2 Chronicles 28

Kirundi (Bibliya Yera 1951, 1967 (Burundi))

← Chapter 27 Jump to: Chapter 29 →

1Ahazi yar’ amaze imyaka mirongwibiri igihe yima, amara imyaka cumi n’itandatu i Yerusalemu ari ku ngoma. Mugabo ntiyakora ivyo Uhoraho abona kw ari vyiza, nk’uko sekuruza Dawidi yakora;

2ariko yagendera mu ngeso z’abami b’Abisirayeli, agakoresha ibishushanyo vya za Bayali bivugutiwe mu nkero.

3Ikigeretseko, yosereza imibavu mu mwonga wa mwene Hinomu, atanga n’abana biwe kw ibimazi ngo boserezwe mu muriro, nk’ ukw ibizira vy’ubuyobe vy’abanyamahanga vyari bimeze, abo Uhoraho yari yarirukanye imbere y’Abisirayeli.

4Yatanga ibimazi akosereza imibavu mu bitabo no ku mpinga z’imisozi no musi y’ igiti cose gitotahaye.

5Kubg’ ivyo Uhoraho Imana yiwe amugabura mu maboko y’umwami w’i Siriya. Abasiriya baramunesha, bafata mpiri benshi cane mu bantu biwe, babajana i Damasiko ar’ inyagano. Arongera agaburwa mu maboko y’umwami w’Abisirayeli, na we aramunesha, yica benshi cane.

6Kuk’ uwo mwami Peka mwene Remaliya yishe mu Bayuda ingabo ibihumbi ijana na mirongwibiri ku musi umwe, bose ar’ abantu b’abahizi; inyanduruko n’uko bāri baretse Uhoraho Imana ya ba sekuruza.

7Kandi Zikuri, umuntu w’umuhizi wo mu Befurayimu, yica Mayaseya umwana w’umwami, na Azurikamu umubgiriza wo mu ngoro i bgami, na Elukana uwa kabiri ku mwami.

8Nukw Abisirayeli bajana mu b’i wabo abantu ibihumbi amajana abiri ar’ inyagano, b’abagore n’ abahungu n’abakobga, babasahura n’amasahu menshi cane, babijana i Samariya.

9Ariko hāriy’ ūvugishwa n’Uhoraho yitwa Odedi; aragenda aja gusanganira izo ngabo zihindukiye i Samariya, arababarira, at’ Ereg’ icātumye Uhoraho Imana ya ba sogokuruza agabura Abayuda mu maboko yanyu n’uko yar’ abarakiye, ariko mwebge mwabicanye ishavu ryinshi rishika mw ijuru.

10None mugabiye kugandura Abayuda n’ab’i Yerusalemu ngo mubagire abagurano n’abaguranokazi; aho mwebge nta bicumuro mufise vyanyu ubganyu mwācumuye k’ Uhoraho Imana yanyu?

11Enda rero ni munyumve, ni musubizey’ aba bantu b’i wanyu mwanyaze; kuk’ uburake bg’inkazi bg’Uhoraho buri kuri mwebge.

12Maz’ abaganwa bamwe b’Abefurayimu, Azariya mwene Yohanani, na Berekiya mwene Meshilemoti, na Yehizikiya mwene Shalumu, na Amasa mwene Hadulayi, barahaguruka, babuza abo batabārutse mu ntambara,

13barababarira, bat’ Abo bantu b’inyagano ntimubazane ngaha; kukw ico mugomba gukora kizoducumuza k’ Uhoraho, congereze ivyaha vyacu n’ibicumuro vyacu; kuko na none twācumuye bikomeye, kandi twebge Abisirayeli dufitiwe uburake bg’inkazi.

14Nukw izo ngabo zica zisiga abo bantu b’inyagano bo n’amasahu basahuye imbere y’ abo baganwa, n’imbere y’abāhakoraniye bose.

15Maz’ abo bantu bavuzwe amazina barahaguruka, bābīra abo bantu b’inyagano; abāri bambaye ubusa bose bo muri bo babambika ivyo bakūye mu masahu, babaha impuzu n’ inkweto, barabagaburira, babaha n’ivyo kunywa, babasiga amavuta; abananiwe bose muri bo babashira ku ndogoba, babashikana mu b’i wabo i Yeriko, igisagara c’ibigazi; baraheza basubira i Samariya.

16Ico gihe umwami Ahazi atuma ku mwami w’i Ashuri ngw amutabare,

17kukw Abanyedomu bāri bongeye gutera i Buyuda, bakahanesha, bakajana abaho ar’ inyagano.

18Kandi n’Abafilisitiya na bo bāri bateye ibisagara vyo mu kiyaya, n’ivy’ i Buyuda bg’i bumanuko, bafata i Beti‐shemeshi, n’i Ayaloni, n’i Gederoti, n’i Sokoho, n’ibisagara bihakūkira, n’i Timuna n’ibisagara bihakūkira, n’i Gimuzo na ho nyene n’ibisagara bihakūkira; baca barahinjira.

19Uhoraho yari yacishije Abayuda bugufi, abahōye Ahazi umwami wabo, kuko yakoze ivy’ isoni nke mu Buyuda, agacumura k’Uhoraho bitangaje.

20Nuko Tigulati‐pileseri umwami w’i Ashuri aza kuri we; ariko mu gishingo co kumuremesha amurandura umutima.

21Kuko Ahazi yābiriye ibintu bimwe vyo mu ngoro y’Uhoraho, no mu ngoro yiwe ubgiwe, no mu mazu y’ abaganwa, akabishikanira umwami w’i Ashuri; ariko ntivyagira ico bimumarira.

22Maz’ uwo mwami Ahazi nyene, igihe aburaniwe arushiriza kuja imbere gucumura k’ Uhoraho,

23kuko yahaye ibimazi imana z’i Damasiko zamunesheje, akavuga, at’ Izo mana z’abami b’i Siriya ko zabafashije, hinge nanje ndazihe ibimazi zintabare. Ariko zāmukwegeye akaziri, bo n’Abisirayeli bose.

24Nuko Ahazi akoranya ibintu vyose vy’imbombovu vyo mu ngoro y’Imana, arabijanjagura, yugara inzugi z’iyo ngoro y’Uhoraho; yiyubakira ibicaniro ahantu hose h’i Yerusalemu.

25No mu gisagara cose c’i Buyuda atabamw’ ibitabo vy’aho kwosereza imibavu izindi mana, atera umwikomo Uhoraho Imana ya ba sekuruza.

26Ibindi vyose vyadonzwe kuri we, n’ivy’ ingeso ziwe zose, uhereye ku vya mbere ugashitsa ku vy’ imperēra, vyanditswe mu gitabo c’abami b’Abayuda n’ab’ Abisirayeli.

27Nuko Ahazi ahamvya ba sekuruza, bamuhamba ku murwa w’i Yerusalemu, kuko batāmuhamvye mu mva z’abami b’i Buyuda; maz’ umuhungu wiwe Hezekiya asubira ku ngoma yiwe.

← Chapter 27 Jump to: Chapter 29 →