2 Chronicles 8

Kirundi (Bibliya Yera 1951, 1967 (Burundi))

← Chapter 7 Jump to: Chapter 9 →

1Nuko hashize imyaka mirongwibiri, ari yo Salomo yubakiyemw’ ingoro y’Uhoraho n’ iyiwe ubgiwe,

2Salomo asanura ibisagara Huramu yari yaramuhaye, abigerēramw’ Abisirayeli.

3Maze Salomo atera i Hamati‐zoba, arahanesha.

4Araheza yubaka igisagara c’i Tadumori mu bugaragwa, n’ibisagara vyose vy’ ibigega, ivyo yubatse i Hamati.

5Yubaka n’i Beti‐horoni ho haruguru n’i Beti‐horoni ho hepfo, ibisagara bizitijwe inzitiro z’amabuye, bifise inzugi mu marembo n’ibihindizo.

6Yubaka n’i Bayalati, n’ibindi bisagara vyose vy’ ibigega vyiwe, n’ibisagara vyose vyo kubīkamw’ imikogote yiwe, n’ivy’ abagendera ku mafarasi biwe, n’amazu yose yagomvye kwubaka i Yerusalemu n’i Lebanoni no mu gihugu cose yaganza.

7Abantu bose b’amasigarira y’ Abaheti n’Abamori n’Abaferizi n’Abahiwi n’Abayebusi, abatār’ Abisirayeli,

8abuzukuruza babo bari barasigaye mu gihugu, abo Abisirayeli batāranduye, abo ni bo Salomo yatōjemw’ abo gushinga ibikebere, abahindura abaja na bugingo n’ubu.

9Ariko mu Bisirayeli bo, nta bo yahinduye abaja ngo bamukorere; ariko bār’ ingabo zo kuja mu ntambara, n’ abagabisha bakuru b’ingabo, n’ abagaba abagendera ku mafarasi n’imikogote.

10Abo ni bo bakoresha bakuru babgiririza Salomo; bose na bose bar’ amajana abiri na mirongwitanu, bābgiriza abantu.

11Maze Salomo yimura umwamikazi wiwe, umukobga wa Farawo, mu gisagara ca Dawidi, amushira mu ngoro yamwubakiye; kuko yavuze, at’ Umwamikazi wanje ntiyoba mu ngoro ya Dawidi umwami w’Abisirayeli, kukw ah’ isandugu y’Imana yashitse hose ar’ ahantu hēra.

12Kandi Salomo yagenda yosereza Uhoraho ibimazi ku gicaniro c’Uhoraho nyene, ico yari yarubatse imbere y’urubaraza,

13akāma atanga ivyashinzwe na Mose vyatangwa uko bukeye, bo n’ivyo ku masabato n’ivyo mu mboneko z’ukwezi, n’ivyo ku misi mikuru yashinzwe, nk’ukw ikurikirana gatatu‐gatatu mu mwaka, ari yo misi mikuru y’imitsima itambiwe, n’umusi mukuru ukurikira amasabato ndwi, n’imisi mikuru y’insago.

14Atunganya imbu z’abaherezi uko zākurikirana zo gukora, nk’uko se Dawidi yasize ashinze, n’ivy’ ibikorwa vy’ Abalewi vyo guhimbaza no gufasha abaherezi, nk’ukw ibikorwa vyabo vy’imisi yose vyari biri, n’ ivy’ abashibamyi na bo, nk’ukw imbu zabo zakurikirana ku birimba vyose; kukw ari ko Dawidi, wa muntu w’Imana, yari yasize abishinze.

15Nta bgirizwa na rimwe bāvako mu yo umwami yasize ageze ku vy’abaherezi n’ Abalewi, canke ku kintu ic’ ari co cose, canke ku vy’ububīko.

16Uko ni ko Salomo yatunganije ibikorwa vyose, uhereye ku musi yashiriyeh’ itanguriro ry’ingoro y’Uhoraho gushitsa aho yayujurije. Nukw iyo ngoro y’Uhoraho iruzura.

17Maze Salomo aja i Eziyoni‐geberi n’i Eloti, kw isēsero ry’ ikiyaga mu gihugu c’Abanyedomu.

18Huramu amurungikira amāto, ayarungikanye abantu biwe, bo n’abazi gusōza bamenyereye ivy’ ikiyaga; baragenda bafatanya n’abantu ba Salomo, baja i Ofiru, bakūray’ amazahabu italanto amajana ane na mirongwitanu, bayazanira umwami Salomo.

← Chapter 7 Jump to: Chapter 9 →