2 Chronicles 14

Kirundi (Bibliya Yera 1951, 1967 (Burundi))

← Chapter 13 Jump to: Chapter 15 →

1Nuko Abiya ahamvya ba sekuruza, ahambga ku murwa wa Dawidi; maz’ umuhungu wiwe Asa asubira ku ngoma yiwe. Ku ngoma yiwe igihugu kimara imyaka cumi gifise impore.

2Asa akora ivyo Uhoraho Imana yiwe abona kw ari vyiza kandi bibereye,

3kuko yakūyeh’ ibicaniro vyubakiwe ibigirwamana vy’abanyamahanga bo n’ibitabo vyo ku mpinga z’imisozi, amenagura amabuye bāshinze, atemagura inkingi bāshingiye Ashera;

4maz’ agera Abayuda ko barondera Uhoraho Imana ya ba sekuruza, no kwitondera ivyagezwe vyiwe n’amabgirizwa.

5Kand’ akūra mu bisagara vyose vy’i Buyuda ibitabo bātavye n’ ibishushanyo vy’izuba. Nuko ku ngoma yiwe igihugu kigira impore.

6Kandi yubaka i Buyuda ibisagara bizitijwe inzitiro z’amabuye, kuko hār’ impore mu gihugu, kandi mur’ iyo myaka nta ntambara yarwanye, kuk’ Uhoraho yar’ amuhaye umutēkāno.

7Yari yarabariye Abayuda, ati Ni muze twubake ibi bisagara, tuvyubakire inzitiro n’iminara, dushireh’ inzugi mu marembo n’ibihindizo; igihugu kiracar’ icacu, kuko twarondeye Uhoraho Imana yacu; twamurondeye, na we aduhaye kugira umutēkāno impande zose. Nuko barubaka, bigenda neza.

8Kandi Asa yar’ afise ingabo z’ Abayuda ibihumbi amajana atatu zitwaje inkinzo n’amacumu, n’iz’ Ababenyamini ibihumbi amajana abiri na mirongumunani zitwaje inkinzo kandi b’abarashi; abo bose bār’ abantu b’abahizi.

9Bukeye Zera Umunyetiyopiya araza arabatera, afise ingabo ibihumbi igihumbi, n’imikogote y’ intambara amajana atatu, ashika i Maresha.

10Maze Asa aja kumutega, batonda urugamba mu kiyaya Zefata i Maresha.

11Asa araheza atakambira Uhoraho Imana yiwe, at’ Ewe Uhoraho, nta mutabazi ariho atari wewe, ashobora gutabara abanyantege nke akabakiza abanyenkomezi; ewe Uhoraho Mana yacu, udutabare, kukw ari wewe twizigiye, kandi tuje mw izina ryawe kurwanya iki gitero kingana girtyo. Ewe Uhoraho, ni wewe Mana yacu: ntuneshwe n’umuntu buntu.

12Maz’ Uhoraho arwaniriza Abanyetiyopiya imbere ya Asa n’ Abayuda; abo Banyetiyopiya baca barahunga.

13Maze Asa n’ ingabo ziri kuri we barabakinagiza, babashitsa i Gerari; mu Banyetiyopiya hapfa benshi cane, ntibāba bagishobora kwigarukira, kuko bātikiriye imbere y’Uhoraho n’imbere y’ingabo ziwe. Abayuda bīronkera amasahu menshi.

14Maze batera ibisagara vyose bihereranye n’i Gerari, kukw abaho Uhoraho yari yābaciye umuhongo. Basahura ivyo bisagara vyose, baharonka amasahu menshi.

15Batera amahema y’abanyabitungwa, banyaga intama z’ ibitayega n’ingamiya, baraheza basubira i Yerusalemu.

← Chapter 13 Jump to: Chapter 15 →