2 Chronicles 11

Kirundi (Bibliya Yera 1951, 1967 (Burundi))

← Chapter 10 Jump to: Chapter 12 →

1Ariko Rehobowamu ashitse i Yerusalemu, akoranya umuryango w’Abayuda n’uw’ Ababenyamini, bakorana ar’ ingabo z’ abahizi ibihumbi ijana na mirongumunani, ngo baje gutera Abisirayeli, bagarukanire Rehobowamu igihugu.

2Maz’ ijambo ry’ Uhoraho riza kuri Shemaya umuntu w’Imana,

3riti Barira Rehobowamu mwene Salomo, umwami w’Abayuda, n’Abisirayeli bose bar’ i Buyuda n’i Bubenyamini,

4ut’ Uku ni k’ Uhoraho agize, ngo Ntimuze mudūge kurwanya ab’i wanyu; ngo Ni mwitahire, umuntu wese asubire i we; ngo Kukw ivyabaye vyavuye kuri we. Nuko bumvira iryo jambo ry’Uhoraho, baritahira, bareka kuja gutera Yerobowamu.

5Nuko Rehobowamu aba i Yerusalemu, yubaka ibisagara i Buyuda, abiha inzitiro z’amabuye zikomeye.

6Yubaka Betelehemu na Etamu na Tekowa,

7na Beti‐suri na Sokoho na Adulamu,

8na Gati na Maresha na Zifu,

9na Adorayimu na Lakishi na Azeka,

10na Sora na Ayaloni na Heburoni, ibisagara vy’i Buyuda n’i Bubenyamini bikīkūjwe inzitiro.

11Agumya amaboma, ayashiramw’ abagabisha b’ingabo, abīkamw’ ivyo kurya n’amavuta ya elayo na vino.

12Mu gisagara cose ahashira inkinzo n’amacumu, akigira igikomeye cane. Nukw akomeza kuganza i Buyuda n’i Bubenyamini.

13Maz’ abaherezi n’Abalewi bāba i Bgisirayeli hose baza kuri we, bavuye mu ntāra zabo zose.

14Bata amaragiro yabo n’amatongo yabo, baja i Buyuda n’i Yerusalemu, kuko Yerobowamu n’ abahungu biwe bābirukanye mu buherezi bgabo bgo guhereza Uhoraho;

15Yerobowamu akīshirirah’ abandi baherezi bo mu bitabo vyo ku mpinga z’imisozi, ngo bahēreze ibisigo vy’amapfizi y’impene n’ibishushanyo vy’ amamasa yacurishije.

16Maz’ abo Balewi bakurikirwa n’abari bafise umwete wo kurondera Uhoraho Imana y’Abisirayeli, bavuye mu miryango yose y’Abisirayeli, bacīkira i Yerusalemu ngo babone gushikanira Uhoraho Imana ya ba sekuruza ibimazi.

17Nuko batera ingoma y’i Buyuda gushikama, na Rehobowamu mwene Salomo na we nyene bamuha gushikama kumara imyaka itatu; kuko mur’ iyo myaka itatu bāgendana ingeso nziza za Dawidi n’iza Salomo.

18Rehobowamu arongora Mahalati umukobga wa Yerimoti, Yerimoti mwene Dawidi; nyina yari Abihayili umukobga wa Eliyabu, Eliyabu mwene Isayi.

19Bavyarana abana b’abahungu Yushi na Shemariya na Zahamu.

20Hanyuma y’uwo arongora Mayaka umukobga wa Abusalomu, bavyarana Abiya na Atayi na Ziza na Shelomiti.

21Kandi Rehobowamu akundwakaza Mayaka umukobga wa Abusalomu kumurutisha abandi bamikazi biwe bose, n’incoreke yar’ afise zimeze bga bagore; kuko yar’ afise abamikazi cumi n’umunani, n’incoreke mirongwitandatu, avyara abana b’abahungu mirongwibiri n’umunani n’abakobga mirongwitandatu.

22Maze Rehobowamu asobanura Abiya, uwo yavyaye kuri Mayaka, aba ari we aha ubugabo mu bo bavukana, kukw ari we yagomba kw azoba umwami.

23Aca mu bgenge, akwiragiza abahungu biwe bose mu ntāra zose z’i Buyuda n’i Bubenyamini, ahār’ igisagara hose kizitijwe uruzitiro rw’amabuye; abaha ivyo kurya vyinshi vyo kubatunga; abaronderera n’abagore benshi.

← Chapter 10 Jump to: Chapter 12 →