2 Chronicles 17

Kirundi (Bibliya Yera 1951, 1967 (Burundi))

← Chapter 16 Jump to: Chapter 18 →

1Maz’ umuhungu wiwe Yehoshafati asubira ku ngoma yiwe; araheza yīgira agahambaye, arindana n’Abisirayeli.

2Ashira ingabo mu bisagara vyose vy’i Buyuda bizitiriwe inzitiro z’amabuye, akwiragiza amaboma mu gihugu c’i Buyuda no mu bisagara vy’i Bgefurayimu, ivyo se Asa yihesheje umuheto.

3Uhoraho abana na Yehoshafati, kuko yagendera mu ngeso sekuruza Dawidi yagendeyemwo uhereye ubga mbere, ntaje gusiguza za Bayali,

4arikw agasiguza Imana ya sekuruza, akagendera mu vyagezwe vyayo, ntāgendere mu ngeso z’ Abisirayeli.

5Ni co catumye Uhoraho akomeza ingoma yiwe; Abayuda bose bamuzanira imishikīro; agira ubutunzi bginshi n’icubahiro gihambaye.

6Umutima wiwe ugenda ushira ubgoba mu nzira z’Uhoraho, akūra mu Buyuda ibitabo vyatabge mu mpinga z’imisozi n’inkingi zashingiwe Ashera.

7Maze mu mwaka ugira gatatu ari ku ngoma arungika abaganwa biwe Beni‐hayili na Obadiya na Zekariya na Netaneli na Mikaya kuja kwigisha mu bisagara vy’i Buyuda;

8kandi hamwe na bo arungika n’Abalewi, Shemaya na Netaniya na Zebadiya, na Asaheli na Shemiramoti na Yehonatani, na Adoniya na Tobiya na Tobadoniya; kandi hamwe n’abo Balewi arungika n’abaherezi Elishama na Yehoramu.

9Abo baragenda bigisha i Buyuda, bafise igitabo c’ivyagezwe vy’Uhoraho; bagendagenda mu bisagara vyose vy’i Buyuda bigisha abantu.

10Maz’ ubgoba buvuye k’Uhoraho bufata abami bo mu bihugu vyose bikikije i Buyuda, ntibāruha bubahuka gutera Yehoshafati.

11Mbere bamwe bo mu Bafilisitiya bamuzanira ingorore, n’amafeza kw amarari; n’Abarabo na bo bamuzanira imikuku y’ingorore, amapfizi y’intama ibihumbi ndwi n’amajana ndwi, n’amapfizi y’ impene ibihumbi ndwi n’amajana ndwi nyene.

12Nuko Yehoshafati agenda arushiriza kuba agahambaye; yubaka i Buyuda amaboma n’ibisagara vy’ibigega;

13yar’ afise vyinshi yabītse mu bisagara vy’i Buyuda, kand’ i Yerusalemu yar’ ahafise ingabo z’abantu b’abahizi.

14Iki ni co gitigiri cabo, nk’ukw amazu ya ba sekuruza ari: mu bāgaba ibihumbi mu Bayuda, uwa mbere yari Aduna, yagaba abantu b’abahizi ibihumbi amajana atatu;

15uwamukurikira ni Yehohanani, na we yagaba ibihumbi amajana abiri na mirongumunani,

16uwakurikira uwo ni Amasiya mwene Zikuri, umuntu yitanze, yiyeguriye Uhoraho; uwo yagaba abahizi ibihumbi amajana abiri.

17Mu Babenyamini uwa mbere ni Eliyada, umuntu w’umuhizi; yagaba ibihumbi amajana abiri nyene, abantu bitwaje imiheto n’inkinzo;

18uwamukurikira ni Yehozabadi, na we yagaba ibihumbi ijana na mirongumunani, bitwaje ibirwanishwa.

19Abo ni bo bāsasa ku mwami, ukūye abo umwami yashize mu bisagara bizitiriwe inzitiro hose mu Buyuda.

← Chapter 16 Jump to: Chapter 18 →