2 Chronicles 36

Kirundi (Bibliya Yera 1951, 1967 (Burundi))

← Chapter 35 Jump to:

1Maz’ abantu bo mur’ ico gihugu bahitana Yehowahazi umuhungu wa Yosiya, bamwimika mu gishingo ca se i Yerusalemu.

2Yehowahazi yagiye ku ngoma amaze imyaka mirongwibiri n’itatu; ayimarakw amezi atatu ar’ i Yerusalemu.

3Bukeye umwami wa Egiputa amukūra ku ngoma i Yerusalemu; igihugu ciwe agicira iciru c’italanto ijana z’ifeza n’italanto imwe y’izahabu.

4Uwo mwami wa Egiputa yimika Eliyakimu mukuru we, amugira umwami w’i Buyuda n’i Yerusalemu, ahindura izina ryiwe, amwita Yehoyakimu. Neko araheza afata Yehowahazi, amujana muri Egiputa.

5Kandi Yehoyakimu yagiye ku ngoma amaze imyaka mirongwibiri n’itanu; ayimarakw imyaka cumi n’umwe ar’i Yerusalemu; akora ivyo Uhoraho Imana yiwe abona kw ari bibi.

6Hanyuma Nebukadineza umwami w’i Babuloni araza aramutera, amuta mu minyororo, amujana i Babuloni.

7Nebukadineza atakw ajana n’ ibintu vyo mu ngoro y’Uhoraho i Babuloni, abishira mu rusengero rwiwe i Babuloni nyene.

8Ibindi vyose vyadonzwe kuri Yehoyakimu, n’ivy’ ibizira vy’ubuyobe yakoze, n’ibindi bibi vyose yagenda abonekako, vyanditswe mu gitabo c’abami b’Abisirayeli n’ab’ Abayuda. Maz’ umuhungu wiwe Yehoyakina asubira ku ngoma yiwe.

9Yehoyakina yagiye ku ngoma amaze imyaka cumi n’umunani; ayimarakw amezi atatu n’imisi cumi i Yerusalemu; na we akora ivyo Uhoraho abona kw ari bibi.

10Ku gacikamvura umwami Nebukadineza aratuma ngo bamuzane i Babuloni, bo n’ibintu vyiza‐vyiza vyo mu ngoro y’Uhoraho; yimika mukuru we Zedekiya ngw abe umwami w’i Buyuda n’i Yerusalemu.

11Zedekiya yagiye ku ngoma amaze imyaka mirongwibiri n’ umwe; ayimarakw imyaka cumi n’umwe i Yerusalemu;

12na we akora ivyo Uhoraho Imana yiwe abona kw ari bibi; ntiyicisha bugufi imbere y’uwavugishwa n’ Imana Yeremiya, iy’ amubariye ibiva mu kanwa k’Uhoraho.

13Na we agarariza umwami Nebukadineza, kandi yari yaramurahije Imana; nukw agamika izosi, yikomantaza umutima, ntiyahindukirira Uhoraho Imana y’Abisirayeli.

14Mbere n’abaherezi bakuru‐bakuru bose bo n’abantu bāgize ivy’ ubuhemu bginshi, bakaja mu vy’ibizira vyose vy’ubuyobe vy’abanyamahanga, bakanduza ingoro y’Uhoraho, iyo Uhoraho ubgiwe yari yarejeje i Yerusalemu.

15Uhoraho, Imana ya ba sekuruza, akabatumakw intumwa ziwe, akāma azindurwa uko bukeye no kubatuma, kuko yatewe akagongwe n’abantu biwe bo n’ aho hantu yaba.

16Ariko bagashinyagurira izo ntumwa z’Imana, bagakēngēra amajambo yayo, bagatwenga abo yavugisha, gushitsa ah’uburake bg’Uhoraho bgabaye ku bantu biwe, butagishobora kugarurwa.

17Nci co catumye abatēza umwami w’Abakaludaya, akicisha imisore yabo inkota, akabatsinda mu rusengero rwabo, ntagirire akagongwe umusore cank’ umwigeme, umutāma cank’ umusāza bukokori; bose akabagabura mu maboko yiwe.

18Kand’ ibintu vyose vyo mu ngoro y’Imana, ibito‐bito n’ibinini‐binini, bo n’ivy’ ubutunzi vyo mur’ iyo ngoro nyene y’Uhoraho, n’ivy’ ubutunzi vy’umwami n’ivy’ abaganwa biwe, ivyo vyose abijana i Babuloni.

19Maze baturira n’ ingoro y’Imana, basangangura n’ uruzitiro rw’amabuye rw’i Yerusalemu, baturira n’ingoro zaho zose, bīca n’ivyiza‐vyiza vyaho vyose.

20Abācitse bagakira inkota, uwo mwami abajana i Babuloni, abagira abaja biwe n’ab’ abahungu biwe, gushitsa igihe Abaperesi bashikiriye ingoma,

21kwar’ ukugira ngw ijambo Uhoraho yavugiye mu kanwa ka Yeremiya rishike, igihugu gishumbushwe amasabato yaco; igihe cose camaze kikir’ amatongo, cariko kiziririza amasabato yaco, gushitsa kimaze imyaka mirongwirindwi.

22Hanyuma mu mwaka wa mbere Kuro umwami w’i Buperesi agiye ku ngoma, Uhoraho akangura umutima wiwe kugira ngw ijambo yavugiye mu kanwa ka Yeremiya ribone gushika. Nuko Kuro uwo mwami w’i Buperesi ashinga ko babitangaza mu gihugu ciwe cose, aranavyandika,

23ngo Kuro, umwami w’i Buperesi aravuze, at’ Uhoraho Imana Nyen’ ijuru yangabiye ibihugu vyose vyo mw isi. Kandi yangeze ngo ndamwubakire ingoro i Yerusalemu mu Buyuda. Non’ umuntu wese muri mwebge wo mu bantu biwe bose, Uhoraho Imana yiwe n’ibane na we, adūge ajeyo.

← Chapter 35 Jump to: