2 Chronicles 19

Kirundi (Bibliya Yera 1951, 1967 (Burundi))

← Chapter 18 Jump to: Chapter 20 →

1Bukeye Yehoshafati umwami w’Abayuda atabaruka amahoro, asubira i we i Yerusalemu.

2Maze Yehu mwene Hanani kamenyi aja kumusanganira; abaza umwami Yehoshafati, at’ Aho war’ ukwiye gutabara abanyakibi, ugakunda abanka Uhoraho? Kubg’ ivyo wikwegeye uburake bg’Uhoraho.

3Mugabo harih’ ivyiza bimwe bikubonekako, kuko wakūye mu gihugu inkingi zāshingiwe Ashera, ugashira umutima ku kurondera Imana.

4Nuko Yehoshafati aguma i Yerusalemu. Bukeye asubira kugendagenda mu bantu biwe, ahēra i Beri‐sheba ashitsa mu mugamba w’Abefurayimu, abagarukana k’Uhoraho Imana ya ba sekuruza.

5Ashira abacamanza mu gihugu, abakwiragiza mu bisagara vyose vy’i Buyuda bizitiriwe inzitiro iyo biva bikagera.

6Abgira abo bacamanza, ati Mumenye ivyo mukora, kuko mu guca imanza atar’ abantu mukorera, ariko n’ Uhoraho; kandi ni we ari kumwe namwe mu manza.

7Ariko mugende mwubaha Uhoraho, mwiyubare mu vyo mukora; kuk’ Uhoraho Imana yacu ata kugabitanya kuri muri we, canke gutinya ijunja ry’umuntu, canke kurya ingurire.

8Maze basubiye i Yerusalemu, Yehoshafati ahashira bamwe mu Balewi n’abaherezi n’abakuru bo mu mazu ya ba sekuruza b’Abisirayeli, ngo babe abo guca imanza mw izina ry’Uhoraho no gutātūra abantu mu vyo bapfa.

9Maz’ arababgira, ati Muze mugenze murtyo, mwubashe Uhoraho, mur’ abizigirwa, mufise imitima itunganye.

10Kandi bagenzi banyu baba mu bisagara vyabo, ni babagīsha inama zikoma ku vy’uwishe uwundi, canke ku vyagezwe canke ku mabgirizwa canke ku vyashinzwe canke ku matēka, muze mubereke uko bakwiye kubigenza, kugira ngo ntibaze bacumure k’ Uhoraho, mukīhamagarira uburake, mwe n’abo bagenzi banyu. Nuko muze mugenze murtyo, kugira ngo ntimucumure.

11Mu manza zose zikoma ku vy’Uhoraho, Amariya umuherezi mukuru ni we azoba kamaramagambo muri mwebge, na zo mu manza zose zikoma ku vy’igihugu, kamaramagambo ni Zebadiya mwene Ishimayeli, umukuru wo mu muryango wa Yuda; kand’ Abalewi bazoba abashingantahe banyu. Nuko ni mukovye, mukore, kand’ Uhoraho az’ abane n’ūca iziroranye.

← Chapter 18 Jump to: Chapter 20 →