2 Chronicles 26

Kirundi (Bibliya Yera 1951, 1967 (Burundi))

← Chapter 25 Jump to: Chapter 27 →

1Nukw abantu bose b’Abayuda bahitana Uziya baramwimika, bamusubiza ku ngoma ya se Amaziya; Uziya yar’ amaze imyaka cumi n’itandatu.

2Ni we yasanasannye i Eloti, ahagarura i Buyuda, umwami Amaziya amaze guhamvya ba sekuruza.

3Nuko Uziya yar’ amaze imyaka cumi n’itandatu igihe yaja ku ngoma, araheza ayimarakw imyaka mirongwitanu n’ibiri i Yerusalemu. Nyina yitwa Yekiliya w’i Yerusalemu nyene.

4Akora ivyo Uhoraho abona kw ari vyiza, nk’ivyo se Amaziya yakora vyose.

5Ashira umutima ku kurondera Imana mu gihe cose ca Zekariya, umuntu yamwigishije kwubaha Imana; kand’ uko yakomeje kurondera Uhoraho, Imana yamuhaye umugisha.

6Bukeye aragenda atera Abafilisitiya, asangangura uruzitiro rw’i Gati n’urw’ i Yabune n’urw’ i Ashidodi; yubaka ibisagara mu ntāra y’i Ashidodi n’ahandi mu gihugu c’Abafilisitiya nyene.

7Nukw Imana iramufasha, arwanya n’abo Bafilisitiya bo n’Abarabo bāba i Guribayali, bo n’ab’i Mayoni.

8Kand’ Abamoni bazanira Uziya ingorore; nukw izina ryiwe rirāmāmara, rishika n’ahafata muri Egiputa; kuko yagiye arushiriza kugira ububasha.

9Kandi Uziya yubaka iminara i Yerusalemu kw irembo ryo ku mfuruka y’uruzitiro rwaho rw’ amabuye, no kw irembo rija ku mwonga, no ku yindi mfuruka y’ uruzitiro nyene; iyo minara arayigumya.

10Kandi yubaka iminara no mu bugaragwa, yimbisha n’ivyobo vyinshi vyo kubīka amazi, kuko yar’ afise amasho menshi mu gihugu gishashe no mu biyaya; yar’ afise n’abarimyi n’abazi gutunganya imizabibu mu misozi no mu matongo amera cane, kuko yar’ umurimyi.

11Kandi Uziya yar’ afise ingabo z’abarwanyi, bāja kurwana bīcīye ibitero, nk’ukw ibitigiri vyabo vyashinzwe, uko bāharūwe na Yeyeli umukarani na Mayaseya umwanditsi, bāgabga na Hananiya, umwe mu bagabisha b’umwami.

12Igitigiri cose c’abakuru b’ amazu ya ba sekuruza, abantu b’ abahizi, bar’ ibihumbi bibiri n’ amajana atandatu.

13Kand’ abo bāgaba ingabo zigishijwe kurwana, ibihumbi amajana atatu n’ ibihumbi ndwi n’amajana atanu, bārwanana ubuhizi bginshi, barwanira umwami ngo ntāneshwe n’abansi.

14Uziya aronderera izo ngabo zose inkinzo n’amacumu, n’inkofero z’ivyuma, n’amakoti y’ivyuma, n’imiheto, n’amabuye atereshwa umugozi.

15Kand’ i Yerusalemu ahakoreshereza ibintu vy’intambara vyigenewe n’ abahinga, bifise imishibuka irasa imyampi ikavundereza amabuye manini‐manini, vyo gushirwa ku minara no hejuru ku mfuruka z’ uruzitiro. Izina ryiwe riba rurangiranwa, rirāmāmara, kuko yafashijwe bitangaje, gushitsa aho yabereye agahambaye.

16Arikw amaze kuba agahambaye, yishira hejuru mu mutima wiwe, bituma akora ivyo kugabitanya, acumura k’Uhoraho Imana yiwe; kuko yinjiye mu rusengero rw’Uhoraho ngo yosereze imibavu ku gicaniro ihora yoserezwako.

17Maze Azariya umuherezi aca arinjira amukurikiye, ari kumwe n’abandi baherezi b’Uhoraho mirongumunani, abantu b’abahizi;

18babuza umwami Uziya, baramubarira, bat’ Ewe Uziya, s’igikorwa cawe kwosereza Uhoraho imibavu, n’ic’ abaherezi bo mu ba Aroni bārobanuriwe kwama bayosa. Enda va aha hantu hēra, kuk’ ucumuye, kand’ ivyo nta cubahiro bizoguhesha kivuye k’ Uhoraho Imana.

19Maze Uziya aca araraka; kandi yar’ afise icotero mu ntoke, agira ngo yose imibavu. Akirakiye abo baherezi, imibembe isēsa mu ruhanga rwiwe, akir’ aho nyene imbere y’ abaherezi mu ngoro y’Uhoraho, i ruhande y’igicaniro coserezwakw imibavu.

20Maze Azariya umuherezi mukuru n’abandi baherezi bose bagize ngo baramurāba, babona imibembe ishēshe mu ruhanga rwiwe; bakwakwanya kumusunika ngw ahave, na we nyene ubgiwe yihuta gusohoka, kuk’ Uhoraho amuteje indwara.

21Nuk’ umwami Uziya arinda atanga akir’ umunyamibembe, aba mu nzu ya wenyene kubg’ imibembe yiwe, kukw atemerewe kuza mu ngoro y’Uhoraho; maze Yotamu umwana wiwe ni we yagaba ivyo mu rugo i bgami, agacira abantu bo mu gihugu imanza.

22Nukw ibindi vyose vyadonzwe kuri Uziya, uhereye ku ca mbere ugashitsa ku c’imperēra, vyanditswe n’uwavugishwa n’Imana Yesaya mwene Amosi.

23Nuko Uziya ahamvya ba sekuruza, bamuhamba hamwe na bo; mugabo bamushira ukwiwe mw itongo rihambgamw’ abami, kuko bāvuga kw ar’ umunyamibembe. Maz’ uwo muhungu wiwe Yotamu asubira ku ngoma yiwe.

← Chapter 25 Jump to: Chapter 27 →