2 Chronicles 30

Kirundi (Bibliya Yera 1951, 1967 (Burundi))

← Chapter 29 Jump to: Chapter 31 →

1Bukeye Hezekiya atuma ku Bisirayeli no ku Bayuda bose, yandikira n’ivyete Abefurayimu n’Abamanase, ngo baze kugira umusi mukuru w’ivya Pasika y’Uhoraho Imana y’Abisirayeli, mu ngoro y’Uhoraho i Yerusalemu.

2Kuk’ umwami n’abaganwa biwe n’ikoraniro ryose ry’ i Yerusalemu bari bagiye inama yo kugira umusi mukuru w’ivya Pasika mu kwezi kwa kabiri.

3Ntivyābashobokeye mu gihe gikwiye, kukw igitigiri c’abaherezi biyejeje cāri gito, kand’ abantu batākoraniye i Yerusalemu.

4Nuk’ umwami n’iryo koraniro ryose barabishima;

5bashinga ko bitāngāzwa mu Bgisirayeli hose, uhereye i Berisheba ugashitsa i Dani, ngo baze i Yerusalemu ku musi mukuru wa Pasika y’Uhoraho Imana y’Abisirayeli; kuko batāri bakiza ari benshi nk’uko vyari vyarashinzwe.

6Nukw intumwa zijana ivyete bivuye ku mwami n’abaganwa biwe, zibikwiza mu Bgisirayeli hose no mu Buyuda, zivuga nk’uk’ umwami yashinze, ziti Yemwe Bisirayeli, ni mugaruke k’Uhoraho Imana ya Aburahamu na Isaka na Isirayeli, kugira ngo na we agaruke kuri mwebge abasigaye barokotse abami b’i Ashuri.

7Ngo Kandi ntimuse na ba sogokuruza banyu, cank’ abandi b’i wanyu bāgenda bacumura k’Uhoraho Imana ya ba sekuruza, bigatuma ibatanga bakagesezwa, nk’uko namwe mubibona.

8Ngo None rero mweho ntimugamike amazosi nka ba sogokuruza banyu, ariko muyoboke Uhoraho, muze muze mu rusengero rwiwe yejeje gushitsa ibihe vyose, mube abasavyi b’Uhoraho Imana yanyu, kugira ng’ uburake bgiwe bg’inkazi bubaveko.

9Ngo Kuko ni mwahindukirira Uhoraho, ab’ i wanyu n’abana banyu bazotera akagongwe abābajanye ar’ inyagano, babarekure bagaruke mur’ iki gihugu; ngo Kuk’ Uhoraho Imana yanyu ar’ umunyabuntu kandi n’umunyembabazi, ntazobakūrakw inyonga ziwe ni mwamugarukako.

10Nukw izo ntumwa ziragenda, zihetura ibisagara vyose vyo mu gihugu c’Abefurayimu n’ic’ Abamanase, zirinda zishika no mu c’ Abazebuloni; ariko barazitwenga cane, barazishinyagurira.

11Mugabo bamwe bo mu Basheri no mu Bamanase no mu Bazebuloni barīhanūra, baja i Yerusalemu.

12Kandi n’i Buyuda ukuboko kw’ Imana kubaha guhūza umutima, bumvira ico cagezwe c’umwami n’ abaganwa kivuye kw ijambo ry’ Uhoraho.

13Nuko mu kwezi kwa kabiri hakoranira abantu benshi i Yerusalemu, kugira umusi mukuru w’ imitsima itambiwe, ar’ ikoraniro rinini cane.

14Bakūra hasi, bakūrah’ ibicaniro vyar’ i Yerusalemu, n’ibicaniro vyose vyo kwoserezakw imibavu, babita mu mugezi Kidironi.

15Maze ku musi ugira icumi na kane wo mur’ ukwo kwezi kwa kabiri, babāga ivya Pasika; maz’ abaherezi n’Abalewi baramāramāra, baraheza barīyeza, bazana ibimazi vyo kwoswa mu ngoro y’Uhoraho.

16Bahagarara mu myanya yabo basanganywe, nk’uko vyashinzwe na Mose umuntu w’Imana; abo baherezi bamija amaraso, Abalewi ari bo bayabahēreje;

17kuko mur’ iryo koraniro hāri benshi batiyejeje, bituma Abalewi ari bo bagerwa kubāgira umwagazi wa Pasika umuntu wese ahumanye, kugira ngo babēreze Uhoraho.

18Kukw abantu benshi cane batāri biyejeje, cane‐cane bār’ abo mu Befurayimu no mu Bamanase no mu Bisakari no mu Bazebuloni, bagapfa kurya ivya Pasika uburyo butemewe n’ivyanditswe. Kandi Hezekiya yari yābasengeye,

19at’ Uhoraho, ari we munyabuntu, n’aharire umuntu wese ashize umutima ku kurondera Imana, ari we Uhoraho Imana ya ba sekuruza, nah’ atejejwe nk’ukw ivyagezwe vy’urusengero rwera biri.

20Nuk’ Uhoraho yumvira Hezekiya, atunga abantu.

21Nukw Abisirayeli bāri bakoraniye i Yerusalemu bamara imisi ndwi bari mu misi mikuru y’imitsima itambiwe bafise umunezero mwinshi; kand’ Abalewi n’abaherezi bāhimbaza Uhoraho uko bukeye, bamuririmbira n’amajwi arenga.

22Hezekiya aremēsha imitima y’Abalewi bose bāgira umwete wo gukorera Uhoraho. Nukw abantu bamara iyo misi ndwi barya ivy’ iyo misi mikuru, batanga ibimazi vy’ishimwe, bakengurukira Uhoraho Imana ya ba sekuruza.

23Maz’ ikoraniro ryose baja inama yo kwongera kumara iyindi misi mikuru ndwi; nuko bayimara banezerewe.

24Kuko Hezekiya umwami w’Abayuda yari yahaye iryo koraniro amamasa igihumbi n’intama ibihumbi ndwi vyo gutanga kw ibimazi, abaganwa na bo bariha amamasa igihumbi nyene, n’intama ibihumbi cumi; nukw abaherezi benshi bariyeza.

25Nukw iryo koraniro ryose ry’Abayuda riranezerwa, bo n’abaherezi n’ Abalewi, n’ikoraniro ryose ryavuye i Bgisirayeli, n’abari baravuye mu gihugu c’i Bgisirayeli bakaza kuba i Buyuda.

26Nukw i Yerusalemu haba akanyamuneza kenshi, kuk’ uhereye ku ngoma ya Salomo mwene Dawidi umwami w’Abisirayeli, hatāri harīgeze kuba ibihwanye n’ivyo i Yerusalemu.

27Maz’ abaherezi, ari bo Balewi, barahaguruka, bahezagira abantu; ijwi ryabo ryumvikana ku Mana, ugusenga kwabo gushika ahēra hayo ah’ iba, ari ho mw ijuru.

← Chapter 29 Jump to: Chapter 31 →