2 Chronicles 33

Kirundi (Bibliya Yera 1951, 1967 (Burundi))

← Chapter 32 Jump to: Chapter 34 →

1Manase yagiye ku ngoma amaze imyaka cumi n’ibiri; ayimarakw imyaka mirongwitanu n’itanu ar’ i Yerusalemu.

2Akora ivyo Uhoraho abona kw ari bibi, aja mu bizira vy’ubuyobe vy’ abanyamahanga, abo Uhoraho yari yarirukanyei mbere y’Abisirayeli.

3Yongera gutabisha ibitabo ku mpinga z’imisozi, ivyo se Hezekiya yari yarasibanganije, yubakira za Bayali ibicaniro, abāza igishushanyo ca Ashera, asenga ingabo zose zo kw ijuru, ari zo nyenyeri, arazisaba.

4Yubaka n’ ibicaniro mu ngoro y’Uhoraho, ari ho Uhoraho yari yaravuze, at’ I Yerusalemu ni ho izina ryanje rizoba ibihe vyose.

5Kandi yubakira izo ngabo zose zo kw ijuru ibicaniro mu ntangaro no mu nyubakwa vyo ku ngoro y’Uhoraho.

6Atanga abana biwe kw ibimazi ngo boswe mu muriro mu mwonga wa mwene Hinomu, agapfumuza, agatera amabara, agakoresha uburozi, akaja kuraguza abahamagara imizimu, n’abamenyi; yakora ibibi vyinshi imbere y’Uhoraho, bimutera umwikomo.

7Ca gishushanyo c’ikigirwamana yabāje agishinga mu ngoro y’Imana, ari yo ngoro Imana yari yarabariye Dawidi na Salomo umuhungu wiwe, iti Mur’ iyi ngoro, bo n’i Yerusalemu, ni ho natoranije mu miryango yose y’Abisirayeli ko nzohashira izina ryanje ngo rihabe ibihe vyose.

8Kand’ iti Sinzosubira gukūra Abisirayeli ngo bave mu gihugu nashinze ko kizoba ica ba sekuruza, ni bitondera ivyo nabageze vyose, ari vyo vyagezwe n’ amabgirizwa n’imigenzo nageze mbitumye Mose.

9Nuko Manase azimiza Abayuda n’ab’i Yerusalemu, bituma bakora nabi gusumvya amahanga Uhoraho yageshereje imbere y’Abisirayeli.

10Maz’ Uhoraho abūrira Manase n’abantu biwe, ariko ntibābibabara.

11Ni co catumye Uhoraho abatēza abagabisha b’ingabo z’umwami w’i Ashuri, bagafata Manase, bakamubohesha ivyuma, bakamushira mu minyororo, bakamujana i Babuloni.

12Maz’ abonye kw ashitse mu magorwa, yinginga Uhoraho Imana yiwe, yicisha bugufi ashika hasi imbere y’Imana ya ba sekuruza.

13Maz’ ayisenze, iramwemerera, yumva ukwinginga kwiwe, imusubiza i Yerusalemu mu bgami bgiwe. Nuko Manase aca amenya yuk’ Uhoraho ari we Mana.

14Hanyuma y’ivyo yubaka uruzitiro rw’amabuye, ruciye inyuma y’igisagara ca Dawidi, ruca ku ruhande rw’i Gihoni ruhera i burengerazuba mu mwonga, rukarinda rushika kw irembo ryitwa iry’ Amafi; arukīkūza i Ofeli, ararukuza, arugira rurerure cane; kand’ ashira abagabisha b’ingabo mu bisagara vyose vy’i Buyuda bizitiriwe inzitiro.

15Kand’ akūrah’ ibigirwamana vy’amahanga, akūra na ca gishushanyo mu ngoro y’Uhoraho, n’ibicaniro vyose yari yarubatse ku musozi urikw ingoro y’Uhoraho n’i Yerusalemu, abishiburira inyuma y’igisagara.

16Maz’ asana igicaniro c’Uhoraho, agitangirakw ibimazi vy’ishimwe n’ivyo gukenguruka, kand’ agera kw Abayuda basaba Uhoraho Imana y’Abisirayeli.

17Mugabo abantu bakomeza gutangira ibimazi mu bitabo vyo ku mpinga z’imisozi, ariko bakabiha Uhoraho Imana yabo wenyene gusa.

18Nukw ibindi vyose vyadonzwe kuri Manase, n’ivy’ isengesho yasenze Imana yiwe, n’amajambo ba kamenyi bāmubariye mw izina ry’Uhoraho Imana y’Abisirayeli, vyanditswe mu bitabo bidonda ivy’ abami b’Abayuda.

19Kandi n’ivy’ isengesho ryiwe, n’ ingene yemerewe, n’ivy’ ivyaha vyiwe vyose n’ugucumura kwiwe, n’ivy’ ahantu hose yatavye ibitabo, akahashinga inkingi za Ashera n’ibishushanyo bibājwe, ataricisha bugufi, ivyo vyanditswe mu majambo ya Hozayi.

20Nuko Manase ahamvya ba sekuruza, ahambga mu rugo rwiwe; maz’ umuhungu wiwe Amoni asubira ku ngoma yiwe.

21Amoni yagiye ku ngoma amaze imyaka mirongwibiri n’ibiri, ayimarakw imyaka ibiri ar’i Yerusalemu.

22Akora ivyo Uhoraho abona kw ari bibi, nk’uko se Manase yakora; aha ibimazi ibishushanyo vyose bibājwe, ivyo se Manase yakoresheje, arabisaba.

23Ntiyicisha bugufi imbere y’ Uhoraho, nk’uko se Manase yicishije bugufi, ariko Amoni uwo agenda arushiriza gucumura.

24Bukeye abanyarugo biwe baramugarariza, bamutsinda mu ngoro yiwe.

25Maz’ abantu bo mu gihugu bica abo bantu bose bāgararije umwami Amoni, baraheza bimika Yosiya umuhungu wiwe, bamusubiza ku ngoma yiwe.

← Chapter 32 Jump to: Chapter 34 →