vyo kwoswa, n’ibinure vy’ibimazi vy’ ishimwe, kukw igicaniro c’umuringa yari yaracurishije cari gito, kitokwiwekw ivyo bimazi vyo kwoswa n’ayo mashikanwa y’amafu n’ivyo binure.

8Uko ni ko Salomo yagize imisi mikuru ico gihe, hamwe n’Abisirayeli bose, kumara imisi ndwi; bār’ ikoraniro rinini cane bavuye mu gihugu cose, uhereye ahafata i Hamati ugashitsa ku mugezi wa Egiputa.

9Ku musi ugira umunani bagira ikoraniro ry’agahebuza, kuko bari bamaze imisi ndwi mu vyo gushikiriza Imana igicaniro, baraheza basubira kugira iyindi misi mikuru ndwi.

10Maze ku musi ugira mirongwibiri na gatatu wo mu kwezi kw’indwi asēzera abantu, abarungika i wabo; nuko bataha banezerewe, bahimbawe mu mitima yabo kubg’ ivyiza Uhoraho yagiriye Dawidi na Salomo n’abantu biwe b’Abisirayeli.

11Uko ni ko Salomo yarangije kwubaka ingoro y’Uhoraho n’ ingoro y’ubgami; kand’ ivyo Salomo yari yaragabiye mu mutima wiwe kuzokora ku vy’ingoro y’Uhoraho no ku vy’ingoro yiwe ubgiwe, arabisohoza neza.

12Hanyuma Uhoraho yiyereka Salomo mw ijoro, aramubarira, ati Numvise ugusenga kwawe, kandi nitoranirije aha hantu ngo habe inzu yo gutangiramw’ ibimazi.

13Ni naramuka nkinze ijuru, imvura ntigwe, canke ni narekura inzige zikōna mu gihugu, canke ni narekura ikīza kikaja mu bantu banje;

14maz’ abantu banje bītirirwa izina ryanje ni bicisha bugufi bagasenga barondera mu nyonga hanje, bagahindukira bakareka ingeso zabo mbi, nuko nanje nzokwumva ndi mw ijuru, mparire ivyaha vyabo, nkize n’ igihugu cabo.

15Uhereye ubu, nzokwama ntereza inyonga zanje ndābe, ntege amatwi yanje numve amasengesho asengerwa aha hantu.

16Kuk’ ubu ntoranije iyi ngoro, ndayejeje ngw izina ryanje riyibemw’ ibihe vyose, kandi nzoyamizakw inyonga zanje n’umutima wanje imisi yose.

17Nuko nawe ni wagendera imbere yanje nk’uko so Dawidi yagenda, ugakora ivyo nakugeze vyose, ukitondera amabgirizwa yanje n’amatēka nashinze,

18nanje nzotuma ingoma yawe ihangama, nk’uko nasezeraniye so Dawidi, nti Ntuzobura uwo kuganza mu Bisirayeli.

19Ariko ni mwanta, ntimwitondere ivyagezwe vyanje n’amabgirizwa yanje nabashize imbere, mukaja gusaba izindi mana, mukaba ari zo musenga,

20nuko nanje nzobarandura, mbakūre mu gihugu nabahaye, kand’ iyi ngoro nejeje kubg’ izina ryanje nzoyishibura imve mu maso, ndayigire iciro ry’imigani n’agashinyaguro mu mahanga yose;

21kand’ iyi ngoro, nah’ ar’ agahambaye irtya, ūzoyica i ruhande wese azokwumirwa, avuge, at’ Ariko n’iki catumye Uhoraho agirira artya iki gihugu n’iyi ngoro?

22Bazomwishura, bati N’ uko bahevye Uhoraho Imana ya ba sekuruza, yabakūye mu gihugu ca Egiputa, bakaramatana n’izindi mana, bakazisenga, bakaba ari zo basaba; ni co catumye abatēza ivyo vyago vyose.

← Chapter 6 Jump to: Chapter 8 →