2 Chronicles 9

Kirundi (Bibliya Yera 1951, 1967 (Burundi))

← Chapter 8 Jump to: Chapter 10 →

1Umwami w’umugore yaganza i Sheba yumvise ingene Salomo yabaye rurangiranwa, aza azanywe no kumugerageresha ibibazo bigoye; nukw ashika i Yerusalemu agendaniwe n’abantu benshi b’isinzi, afise n’ingamiya zīremētse imibavu n’amazahabu y’itīti, n’utubuyenge tw’igiciro kinini; ashitse kwa Salomo amudondorera ivyari mu mutima wiwe vyose.

2Nuko Salomo amusobanurira ivyo amubajije vyose; nta kintu na kimwe cāmunaniye kw amusobanurira.

3Nuk’ uwo mwami w’i Sheba abonye ingene Salomo ar’ umunyabgenge, n’ ingoro yubatse ukw imeze,

4n’ ivyo kurya vyo ku meza yiwe ukuntu vyari, n’abo mu rugo rwiwe uko bīfata, n’abasuku biwe uko bahēreza, n’ukuntu bambaye, bo n’abakevyi biwe bamuhēreza igiturire, n’ukuntu bambaye, n’ ibimazi vyo kwosa yatanga mu ngoro y’Uhoraho, arajorerwa.

5Abarira umwami, at’ Inkuru numvise ndi mu gihugu canje z’ ibikorwa vyawe n’ubgenge bgawe, zar’ iz’ ukuri.

6Ariko sinari navyemeye gushitsa nīyiziye, nkavyibonera n’amaso yanje. Ereg’ ivyo bāmbariye vy’ingen’ ufise ubgenge buhebuje ntibishika n’ agace k’ivyo mbonye: ivyawe bisumba uko navyumvise.

7Hahirwa abantu bawe, hahirwa n’aba bagendanyi bawe bama imbere yawe bakumva ubgenge bgawe!

8Uhoraho Imana yawe ahimbazwe, yagushimye akagushira ku ngoma yiwe, ng’ ube umwami, umutwarire. Imana yawe ko yakunze Abisirayeli, ikabakomeza gushitsa ibihe vyose, ni co catumye ikwimika ng’ ube umwami wabo, kugira ng’ uce izibereye n’ iziroranye.

9Maz’ aha umwami izahabu italanto ijana na mirongwibiri, amuha n’imibavu myinshi y’isinzi, n’utubuyenge tw’ igiciro kinini; ntihongeye kuboneka imibavu isa n’iyo uwo mwami w’i Sheba yahaye umwami Salomo.

10Kand’ abantu ba Huramu bo n’aba Salomo bāhora bazana amazahabu bayakūye i Ofiru, bāzanana n’ibiti vyitwa alumugi n’ utubuyenge tw’igiciro kinini.

11Ivyo biti vya alumugi umwami ni vyo yabājemw’ ivyuririzo vy’ ingoro y’Uhoraho n’ivy’ ingoro yiwe ubgiwe; yabibājemwo n’ inanga n’amakembe vy’abaririmvyi; ntihāri hārīgeze kuboneka ibiti vya alumugi nk’ivyo mu gihugu c’i Buyuda.

12Nuk’ umwami Salomo aha uwo mwami w’i Sheba ivyo yagomba vyose n’ico amwatse cose, udashizemw’ ivyo yamushubirije mu nkōko ku vyo yamugemuriye. Bukeye uwo mwami arahaguruka, aragenda, asubira mu gihugu ciwe, bo n’abantu biwe.

13Amazahabu yaza kwa Salomo mu mwaka mu mwaka, ukuriba kwayo kwashika italanto amajana atandatu na mirongwitandatu na zitandatu,

14udashizekw ayo abahanjuzi n’abadandaza bāzana; kand’ abami bose bo muri Arabiya n’abaganza igihugu bāzanira Salomo amazahabu n’amafeza.

15Maz’ umwami Salomo acurisha inkinzo nini‐nini amajana abiri mw izahabu, imwe‐imwe yacurwa mw izahabu irivye shekeli amajana atandatu.

