2 Chronicles 5

Kirundi (Bibliya Yera 1951, 1967 (Burundi))

← Chapter 4 Jump to: Chapter 6 →

1Uko ni kw igikorwa cose Salomo yakoreye ingoro y’Uhoraho carangiye. Maze yinjiza ivyo se Dawidi yari yaragize inyegu y’ Uhoraho, amafeza n’amazahabu, n’ibintu vy’ibikoreshwa, abishira mu bubīko bg’ingoro y’Imana.

2Maze Salomo akoranya abashingantahe b’Abisirayeli n’abakuru b’imiryango bose, ari bo bakuru bo mu mazu ya ba sekuruza b’ Abisirayeli, bakoranira i Yerusalemu, kugira ngo badūgane isandugu y’isezerano ry’Uhoraho, bayikūye mu gisagara ca Dawidi, ari ho i Siyoni.

3Nukw abagabo bose b’Abisirayeli bakoranira i bgami mu kwezi kw’indwi, ngo bagire imisi mikuru.

4Nukw abakuru bose bo mu Bisirayeli baraza, Abalewi baraheza barerura isandugu.

5Nuko badūgana iyo sandugu, n’ihema ry’ibonaniro, bo n’ibintu vyera vyari mw ihema vyose; ivyo vyose abaherezi, ari bo Balewi, ni bo bābidūganye.

6Maz’ umwami Salomo hamwe n’ ikoraniro ryose ry’Abisirayeli bāri bakoraniye imbere yiwe bahagaze imbere y’iyo sandugu, batanga intama n’inka kw ibimazi zitoharūrwa canke ngo zimenyekane igitigiri, kuko zar’ isinzi.

7Maz’ abaherezi binjiza iyo sandugu y’ isezerano ry’Uhoraho, bayishikana ahayo, haruguru mu ngoro, ari ho Hēra Cane, musi y’amababa y’abakerubi;

8kukw ivyo bishushanyo vy’abakerubi vyari bishanje amababa hejuru y’ikibanza c’iyo sandugu, bigakīngīra iyo sandugu n’iminiho yayo.

9Kand’ iyo miniho yayo yari miremire, bigatuma ūhagaze Ahēra, hafi y’ Ahēra Cane, yashobora kubona imitwe yayo, arik’ ūhagaze hanze ntiyayibona; kandi ni ho ikiri no kugeza n’ubu.

10Mur’ iyo sandugu nta kindi carimwo atari vya bisate bibiri Mose yashiriyemw’ i Horebu, igihe Uhoraho yasezerana isezerano n’Abisirayeli, hamwe bava muri Egiputa.

11Maz’ abaherezi barasohoka bava Ahēra, kukw abāri baje bose bo mu baherezi bāri biyejeje, ntibarinze kuzanwa n’ukuza mu mbu zabo;

12kand’ Abalewi bose b’abaririmvyi, Asafu na Hemani na Yedutuni n’abigishwa babo na bagenzi babo, bāri bahagaze i ruhande y’igicaniro ahahera i burasirazuba, bambaye impuzu zera derere, bavuza ivyitwa matowazi n’amakembe n’inanga, bari kumwe n’abaherezi ijana na mirongwibiri bavuza inzumbete.

13Nukw abāvuza inzumbete n’ abaririmvyi bahūza amajwi, bakumvikanisha ijwi rihūye batāzīra Uhoraho bamukengurukira, bakavuza ijwi rirengēra izo nzumbete na matowazi n’ibintu bicurarangwa, bagatāzīra Uhoraho, bat’ Uhoraho ni mwiza, kukw imbabazi ziwe zamah’ ibihe bidashira; nukw ako kanya igicu c’ igipfungu gica cuzura mu ngoro y’Uhoraho,

14bituma abaherezi badashobora guhagararayo ngo bahereze kubg’ ico gicu, kuk’ ubgiza bg’Uhoraho bgari bguzuye mur’ iyo ngoro yiwe.

← Chapter 4 Jump to: Chapter 6 →