2 Chronicles 3

Kirundi (Bibliya Yera 1951, 1967 (Burundi))

← Chapter 2 Jump to: Chapter 4 →

1Maze Salomo atangura kwubaka ingoro y’Uhoraho i Yerusalemu ku musozi Moriya, ah’ Uhoraho yiyerekeye se Dawidi, ari ho nyene Dawidi yashinze, ku mbuga ya Orunani Umuyebusi.

2Atangura kwubaka ku musi ugira kabiri wo mu kwezi kwa kabiri, mu mwaka ugira kane ari ku ngoma.

3Uku ni kw amatanguriro yarēha, ayo Salomo yashizeho kugira ngo yubake ingoro y’Imana. Uburebure bgayo bgar’ amatambge mirongwitandatu y’ ukuboko uciriye mu nkokora, utambitse mu buryo bga kera, ubgaguke bgayo bgar’ amatambge mirongwibiri.

4Urubaraza rw’ imbere y’iyo ngoro, uburebure bgarwo bg’amakika bgar’ amatambge mirongwibiri, nk’uk’ ubgaguke bg’iyo ngoro bgangana; uburebure bgarwo bg’igihagararo bgar’ ijana na mirongwibiri; imbere kuri rwo ahomekakw izahabu iramuye.

5Igice kinini c’iyo ngoro, imbere ahomekesha imbaho z’akajwari; na zo azomekakw izahabu iramuye, ashushanyakw ibishushanyo vy’ibigazi n’ ivy’ imigufu.

6Kand’ iyo ngoro ayomekako n’utubuyenge tw’igiciro kinini kugira ngw ishaze; amazahabu yakoresheje yari yavuye i Paravayimu.

7Nukw iyo ngoro ayomekakw izahabu, uhereye ku myaro, no mw irebe, no ku bisika vyayo, no ku nzugi zayo; atakw ashushanya n’ibishushanyo vy’abakerubi ku bisika.

8Yubaka n’Ahēra Cane; uburebure bgaho bgar’ amatambge mirongwibiri y’ukuboko uciriye mu nkokora, kandi bgangana n’ubgaguke bg’iyo ngoro; ubgaguke bgaho bgar’ amatambge mirongwibiri nyene. Imbere ahomeka izahabu iramuye; ukuriba kw’ izahabu yahakoresheje kwar’ italanto amajana atandatu.

9Imisumari yahakoresheje yar’ icuzwe mw izahabu irivye shekeli mirongwitanu. Ivyumba vyo hejuru na vyo avyomekakw izahabu.

10Abāza ibishushanyo bibiri vy’abakerubi vyo gushira Ahēra Cane, avyomekakw izahabu.

11Amababa y’abo bakerubi, uburebure bga yose bgar’ amatambge mirongwibiri; ibaba ry’umwe ryar’ amatambge atanu, kandi ryaruma ku nzu, irindi baba na ryo ryar’ atanu nyene, kandi ryasomana n’iry’ uwundi mukerubi.

12Ibaba ry’uwundi mukerubi ryar’ amatambge atanu nyene, kandi ryaruma ku nzu ku rundi ruhande, irindi na ryo nyene ryar’ atanu, ryasomana n’iry’ umukerubi wa mbere.

13Amababa y’abo bakerubi, uburebure bga yose uko yar’ ashanje, bgar’ amatambge mirongwibiri; bari bahagaze ku birenge vyabo, bahanze amaso ku nzu.

14Igihuzu kihakingīra akijisha mu nyuzi z’amasufe n’iz’ amashigisha n’izisa n’agahama n’izera derere; akijishirakw ibishushanyo vy’abakerubi.

15Arondera inkingi zibiri zo gushinga imbere y’iyo ngoro; uburebure bgazo bgar’ amatambge mirongwitatu n’atanu y’ ukuboko uciriye mu nkokora; imyashi yazo, uburebure bg’ umwe‐umwe bgar’ amatambge atanu.

16Acura n’imigufu nk’ iyashizwe Ahēra Cane, ayishira mu mitwe y’izo nkingi; acura n’ ibisa n’amakomamanga, abidombagiza kur’ iyo migufu.

17Nukw ashinga izo nkingi imbere y’ urusengero, imwe i buryo n’ iyindi i bumoso; iy’ i buryo ayita Yakini, iy’ i bumoso ayita Bowazi.

← Chapter 2 Jump to: Chapter 4 →