16Acurisha n’inkinzo nto‐nto amajana atatu mw izahabu nyene, imwe‐imwe yacurwa mw izahabu irivye shekeli amajana atatu; umwami azishira muri ya nzu yitwa iy’ Ikibira c’i Lebanoni.

17Kand’ umwami yibāzishiriza intebe nini y’ubgami mu mahembe y’inzovu, ayomekakw izahabu iramuye;

18iyo ntebe yar’ ifise aho kudondagira hatandatu, n’agatebe ko gushirakw ibirenge gacuzwe mw izahabu, gafatanijwe n’iyo ntebe; kand’ impande zompi z’icicaro cayo yar’ ifise aho gushirakw amaboko, n’ibishushanyo bibiri vy’intambge, kimwe gihagaze ku ruhande rumwe, ikindi ku rundi rw’ahashirwa amaboko nyene.

19Kandi hār’ ibishushanyo vy’intambge cumi na bibiri, bidondagije kimwe‐kimwe impande zompi z’aho kudondagira ukw ari hatandatu; mu bihugu vyose nta ntebe y’ubgami yigeze kubāzwa ihwanye n’iyo.

20Kand’ ibintu vyose vy’umwami Salomo vyo kunywesha vyar’ ivy’ izahabu, n’ibikoreshwa vyose vyo mur’ iyo nzu yitwa iy’ Ikibira c’i Lebanoni vyar’ ivy’ izahabu iramuye; kuko ku ngoma ya Salomo ifeza ata co bāyiyumvirako.

21Kuk’ umwami yar’ afise amāto aja i Tarushishi, ajanwa n’abantu ba Huramu; ukw imyaka itatu ishize, ayo māto y’i Tarushishi yagaruka azanye amazahabu n’ amafeza n’amahembe y’inzovu n’ inkima n’ibisīga vyitwa tawusi.

22Uko ni k’ umwami Salomo yarusha abami bose bo mw isi ubutunzi n’ubgenge.

23Mu bihugu vyose vyo mw isi hāhora haza abami bagomba kubona Salomo, no kwumva ivyo avugishwa n’ubgenge Imana yashize mu mutima wiwe.

24Umuntu wese muri bo yaza azanye indamukanyo, ar’ ivyakozwe mu mafeza canke mu mazahabu, ar’ ivyambarwa, ar’ ibirwanishwa, ar’ imibavu, ar’ amafarasi, ar’ inyumbu; ni ko vyagenda uk’ umwaka utashe.

25Kandi Salomo yar’ afise impongore ibihumbi bine z’amafarasi yakwega imikogote yiwe, n’abantu bagendera ku mafarasi ibihumbi cumi na bibiri, bamwe abashira mu bisagara bibīkwamw’ imikogote, abandi i we i Yerusalemu.

26Kandi yaganza abami bose, uhereye kuri rwa ruzi Efurate, ugashitsa ku gihugu c’Abafilisitiya, ukagarukira ku rubibe rwa Egiputa.

27Umwami, amafeza yararushe ayahindura nk’ amabuye i Yerusalemu, n’ibiti vy’amasederi bihinduka nk’ivy’ imisukomora vyo mu biyaya mu kuba vyinshi.

28Kandi bāzanira Salomo amafarasi bayakūye muri Egiputa no mu bindi bihugu vyose.

29Ibindi vyose vyadonzwe kuri Salomo, uhereye ku ca mbere ugashitsa ku c’imperēra, mbega ntivyanditswe mu vyo Natani uwavugishwa n’Imana yadonze, no mu vyo Ahiya w’i Shilo yavugishijwe, no mu vyo Ido kamenyi yabonye kuri Yerobowamu mwene Nebati?

30Salomo yamaze imyaka mirongwine ari ku ngoma aganza Abisirayeli bose ar’ i Yerusalemu.

31Nuko Salomo ahamvya ba sekuruza, bamuhamba ku murwa wa se Dawidi; maz’ umwana wiwe Rehobowamu asubira ku ngoma yiwe.

← Chapter 8 Jump to: Chapter 10 →